Riân troh tâi khế 4 hơnăm kố, Dak Lak hiăng mơ’no liăn cheăng tơnêi têa châ lối 1.000 rơtal liăn, châ 25% pơkâ pêi, hên tâ 12% tâng pơchông ƀă roh kố hơnăm hdrối. Ƀă mâu tơdroăng tơkêa bro ki xiâm, môi tiah: troăng kân ăm phêp rơxế kơtâu têi Khánh Hòa – Ƀuôn Ma Thuột hiăng mơ’no liăn ngân châ lối 27% kơxô̆ liăn hơnăm 2024.

Troăng kân Hồ Chí Minh kơpong ví peăng mâ hâi lo pơlê kong kơdrâm Ƀuôn Ma Thuột hiăng mơ’no liăn châ lối 1.050 rơtal liăn/1.500 rơtal liăn châ mơ’no troh nôkố, châ lối 70% pơkâ pêi. Laga, tiô pôa Phạm Ngọc Nghị, Kăn hnê ngăn Vi ƀan kong pơlê Dak Lak, mơhé mơ’no liăn cheăng tơnêi têa dêi kong pơlê mâu khế apoăng hơnăm ai hên tơtêk laga tá hâi châ môi tiah pói vâ. Mâu khu cheăng, kơvâ cheăng kong pơlê kal tơmâng, tŏng kum hên tâ mê nếo troh tơdroăng xiâm kố.