Sap apoăng châ mâu kăn ƀô̆ đảng viên troh a hngêi hnê pơ’lêh tơnêi pêt kơphế ki hiăng krâ oh tá ai plâi hên pêt kơchâi, reăng ƀă yâu ƀok, mê rơpŏng pôa Liêng Hot Ha Linh, ối a thôn Dạ Tro, cheăm Dà Nhim, tơring Lạc Dương (Lâm Đồng) hiăng khên pro tiô ƀă hlo pơxúa châ liăn hên ăm rơpŏng hngêi. Liêng Hót Ha Linh ăm ‘nâi, 6 sào tơnêi  pêt kơchâi, reăng ƀă yâu ƀok châ rơpŏng hngêi pôa pêt tiô troăng pêi chiâk deăng xúa kơmăi dâi lĕm mê tơmeăm pê lo lĕm hên, tâng riân rêm hơnăm rơpŏng hngêi châ xo dêi lối 500 rơtuh liăn.

“Kơnôm mâu kăn ƀô̆ đảng viên, mâu kăn troh hnê kuăn pơlê hnê pơ’lêh hdrê pêt, túa pêi cheăng, hlối tơkŭm po mâu lâm hnê kih thuât pêi pêt rak ngăn, rơpŏng hngêi hiăng khên tơnôu pơ’lêh môi pâ deăng kơphế pêt yâu  ƀok, pêt reăng tung hngêi nhĕng. Ing mê, kơxô̆ liăn pê lo tung cheăng kâ dêi rơpŏng hngêi hên, châ hên luâ tâ to lâi hdrôh tâng vâ pơchông ƀă hdrối nah. Xuân ing mê, a ƀă vâi krâ nhŏng o tung pơlê nếo hlê tơdroăng pơ’lêh hdrê pêt gá môi tiah lâi nếo tơƀrê, djâ tơtroăng cheăng kâ rơpŏng hngêi mơnhông tơƀrê’’.

Tiô đảng viên Cil Pam Ka Duyên, Chi bộ thôn Dà Tro, vâ kuăn pơlê loi hlối khên tơnôu pơ’lêh tuăn tơchĕng tơmiât tung pêi cheăng kâ, pơ’lêh hdrê pêt, djâ pêt mâu hdrê ki nếo tung pêi cheăng kâ, mơdêk kơxô̆ liăn pê lo ăm tơrêm ngế  đảng viên  tung chi ƀô̆ thế cho ngế ki djâ troăng ahdrối. Ai ngế khât, tơdroăng cheăng khât mê tơdroăng hnê tối, mơhnhôk pêi pro tiô mâu troăng rơhlâ, luât dêi Đảng ƀă tơnêi têa pro pơxúa, kuăn pơlê nếo pêi ƀôi. Krê tơná a,  Cil Pam Ka Duyên hiăng mơjiâng túa pêt yâu ƀok vâ kuăn pơlê tung thôn tăng troh, hriâm ƀối.

“Drêng hiăng mot đảng viên, á ai tơ’nôm roh ki châ hriâm hlê nhên tâ mâu troăng rơhlâ dêi Đảng, Luât tơnêi têa. Kơnôm ing mê, a nếo pêi tro tơdroăng cheăng dêi Đảng ủy, ki  mâu kăn pơcháu. Ƀă xuân ing mê, á kum kuăn pơlê hên tâ. Mê cho, mơhnhôk kuăn pơlê pơhlêh hdrê pêt, mơ-eăm kơhnâ pêi cheăng, mơ-eăm pêt tơ’nôm hdrê loăng iâ khế vâ mơnhông cheăng kâ ăm rơpŏng hngêi. Nôkố tơdroăng rêh ối kuăn pơlê hdroâng kuăn ngo a kố hiăng kơdroh hên ki xơpá tâng vâ pơchông ƀă hdrối nah’’.

Ôh tá xê to thôn Dà Tro, hên đảng viên ki ê ối a mâu thôn, pơlê dêi cheăm Dà Nhim xuân hlê hnoăng cheăng pêi dêi tơná tung tơdroăng mơhnhôk pêi tung tŭm tơdroăng mơhno troăng a hdrối tung tŭm tơdroăng cheăng. Tung mê, tối troh mâu tơdroăng mơhnhôk tăng hên ngế pơ’lêh hdrê  pêt, kum dêi rơpó tung pêi cheăng, kơjo kum hâi pêi cheăng, dêi rơpó hâi pêi cheăng, hdrê loăng pêt, ngăn nêh hên túa, kum hdrê pêt, hnê kih thuâ̆t pêt rak ngăn… Kơnôm ing mê, pêi chiâk deăng Dà Nhim hiăng hên hdrê liăng plâi chôa lâng pêi chiâk tiô chêh inâi vâ rôe tơmeăm ƀă mơnhông ki pơxúa kế tơmeăm.

Ing tíu pêt to kơphế nah, troh nôkố, Dà Nhim hiăng po rơdâ châ 16 ha loăng pơkeăng Atiso, 6 ha yâu ƀok, 40 ha reăng vâ pôe tơkâng, 300 ha kơchâi prá tŭm túa ƀă lối 330 ha loăng plâi kâ. Tiô đảng viên Cil Pam Ka Phương, Chi ƀô̆ thôn Darahoa, cheăm Dà Nhim, vâ pêi châ tơƀrê hên tung pêi cheăng hnê tối, mơhnhôk cho ki xiâm “đảng viên ki prôk hdrối, kuăn pơlê nếo ƀối kơ’nâi’’ thế nhoăm ƀă pơtối rak vế:

“Ngin hnê tối, mohnhôk mâu rơpŏng kuăn pơlê mâu hdroâng kuăn ngo tung thôn tơmâng khât troh tơdroăng mơnhông cheăng kâ - rêh ối. Sap nah troh nôkố loăng plâi pêt ki xiâm dêi kuăn pơlê cho kơphế, nôkố hnê kuăn pơlê pơ’lêh hdrê pêt tiô kơ mơngế vâ rôe tơmeăm môi tia kơchâi ngiât, trŏng, prá tŭm túa’’.

Chôa lâng pơtối hmâ achê xúa kơmăi cheăng kâ tiô khoa hok kih thuât tung pêi chiâk tiô troăng rơhlâ xúa kơmăi ki dâi lĕm

Tơdrêng ƀă mơnhông cheăng kâ, hnoăng cheăng pêi ki xiâm djâ troăng a hdrối dêi rêm ngế đảng viên ối châ đảng ƀô̆ cheăm Dà Nhim tơmâng pêi pro khât tơbleăng tơƀrê tung hên kơvâ cheăng, tung mê thế tối troh mâu tơdroăng rơtế tơdjuôm ivá mơjiâng thôn pơlê nếo, kơdroh kơklêa xăm kơtiê krá tơniăn, pơtối rak ki môi tuăn tơrŭm dêi rơpó hdroâng kuăn ngo, mơjiâng khu cheăng kal kí krá rơdêi.

Pôa Kon Sơ Ha Vương, Kăn hnê ngăn Măt trâ̆n tơnêi têa cheăm Dà Nhim ăm ‘nâi,  xua tơdroăng kố hiăng kum Dà Nhim rĕng hluăn hrâ mơnguâ xăm kơtiê, mơnhông chiâng cheăm châ mơnhên tối  thôn pơlê nếo ƀă dế mơjiâng  vâ chiâng cheăm thôn pơlê nếo mơdêk tơƀrê.

“Pêi pro tiô troăng rơhlâ dêi Đảng, Luât tơnêi têa, pơla hdrối kố nah, Đảng ủy, mâu kăn hiăng hnê ăm kuăn pơlê pêi tro tơdroăng mơjiâng thôn pơlê nếo. Ƀă tơdroăng pơkâ tơnêi têa ƀă kuăn pơlê rơtế pêi, hên tơmeăm khoăng troăng prôk, kông, troăng cho mơ’no têa hiăng châ mơjiâng pro lĕm. Tơdrêng ƀă cheăng kâ tơniăn, tơdroăng rêh ối tơmeăm khoăng ƀă mơ-eăm dêi kuăn pơlê hiăng châ mơnhông tơƀrê hên’’.

Kơnôm pơtối rak pêi pro hnoăng cheăng đảng viên tung khu djâ troăng ahdrối, hnê kuăn pơlê pêi pro tiô pơkâ tơƀrê mâu tơdroăng cheăng xua kong pơlê mohnhôk, cheăng kâ rêh ối dêi cheăm Dà Nhim, tơring Lạc Dương, kong pơlê Lâm Đồng pơtối mơnhông tơƀrê rêm hâi.