Tơpui tơno ƀă khu râ kăn pơkuâ kong pơlê Kon Tum, khu râ kăn pơkuâ ƀă kuăn pơlê tơring Kon Rẫy a roh diâp kơxuô tơmeăm, jâ Võ Thị Ánh Xuân, Teăng Kăn xiâm hnê ngăn tơnêi têa tối rơdêi hnoăng, tíu cheăng ton xŏn dêi a Kon Tum tung péa roh tơplâ xâ Pơhlăng, Mih ƀă hiâm mơno rŭm môi tuăn, tơplâ khŏm ƀlêi trâng, khên tơnôu rơdêi dêi kuăn pơlê mâu hdroâng kuăn ngo tung kong pơlê.

Tơmâng troh tơdroăng rêh ối kuăn pơlê mâu hdroâng kuăn ngo, jâ Võ Thị Ánh Xuân pói vâ khu râ kăn pơkuâ hnê ngăn cheăng Đảng, khu râ kăn pơkuâ kong pơlê Kon Tum pơtối pêi pro châ tơƀrê troăng hơlâ hdroâng kuăn ngo vâ pro ‘nâng ‘nâi tâ mê nếo kơtăn mơnhông pơla mâu hdroâng kuăn ngo, kơpong vâ tâi tâng kuăn pơlê châ pơxúa tŭm tơdroăng châ tơƀrê kăch măng; rơtế ƀă mê cho hbrâ tơdroăng pơkuâ dêi Đảng, Tơnêi têa xuân môi tiah mơhnhôk, pêi pro mâu kơxô̆ liăn, ki má lối cho kơxô̆ liăn mơ’no ing mâu tơdroăng pơkâ pêi plah Tơnêi têa vâ mơnhông khăm pơlât, hnê hriâm, rak vế khôi túa lĕm tro ƀă pêi pro lĕm tro troăng hơlâ kum rêh ối pơlê pơla.