A pơlê kong kơdrâm Ƀuôn Ma Thuột, kong pơlê Dak Lak, Khu kăn Kuô̆k hô̆i kong pơlê Dak Lak hiăng ai rôh trâm kuăn pơlê ƀă mâu kŏng nhân pêi cheăng. Veăng ai mâ a rôh hôp trâm mâ kuăn pơlê ai jâ Bùi Thị Minh Hoài, kăn pơkuâ tíu xiâm Đảng, Ngế xiâm pơkuâ Khu hnê mơhnhôk Tơnêi têa, kăn Kuô̆k hô̆i hneăng 15 ƀă vâ chê 150 ngế kuăn pơlê cho kŏng nhân pêi cheăng lo ing mâu tíu pêi cheăng, khu mơdró kâ tung kong pơlê.

Klêi kơ’nâi hmâng tối tơbleăng ‘na tơdroăng ki kal Hneăng hôp má 7, Kuô̆k hô̆i hneăng 15 ƀă klêi kơ’nâi tơdroăng pêi cheăng dêi Khu kăn Kuô̆k hô̆i kong pơlê ing klêi kơ’nâi hneăng hôp má 6 troh nôkố, mâu kuăn pơlê Dak Lak hiăng tối mâu tơdroăng ki pâ thế tơkŭm tung mâu tơdroăng ‘na ƀaoh hiêm, liăn khế, hngêi ối, mâu tơdroăng pơxúa ăm mâu ngế pêi cheăng ƀă hên ki ê.

Ki nhên, kuăn pơlê pâ thế pro tơ’lêi vâ đoân viên, ngế pêi cheăng vâ veăng roê ƀaoh hiêm khăm pơlât châ xúa drêng lăm khăm pơlât a mâu hngêi pơkeăng ki ôh ti xê tung chôu pêi cheăng, kơdroh hơnăm pơtê cheăng ƀă mâu khu tơdroăng môi tiah cô hnê mầm non, kŏng nhân ki mơjiâng pro mâu kế tơmeăm tung mâu kơvâ cheăng ki ai hrik xo hyôh, kơtâk ‘mêi tơdroăng cheăng ki hngăm ƀă hên ki ê. Jâ Ngô Thị Ánh Đào, Ngế cheăng tung Khu xiâm tŏng kum tơdroăng hnê hriâm mot tơrŭm cheăng hơnăm ối nếo chó chêng tơvê kŏng kong pơlê Dak Lak tối:

“Pâ thế Kuô̆k hô̆i, kăn pơkuâ kong pơlê mơ’no ăm khu râ kăn ki ai hnoăng pơkuâ ai mâu troăng hơlâ pơkâ pêi pro nhên vâ ai mâu troăng hơlâ tŏng kum ƀă kơlo liăn kum kơjo kum tơtro ƀă kơvâ cheăng hnê mầm non môi tiah ai troăng hơlâ mơdêk tơ’nôm liăn kum kơjo tơdroăng cheăng kơdroh hơnăm pơtê cheăng, ăm cô mot tung khu cheăng hngăm hngo ƀă hrik xo hyôh kơtâk ‘mêi vâ mâu cô yăo hnê mầm non hmiân tuăn pêi cheăng pêi dêi hnoăng cheăng hnê”.

Rơtế amê, hên kuăn pơlê xuân pâ thế Tơnêi têa tơmâng ngăn troh troăng hơlâ tŏng kum bro hngêi ối tê yă rơpâ ăm kŏng nhân pê cheăng. Nguyễn Thị Thanh Thủy, Kŏng tii Tơlo liăn Ôm hyô Dak Lak tối nhên, tung pơla ki yă roê mâu tơmeăm to kơnâ, liăn xúa rêm hâi, liăn păn roăng kuăn ‘nĕng hriâm tâp xuân hên, kŏng nhân ôh ti ai liăn kơdĭng vâ châ roê hngêi ối.

“Pâ thế Tơnêi têa tơmâng ngăn, ai troăng hơlâ tŏng kum bro hngêi ối tê yă rơpâ lơ tê ăm liăn rêm khế lơ ăm kŏng nhân mung liăn kơjo, liăn liah rơpâ vâ kâi châ roê hngêi ối vâ tơniăn tung rêh ối, hmiân tuăn pêi cheăng kâ”.

Xuân a Rôh hôp trâm kuăn pơlê, Khu kăn Kuô̆k hô̆i kong pơlê Dak Lak hiăng diâp 100 kơxuô tơmeăm ăm kŏng nhân pêi cheăng ai tơdroăng rêh ối xơpá a kong pơlê.

Vâ ăm hneăng hôp má 7, Kuô̆k hô̆i hneăng 15 hiăng vâ troh la ngiâ, pơla hdrối kố nah, Khu kăn Kuô̆k hô̆i kong pơlê Lâm Đồng hiăng tơkŭm trâm mâ kuăn pơlê a hên tơring tung kong pơlê. A mâu tíu trâm mâ, kuăn pơlê tối loi khât ƀă tơngah tung mâu troăng hơlâ pơkâ tung mơdêk mơnhông cheăng kâ rêh ối pơlê pơla, troăng hơlâ tơkâ luâ xơpá xua ‘no hrê liăn cheăng kâ dêi Chin phuh, dêi Kuô̆k hô̆i tung mâu hneăng hôp pơla hdrối kố nah. Tơdrêng amê, hlối pơtối pâ thế hên tơdroăng ki tơdjâk troh hnoăng cheăng pơkuâ ngăn tơnêi têa tung mâu kơvâ.

A cheăm Rô Men, tơring Dam Rong, kuăn pơlê rơhêng vâ Đảng, Tơnêi têa kal pơtối tơmâng ngăn tơbleăng mâu tơdroăng, troăng hơlâ tŏng kum ‘no liăn cheăng tung kơpong hdroâng kuăn ngo, tơdroăng rêh ối pơlê pơla, ăm mung liăn kơjo ‘no pêi cheăng, mơdêk rĕng tơdroăng ki hbru ăm hlá mơ-éa hnoăng rak xúa tơnêi, tŏng kum hngêi ối ăm mâu rơpŏng kơtiê, rơnêu ƀă po rơdâ troăng kân 27, krâ ‘măn pul on a troăng prôk, kum bro klŏng mơ’no têa krúa troh a thôn pơlê ƀă hên ki ê.

Tung pơla mê, kuăn pơlê cheăm Mê Linh, tơring Lâm Hà malối tơmâng ngăn troh hnoăng cheăng hbrâ mơdât kâ kơluâ liăn ngân kal pơtối châ mơdât, tơtrŏng troh hnoăng cheăng lăm ngăn, séa ngăn tơdroăng ki pêi pro luât dêi kăn ƀô̆ a cheăm pơlê; pêi pro tơdâng tơ’mô mâu troăng hơlâ tŏng kum ‘no liăn mơnhông kơpong hdroâng kuăn ngo, rak vế tơdroăng tŏng kum rêh ối pơlê pơla ƀă hên ki ê. Kuăn pơlê Trương Văn Trình, a thôn 5, cheăm Mê Linh, tơring Lâm Hà, tối:

“Hbrâ mơdât kâ kơluâ mê râ kong pơlê ai khu lăm ngăn, séa ngăn. La drêng lăm ngăn, séa ngăn tơring ki lâi, cheăm ki lâi khu lăm ngăn a tối tơbleăng há? Ai mơ’no tối tung hlá tơbeăng ăm ngin ‘nâi há? Ki achê má môi cho râ tơring mê athế lăm ngăn, hnê mơhno, ngăn râ pá xôp dêi tơná hôm chiâng pêi há lơ ôh vâ rơnêu, pro tơ’lêi hlâu, athế pêi klêi ƀă pro pơxúa ăm hiâm mơno kuăn pơlê loi. Ôh ti xê tơpui tối dêi kuăn pơlê mơ’no ăm râ tơring pôi tá hnê mơhno, pôi tá bro tơdjâk klâi troh ti mê ôh ti chiâng”.

Teăng mâ mâu tíu pêi cheăng, khu râ kăn pơkuâ mâu cheăm tơring dêi kong pơlê Lâm Đồng hiăng tiâ mơnhên mâu tơdroăng ki kal, kơvâ cheăng ki kuăn pơlê kal vâ ‘nâi plĕng. Khu kăn Kuô̆k hô̆i kong pơlê Lâm Đồng xuân tơmâng xo tâi tâng mâu rơkong tơpui tối vâ pơkâ thế mâu kơ koan ki ai tơdjâk séa ngăn, tŏng kum, ‘mâi rơnêu tung la ngiâ.