Rôh apoăng bú ai 9 ngế, troh nôkố Khu pêi cheăng tơrŭm chiâk deăng - tê mơdró Tơ Tung (cheăm Tơ Tung, tơring Kƀang, Gia Lai) hiăng tơ’mot 67 ngế tung khu veăng pêt ƀă pro pơkeăng ing plăng. Tiô nâ Nguyễn Thị Thanh Hương, Kăn hnê ngăn khu pêi cheăng tơrŭm tối, hdrối nah kuăn pơlê ki hên kơnôm to ing pôm loăng ƀă prá alâi iâ khế. Sap hơnăm 2019 troh nôkố, kơnôm pêt plăng, mê mâu ngế tung khu pêi cheăng tơrŭm hiăng pêi lo liăn tơniăn, Khu pêi cheăng tơrŭm hiăng mơjiâng inâi ki xú lĕm ing plăng châ mơnhên OCOP 3 hơhlŏng râ kong pơlê, ƀă tíu tê tơniăn a mâu siêu thĭ ƀă a mâu hngêi pơkeăng. Nâ Nguyễn Thị Thanh Hương tối:

“Drêng pơhlêh chiâng tơmeăm ki lĕm kô hên tâ. Ngin mơ-eăm pêi pro tro mâu pơkâ OCOP vâ tơ’lêi tê dêi tơmeăm ăm kơchơ mơdró, pro hên ngế vâ rôe. Nôkố, khu pêi cheăng tơrŭm châ Kŏng ti pro pơkeăng ƀă Tơmeăm ‘na pơkeăng pơlât Đà Nẵng rôe tơmeăm pêi lo, ƀă kơxô̆ liăn châ xo tâng riân dâng 50-60 rơtuh/ha rêm hơnăm”.

Tung kơpong pêt hên dêi Kơpong rak ngăn kong kế Kon Chư Răng, mâu khu mơdró hiăng pơxiâm ‘no liăn pêt rơtế ƀă kuăn pơlê tơring Kƀang tăng ki tíu ki tơ’lêi chiâng vâ pêt nhâ pơkeăng. Môi tiah cheăm Đăkrong ai 2 tơdroăng tơkêa bro pêt nhâ pơkeăng dế tơbleăng pêt a pơlê Kon Trang ƀă pơlê Kon Lanh Te, tâi tâng deăng pêt vâ chê 40 ha.

Môi tiah mê, a mâu cheăm Sơn Lang, Kon Pne, Sơ Pai ƀă Krong (rơtế tơring Kƀang) hiăng ai vâ chê 240 ha ring rí ‘nhŭng, sâm hmốu, đương quy, đinh lăng ƀă klô̆ng trĭng dế châ pêt pá kơdâm kong kân. Pôa Ngô Văn An, Kăn phŏ hnê ngăn Vi ƀan kuăn pơlê cheăm Đăkrong, tơngah mâu tơdroăng tơkêa pro pêt nhâ pơkeăng kô veăng pơhlêh tơdroăng rêh ối cheăng kâ dêi kuăn pơlê hdroâng kuăn ngo:

“Ing tơdroăng tơkêa bro a pơlê Kon Trang (7ha) ƀă pơlê Kon Lanh Te (30ha), kô ai tơ’nôm hên cheăng pêi ăm kuăn pơlê tung cheăm. Mâu kŏng ti xuân ăm hdrê pêt, phon rơvât pơkeăng tơmeăm vâ pêi ƀă hlối kĭ tơhrâ rôe tơmeăm pêi lo ƀă ki kuăn pơlê pêi tung mâu hơnăm pơtối”.

Sap ai tơdroăng pơkâ kơxô̆ 09-NQ/TU dêi Khu kăn Đảng ƀô̆ kong pơlê Gia Lai (hneăng 14) hơnăm 2019 ‘na pơtối rak vế ƀă mơnhông pêt nhâ pơkeăng, troh nôkố, lâp tung kong pơlê hiăng pêt châ 4.200ha nhâ loăng pơkeăng. Gia Lai hiăng ai 55 tơmeăm loăng nhâ pơkeăng châ mơnhên OCOP (tung mê ai 9 tơmeăm châ pơxá 3 hơhlŏng). Kong pơlê ai 4 toăng hngêi kơmăi uâ pơliê pro pơkeăng, tơniăn xiâm ki pêi pro, hlối séa ngăn krâu khât tơdroăng pêt vâ pro.

Tơdrêng amê, nôkố Gia Lai ai 4 tơdroăng tơkêa bro po rơdâ pêt nhâ pơkeăng hiăng châ kĭ, tâi tâng kơxô̆ liăn dâng 497 rơtal liăn, ƀă 10 tơdroăng tơkêa bro tung inâi krếo thế ‘no liăn  pêt ƀă kơxô̆ liăn tăng lối 7.272 rơtal liăn.

Pôa Nguyễn Văn Hoan, Kăn phŏ pơkuâ ngăn pêi chiâk ƀă mơnhông thôn pơlê kong pơlê Gia Lai, ăm ‘nâi, kong pơlê pro tơ’lêi hlâu ăm mâu khu mơdró ki ‘no liăn cheăng kơvâ pro pơleăng nhâ loăng.

‘Na tơ’mot ‘no liăn cheăng, ngin kô pro tơ’lêi hlâu má môi ăm mâu khu mơdró tăng ngăn mâu kơpong ki chiâng pêt nhâ pơkeăng tơtro ƀă tơrêm túa nhâ loăng pơkeăng. Mâu tơdroăng tơkêa bro pơkâ thế kô tơbleăng ăm khu mơdró mâu kơpong ki chiâng vâ pêi pro tơdroăng tơkêa bro. Malối ngin púi vâ khu mơdró mơjiâng pro mâu hngêi kơmăi uâ pơliê pro pơkeăng a kong pơlê ’’.