Roh hôp vâ tơpui tơno tah lôi mâu tơdroăng pá puât, tơvâ tơvân ‘na hngêi ối pơlê pơla, tơdroăng pêi pro, tơdroăng châ tơƀrê pêi pro tơdroăng tơkêa bro kố. ‘Na tơdroăng châ tơƀrê po rơdâ pêi pro tơdroăng tơkêa bro hngêi ối pơlê pơla tung hneăng sap hơnăm 2021 troh nôkố ing tơkŭm tơbleăng dêi mâu kong pơlê, tung kong pơlê lâp tơnêi têa ai 503 tơdroăng tơkêa bro hngêi ối pơlê pơla hiăng châ pêi pro ƀă 418.200 toăng hngêi, tung mê, kơxô̆ tơdroăng tơkêa bro kêi đeăng cho 75 tơdroăng tơkêa bro.

Kơxô̆ tơdroăng tơkêa bro hiăng pơxiâm mơjiâng cho 128 tơdroăng tơkêa bro ƀă 115.379 toăng; Kơxô̆ tơdroăng tơkêa bro hiăng châ môi tuăn troăng hơlâ mơ’no liăn cheăng cho 300 tơdroăng tơkêa bro. Xông tơpui a roh hôp, pôa Phạm Minh Chính, Ngế pro xiâm hnê ngăn tơnêi têa tối nhên, mơjiâng hngêi ối pơlê pơla cho tơdroăng xiâm ki kal dêi mâu troăng hơlâ mơnhông cheăng kâ – rêh ối pơlê pơla, Khu cheăng kal kí, mâu khu râ, mâu kơvâ cheăng kal mơnhên hnoăng cheăng mơjiâng hngêi ối pơlê pơla cho hnoăng cheăng kal kí ki kal dêi kong pơlê, tíu cheăng vâ tơkŭm tâ mê nếo, kơtăng tâ mê nếo, mơ-eăm pêi kêi đeăng ƀă mâu pơkâ kơxô̆ hngêi ối pơlê pơla tung kong pơlê hiăng pơkâ mơ’no.