14 hơnăm roh apoăng tiô pâ lăm a têa kơxĭ, tơnăng a kơpong ai hên ká Trường Sa, kuăn pơlê tơnăng ká xi xŏng Nguyễn Lợi, tơring rơlố Lý Sơn, kong pơlê Quảng Ngãi hiăng tâ ki kân rơdâ dêi têa kơxĭ, dêi tơdroăng phiu ro drêng châ hên ká, dêi ki xăng po mâu kơto têa kơxôu…Lối 40 hơnăm pơtối pêi tơdroăng cheăng dêi pâ cho tăng ká, rêh ối ƀă plong, tuk, têa kơxĭ. Pôa Lợi tối, ki hên cho pêi kâ a têa kơxĭ, mê lăm tơnăng ká xi xŏng tung dế têa kơxĭ châ khât cho tơdroăng ‘’vêh pơlê xiâm’’.

“Rơlốu Hoàng Sa, Trường Sa cho dêi Việt Nam xua mê mơhé pá puât ki klâi mê á xuân prôk, khŏm mơ-eăm prôk rế mơnhông cheăng kâ, rế tơniăn gâk kring hnoăng pơkuâ têa kơxĭ rơlố. Á mơ-eăm rêh ối kơnôm ing têa  kơxĭ vâ kuăn cháu la ngiâ gá mơ-eăm tiô á’’.

Rêm kuăn pơlê tơnăng ká xi xŏng Lý Sơn, sap ing kot mâ, pơrá hlê plĕng Hoàng Sa cho kơpong têa kơxĭ ki rơxông pôa pâ hiăng ti tăng ăm, lo mơheăm chá; hiăng cho mơngế Lý Sơn mê thế ai hnoăng rak. Kuăn pơlê tơnăng ká xi xŏng Nguyễn Ngọc Khánh ối a Quảng Bình xuân tối, lo lăm a têa kơxĭ ôh tá xê to tăng tơmeăm kâ, mê cho ối cho hnoăng rak tơmeăm mơheăm chá dêi hnoăng pơkuâ krih tơviah dêi tơnêi têa:

“Ngin pêi cheăng a têa kơxĭ hiăng ton sap ing nah, nôkố ối cho hnoăng cheăng, hâk tơngăm veăng tơniăn, gâk kring têa kơxĭ rơlố pơlê xiâm tơnêi têa dêi pin’’.

Ƀă rêm ngế kuăn pơlê tơnăng ká xi xŏng xuân môi tiah kuăn pơlê tơnêi Việt Nam, Hoàng Sa, Trường Sa cho tơnêi tơníu Việt Nam sap ing ton nah; cho tơnêi ki jâ pôa lôi ăm, cho tíu vêh ki hmâ dêi kuăn pơlê hrĭng hơnăm hiăng hluâ.

Tiê̆n sih Luật Trần Công Trục, kăn pơkuâ Khu pơkuâ tơkăng kong dêi Chin phuh tối ăm ‘nâi: Tơdroăng mơnhên tơdroăng ton nah, luât ‘na hnoăng pơkuâ dêi Việt Nam ƀă 2 rơlố kố hiăng ƀă dế châ hên kong têa, mâu kong têa lâp plâi tơnêi ƀă hên ngế cheăng khoa hok mơnhên: Việt Nam cho kong têa apoăng tung tơdroăng pơxiâm ai, mơnhông hiăng pơkuâ ƀă pêi pro hnoăng dêi tơná đi đo ƀă Tơnêi têa ƀă 2 rơlố Hoàng Sa, Trường Sa sap ing rơlố tá hâi ai ngế pơkuâ, ki vâ iâ sap ing chal má 17 drêng rơlố tá hâi ối tung hnoăng pơkuâ dêi kong têa ki lâi, troh drêng Hoàng Sa troh mâu khu lêng kong têa Sinuâ hdi tơbriêt hâi lơ 19/1/1974.

Tơdroăng pơkuâ ƀă pêi pro hnoăng pơkuâ dêi Việt Nam a 2 rơlố kố cho nhên, đi đo, hơniâp lĕm, tơtro ƀă hnoăng pơkâ tơnêi tơníu nôkố ƀă pơkuâ pơkuâ păng ‘nâng dêi luât lâp plâi tơnêi.

“Pơkâ Việt Nam tiô amê cho pơkâ pơkuâ păng ‘nâng, pin hiăng mơnhên ƀă  lâp plâi tơnêi mê cho tơnêi têa Việt Nam cho tơnêi têa apoăng pơkuâ, pêi pro Việt Nam ai tŭm tơmeăm vâ mơnhên, xiâm kối tiô luât ai kơnâ vâ mơnhên. Pin xo hâi khế cho tung dế chal 16, apoăng chal 17’’.

Ƀă rêm ngế kuăn pơlê Việt Nam, hnoăng pơkuâ ƀă tơdroăng tâi tâng tơnêi tơníu cho krih tơviah ƀă ôh tá chiâng vâ hdi tơbriât. Xua mê, drêng hnoăng pơkuâ tơnêi têa tro hdi tơbriât, khu lêng ƀă kuăn pơlê pin hbrâ xông tơplâ xâ, ôh tá hêng thu, ôh tá xâu hlâ vâ rak hơniâp lĕm ăm têa kơxĭ, rơlố, gâk kring tơkăng kong tơnêi têa.

Tiô Trung tươ̆ng Nguyễn Ngọc Tương, Kăn phŏ Chính ủy Học viện Quốc Phòng: Tơplâ gâk kring hnoăng pơkuâ têa kơxĭ, rơlố cho tơdroăng ki kal, ton xŏn, xua mê, troăng tơmiât tơdjuôm cho ‘’Khŏm pêi, khŏm rak’’, ‘’xo ki ôh tá pơhlêh tơtrâ ƀă ki pơhlêh’’, “rak pơkâ pêi ton xŏn, ƀeăn ƀĕng ‘na troăng pêi’’; mâu tơdroăng ki klâi ối tung pơkâ thế rak; mâu ki klâi ối tung tơdroăng tơ’noăng krê, hnoăng pơkuâ, tâi tâng tơnêi tơníu mê ôh tá nhuông, laga thế ai pêi ki tơtro, rak hnoăng pơkuâ têa kơxĭ, rơlố laga thế tơniăn kal kí, rak tơdroăng hơniâp lĕm vâ mơnhông tơnêi têa.

“Đảng pin đi đo mơdêk hnoăng cheăng gâk kring krá tơniăn, hnoăng pơkuâ tâi tâng tơnêi tơníu laga tơdrêng amê thế rak tơdroăng hơniâp lĕm, tơniăn vâ mơnhông tơnêi têa. Tơdroăng kố mơhno nhên tung mơ-éa ki kal Hneăng hôp Đảng XIII pơla kố nah. Môi tơdroăng nếo ki Đảng pin tối rơdêi cho tơdroăng gâk kring hnoăng pơkuâ têa kơxĭ rơlố, cho tơdroăng pêi cheăng dêi tâi tâng Đảng, tâi tâng kuăn pơlê, tâi tâng khu lêng ƀă thế mơnhông ivá tâi tâng, tung mê xo khu lêng kuăn pơlê pro ki xiâm ƀă hía hé. Tâi tâng mâu tơdroăng mê, cho ki xiâm ƀă kal khât ƀă môi tơnêi têa ai têa kơxĭ môi tiah pin; tơdrêng amê gá thế tơtro ƀă troăng mơnhông mơdêk tơdjuôm dêi lâp plâi tơnêi nôkố’’.

Đảng, Tơnêi têa ƀă kuăn pơlê pin đi đo môi tuăn troăng hơlâ: “Việt Nam khŏm pêi, khŏm gâk kring hnoăng pơkuâ, tơnêi tơníu, têa kơxĭ rơlố tiô luât lâp plâi tơnêi’’. Mơhnhôk ivá tâi tâng, mơjiâng tâi tâng kuăn pơlê gâk kring, kring tơniăn kuăn pơlê, ‘’Kuăn pơlê môi hiâm mơno’’ a têa kơxĭ, rơlố, tung pơla kố nah hiăng mơjiâng chiâng kế tât môi tiah meăm thep vâ gâk kring krá tơniăn rêm rơlố, têa kơxĭ hnoăng pơkuâ tíu tơkăng kong tơnêi têa.