25 hơnăm hiăng hluâ Tơdroăng Droh rơtăm pleăng hnoăng cheăng rơnó pơtê hriâm châ rơxông ối nếo kong pơlê Kon Tum pêi pro nếo rêm hơnăm, tá ‘na tơdroăng xiâm ƀă troăng pêi pro.

Tơdroăng ki châ tơƀrê má môi tơdah pêi pro 875 tơmeăm, tơdroăng cheăng droh rơtăm ƀă tâi tâng ki kơnâ 10 rơtal liăn; tŏng gum rơnêu, rơnuâ lối 700 km troăng thôn pơlê; mơjiâng ƀă rơnêu lối 80 toăng hngêi ăm kuăn pơlê ai tơdroăng rêh ối pá puât; lăm kơ-êng, diâp lối 20.000 kơxuô tơmeăm ăm rơpŏng ai troăng hơlâ tơnêi têa tŏng gum, mơngế ai hnoăng. Roh kố, 12 ngế krê ki kơhnâ rơkê tơdroăng Droh rơtăm pleăng hnoăng cheăng rơnó pơtê hriâm dêi kong pơlê Kon Tum hâk tơngăm tơdah Kih niêm chương ‘’Xua rơxông ối nếo’’ dêi Khu xiâm Đoân; Viƀan kong pơlê Kon Tum diâp Ƀang kheăn kơdeăn 7 khu pú hên ƀă ngế krê; Khu pơkuâ Đoân droh rơtăm Kon Tum diâp tơring tơkăng kong Sa Thầy ƀă Ngọc Hồi 2 tơmeăm  droh rơtăm pro ‘’Tâp trăng hnhâng kơxái on bâ troăng pơlê’’ ƀă tâi tâng kơnâ 225 rơtuh liăn.