Hâi lơ 25/4, kong pơlê Bình Dương hiăng tơkŭm po leh tơbleăng Pơkâ dêi Vi ƀan pơkuâ Kuô̆k hô̆i ‘na tơdroăng ki mơjiâng bêng An Điền, bêng An Tây ối tung cheăm Bến Cát ƀă mơjiâng pơlê kong kơdrâm Bến Cát. Veăng a rôh leh ai pôa Trần Quang Phương, kăn xiâm phŏ hnê ngăn Kuô̆k hô̆i. Bêng An Điền, An Tây châ mơjiâng tung tơdroăng ki tâi tâng ƀăng tơnêi dêi 2 to cheăm rơtế môi inâi. Pơlê kong kơdrâm Bến Cát klêi kơ’nâi mơjiâng ai 7 to bêng ƀă 1 to cheăm. Tung pơla hdrối kố nah, Bến Cát mơdêk rơdêi cheăng kơmăi kơmok, troh nôkố tâi tâng pơlê kong kơdrâm a 8 tíu pêi cheăng ƀă kơmăi kơmok, 1 kơpong tíu mơjiâng bro tơmeăm tơkŭm, tăng cheăng pêi ăm 180 rơpâu ngế pêi cheăng.

Mâu kơpong cheăng ƀă kơmăi kơmok tơ’mot 6.441 tơdroăng tơkêa ‘no liăn cheăng, tung mê tơdroăng tơkêa ai liăn ‘no pêi cheăng kong têa ê cho 816 tơdroăng tơkêa ƀă tâi tâng kơxô̆ liăn vâ chê 9,8 rơtal dollars. Tơpui a rôh leh, pôa Trần Quang Phương, kăn xiâm phŏ hnê ngăn Kuô̆k hô̆i ăm ‘nâi, tơdroăng ki mơjiâng pơlê kong kơdrâm Bến Cát cho tơdroăng ki ai pơxúa, hdró môi hvêa chêng prôk mơnhông nếo dêi kong pơlê.

Pôa Trần Quang Phương, kăn xiâm phŏ hnê ngăn Kuô̆k hô̆i pơkâ thế kăn pơkuâ pơlê kong kơdrâm Bến Cát pơtối mơdêk ivá, ki ai hlâu ƀă ki rơkê dêi kong pơlê vâ mơnhông cheăng kâ rêh ối pơlê pơla tơƀrê. Tiah mê, riân troh nôkố, Bình Dương ai 5 to pơlê kong kơdrâm mê cho: Bến Cát, Tân Uyên, Thuận An, Dĩ An, Thủ Dầu Một. Kố cho kong pơlê ki ai hên pơlê kong kơdrâm má môi tung lâp tơnêi têa.