Tung mâu hơnăm hdrối, tơdroăng hriâm ƀă pêi pro tiô tuăn mơno, tơdroăng ki lĕm, túa pêi cheăng Hồ Chí Minh hiăng  chiâng tơdroăng pêi đi đo, vâ pêi xêh  tung rêm râ, kơvâ cheăng, kơ koan, tíu pêi cheăng lêng.

Ing mê, mơnhông cheăng kâ-rêh ối tung kong pơlê rĕng mơnhông tơƀrê klêi kơ’nâi ai pơreăng COVID-19. Tơdroăng mơjiâng, hnê ‘mâi rơnêu Đảng ƀă tơdroăng cheăng kal kí châ pêi hên. Tơdrêng amê, kong pơlê tơmâng ‘mâi hơ’lêh túa pêi cheăng, mơdêk hnoăng cheăng pêi tung pêi pro tiô tơdroăng cheăng; kơhnâ pơ’lêh nếo tơdroăng rak ngăn, mơdêk pêi tơƀrê khât tơdroăng cheăng dêi khu kăn rêm râ. Hiăng ai rơpâu tú pêi cheăng ‘ló tro, ‘nâi hriăn pêi ki nếo tung mâu kơvâ cheăng.

A hneăng hôp, Khu kăn Đảng kong pơlê, Vi ƀan kuăn pơlê dêi kong pơlê Gia Lai hiăng diâp ƀâng kơdeăn khĕn ăm 21 khu pú hên ƀă 29 ngế kơhnâ hâk vâ tơdroăng hriâm ƀă pêi pro tiô tuăn mơno, tơdroăng ki lĕm, túa pêi cheăng Hồ Chí Minh.