*Ô pôa, kơvâ pêi chiâk deăng ƀă mơnhông thôn pơlê kong pơlê Kon Tum hiăng pêi pro Pơkâ dêi Ngế pro xiâm hnê ngăn Chin phuh ‘na pơhlêh xúa kŏng ngê̆ môi tiah lâi?

-Pôa Đặng Trần Huân: Kơvâ pêi chiâk deăng mơnhông thôn pơlê hiăng xúa hên xiâm kối kŏng ngê̆ thông tin vâ tơkŭm ‘noăng chư ki chêh ‘măn ƀă tơdjêp ‘noăng chư chêh ‘măn tung tơdroăng pêi cheăng dêi Khu pơkuâ ‘na pêi chiâk deăng troh Khu xiâm pơkuâ ‘na pêi chiâk deăng ƀă mâu kơ kơ koan xiâm, kơ koan xuân môi tiah tơdjêp ƀă Vi ƀan kong pơlê; mâu khu, kơvâ cheăng ƀă Vi ƀan kong pơlê xuân xing xoăng kơxô̆ liăn ăm kơvâ cheăng ƀă ngin dế pêi pro tơdroăng mơ’no liăn mung tơdroăng mơdró kŏng ngê̆ thong tin vâ mơjiâng ‘noăng chư ki chêh ‘măn xúa tơdjuôm ƀă ‘noăng chư ki chêh ‘măn nếo dêi kơvâ pêi chiâk deăng vâ kum ăm tơdroăng pơkuâ tơnêi têa xuân môi tiah xúa ƀă tơbleăng ăm dêi pó ‘noăng chư ki chêh ‘măn’’.

*Tơdroăng mơjiâng kơmăi rak ‘noăng chư ki chêh ‘măn ai kơnâ klâi tung pơkuâ dêi kơvâ pêi chiâk deăng ƀă mơnhông thôn pơlê kong pơlê Kon Tum, ô pôa?

-Pôa Đặng Trần Huân: Ki chiâng dêi kơmăi rak ‘noăng chư ki chêh ‘măn cho pơkuâ tâi tâng mâu kơvâ pêi chiâk deăng; mơnhên tơdroăng pơkuâ ƀă ‘nâi tơdroăng tro khât ‘na loăng plâi, klêi mê mơnăn păn, ká xi xŏng, mâu pơreăng, klêi mê kih thuât pêt mơjiâng tơmeăm tung rơnó pêi tơmeăm ƀă ing tâi tâng troh i nhên. Má péa nếo, cho mơdêk mâu khu tê mơdró ƀă kuăn pơlê veăng mâu tơdroăng pêi cheăng tung pêi chiâk deăng tâi tâng, thăm xúa mâu kŏng ngê̆ kơmăi kơmok tung pêt mơjiâng kum tung tơdroăng pơhlêh kŏng ngê̆ kơvâ pêi chiâk deăng ƀă tơkŭm tâi tâng mâu ‘noăng chư ki chêh ‘măn tung kơmăi dêi Khu xiâm pơkuâ ‘na pêi chiâk deăng Mơnhông thôn pơlê kum pin pơkuâ tơtro tâ ‘na xiâm kối ƀă mơjiâng chiâng hê̆ sinh thái tung pêi chiâk deăng xúa kŏng ngê̆ kơmăi kơmok’’.

*Pôa hôm chiâng tối ‘na mâu tơdroăng châ tơƀrê dêi tơdroăng xúa kŏng ngê̆ kơmăi kơmok ƀă mơnhông cheăng kâ xúa kŏng ngê̆, pơlê pơla xúa kŏng ngê̆ tung mơnhông cheăng kâ pêi chiâk deăng dêi Kon Tum?

Pôa Đặng Trần Huân: Troh nôkố lối 116.000 rơpŏng pêt mơjiâng tơmeăm pêi lo ing chiâk deăng hiăng to a tíu tê mơdró điê̆n tưh; lối 143.000 rơpŏng châ hnê xúa kŏng ngê̆ kơmăi kơmok; lối 2.600 tơmeăm châ djâ a tíu tê mơdró điê̆n tưh; djâ tơdroăng dêi 349 khu tê mơdró ƀă 588 tơmeăm dêi kong pơlê tơbleăng tung măng pơlê pơla. Ki rơhêng vâ tối hiăng mơjiâng kơmăi kơmok kơchơ mơdró mơ’no tơdrêng tung um tiô troăng hyôh măng kong pơlê Kon Tum a tíu cho hoichokontum vâ tơbleăng mâu tơdroăng xuân môi tiah mâu tơdroăng ‘na kơchơ tung tơnêi têa ƀă kong têa ê ƀă tơbleăng mâu tơmeăm dêi kong pơlê ƀă veăng mâu tơmeăm ing kŏng ngê̆ 3D’’.

*Pôa mơnhên môi tiah lâi ‘na ki châ tơƀrê tung tơdroăng mơ-eăm pơhlêh xúa kŏng ngê̆ dêi kơvâ pêi chiâk deăng ƀă mơnhông thôn pơlê kong pơlê Kon Tum?

-Pôa Đặng Trần Huân: Kơvâ pêi chiâk deăng ƀă mơnhông thôn pơlê hiăng tơkŭm mơnhông cheăng kâ xúa kŏng ngê̆ pêi chiâk deăng, xua mâu xiâm kối kŏng ngê̆ vâ pơkuâ ki dâi lĕm tơmeăm ƀă pro mâu nhãn mác, xiâm kối tơmeăm vâ tê tơmeăm a mâu tíu tê mơdró điê̆n tưh. Tơdroăng châ tơƀrê pơhlêh xúa kŏng ngê̆ dêi kơvâ pêi chiâk deăng ƀă mơnhông thôn pơlê sap ing hơnăm 2022 troh nôkố cho xiâm kối vâ kơvâ pêi chiâk deăng pơtối mơnhông pêi pro mâu hnoăng cheăng ƀă mâu troăng vâ mơnhông cheăng kâ xúa kŏng ngê̆ ƀă mơnhông thôn pơlê rơkê dêi kong pơlê Kon Tum tung la ngiâ ah’’.

-Pâ mơnê kô pôa!