Tung rôh lăm pôu kong têa Malaysia, kơxê hâi lơ 21/11, pôa Tô Lâm Kăn xiâm pơkuâ hnê ngăn Đảng ƀă pôa Anwar Ibrahim Ngế pro xiâm hnê ngăn kong têa Malaysia pơkuâ hôp ƀă khu chêh hlá tơbeăng  tối mâu tơdroăng dêi rôh hôp.

A rôh hôp ƀă khu chêh hlá tơbeăng, pôa Tô Lâm Kăn xiâm pơkuâ hnê ngăn Đảng ƀă Ngế pro xiâm hnê ngăn kong têa Malaysia   ăm ‘nâi, 2 tơnêi têa hiăng pơkâ mơdêk tơrŭm cheăng pơla Việt Nam - Malaysia tâk Tơrŭm cheăng tung tŭm tơdroăng. Ing mê, kum 2 tơnêi têa mơnhông tơrŭm tơrôa, loi nhoăm dêi pó tơdroăng kal kí pơla péa kong têa ing tơdroăng nhoăm luât lâp plâi tơnêi, tơniăn, ai hnoăng pơkuâ, tâi tâng lâp tơnêi têa ƀă luât kal kí, tơtro ƀă tơdroăng cheăng kâ-rêh ối ƀă luât, pơkâ rêi rêm to kong têa ƀă ôh tá veăng tơmâng tơdroăng cheăng dêi trơpó.

Xiâm dêi tơdroăng tơrŭm cheăng tung tŭm tơdroăng mơdêk loi nhoăm ƀă tơrŭm kal kí, ‘na cheăng lêng, kring tơniăn, pro xiâm tơrŭm krá, veăng pro tơniăn hyôh kong prâi hơniâp, mơnhông cheăng kâ ing mơdêk tơpui tơno, tơrŭm tâi tâng rêm râ, tơbleăng pêi ai pơxúa mâu luât tơpui kâ, tơrŭm ki ai hlâu, hlối tăng ngăn mơjiâng mâu luât ki nếo tơtro ƀă tơdroăng púi vâ, ki pơxúa dêi péa pâ tung tơdroăng rêh ối nếo.