Kong pơlê Dak Lak nôkố ai lối 1.700 hngêi păn chêm yến, tơkŭm ki hên a pơlê kong kơdrâm Ƀuôn Ma Thuột ƀă mâu tơring Ea Kar, Ea Súp, Krông Pač. Tơmeăm pâu yến dêi kong pơlê châ sap ing 8 – 10 tâ̆n/hơnăm. Dak Lak cho kong pơlê ối má môi kơpong Tây Nguyên ƀă ối tung top 10 kong pơlê, pơlê kong kơdrâm ai kơxô̆ hngêi păn chêm yến kân má môi lâp tơnêi.

Nôkố, lâp kong pơlê ai 15 tơmeăm pro ing pâu chêm yến châ mơnhên cho tơmeăm OCOP 3 hơlŏng, 8 tơmeăm OCOP 4 hơlŏng. Dak Lak hiăng ai tơmeăm pro ing chêm yến apoăng tê tiô troăng chĭnh ngăch ngi kơchơ mơdró kong têa Sinuâ ƀă tê tiêuh ngăch ngi mâu kong têa môi tiah Mih, Úc, Nhuk...

Pakĭng mâu tơdroăng châ tơƀrê, kơvâ păn chêm yến a kong pơlê Dak Lak dế trâm hên pá puât ƀă pơloăng mơnúa ‘na mơnhên troăng prôk la ngiâ pơkâ kơpong păn ki xiâm, mơjiâng pro, uâ bro ƀă tê tơmeăm ing chêm yến, pơkuâ ki dâi lĕm ƀă mơjiâng inâi.