Leh tơbâ, ăm lêng prôk pơtăng pơxiâm hâk tơngăm ƀă 21 khu kơnŏng tiô tơdroăng rơhdruê ƀai tơnêi têa Kŏng hoa xah hô̆i chuh ngiah Việt Nam. Pơtối cho mơđah tơbleăng dêi khu tơƀai trưk thăng djâ hlá cơ Đảng, hlá cơ Tơnêi têa kơneăng hluâ tíu po leh. Kơ’nâi mê cho mâu ƀai pơchuât dêi pôa Phạm Minh Chính, Ngế pro xiâm hnê ngăn Chin phuh, teăng mâ mâu lêng Điện Biên, teăng mâ mâu rơxông ối nếo; Tơdroăng leh diâp Mê dái tơniăn krê ối má môi ăm Đảng ƀô̆, khu râ kăn pơkuâ ƀă kuăn pơlê mâu hdroâng mơngế kong pơlê Điện Biên ƀă mơ’nui lui cho tơdroăng mơđah ăm lêng prôk pơtăng, tơkŭm pro pơtăng ó rơdêi krip krih.

Tâi tâng khu lêng veăng prôk pơtăng lối 12.000 ngế. Khu tơƀai trưk thăng kơneăng hluâ mâu tơmeăm, tíu chôu ‘măn tơmeăm khoăng ton nah mơnhông tơtêk môi tiah Đồi A1, Ilâng Đồi A1, Um meăm ƀlêi trâng Điện Biên Phủ, Tíu chôu ‘măn tơmeăm khoăng ton nah Điện Biên Phủ ƀa hía hé, rêm khu prôk pơtăng, tơkŭm prôk pơtăng ó rơdêi mot a tíu po leh tiô rơkong pơchuât mơhno tơdroăng ki rơdêi păng ‘nâng dêi khu rŭm môi tuăn tâi tâng hdroâng mơngế ing pơkuâ dêi Đảng Kŏng san Việt Nam ƀă Kăn xiâm hnê ngăn Hồ Chí Minh, pro chiâng ƀlêi trâng Điện Biên Phủ “troh lâp lu pơtăm kơpong, tơdrôu lâp plâi tơnêi”.