Kơxo lơ 16/5, a Quảng Bình, Khu xiâm pơkuâ Đoân Droh rơtăm Kŏng san Hồ Chí Minh ƀă Khu Droh rơtăm hneăng hdrối nah djâ troăng ahdrối Việt Nam pơxiâm po Mơđah tơbleăng um, mơ-éa chêh tơdroăng tơplâ roh ton nah dó inâi ‘’Hâk tơngăm Trường Sơn’’. Veăng mơđah tơbleăng ai kơdrâm mô đô̆i hneăng hdrối nah, droh rơtăm hneăng hdrối nah djâ troăng ahdrối, kăn ƀô̆ Đoân Droh rơtăm mâu kong pơlê Nghệ An, Hà Tĩnh, Quảng Bình, Quảng Trị, Thừa Thiên Huế, Quảng Nam, Dak Lak, Gia Lai, Kon Tum, Dak Nông ƀă Bình Phước.

Mơđah tơbleăng 200 kơtâ um, mơ-éa chêh vêh mơhno hên hĭn, khât ‘nâng roh tơplâ xâ mê nah, tơplâ râ ó a Trường Sơn; tơbleăng mâu tơdroăng châ tơbrê dêi khu droh rơtăm djâ troăng ahdrối tung hneăng nếo.

.A Gia Lai, kơxo hâi lơ 16/5, Khu hmâ pêi pro tơdroăng lĕm tro ton nah Mô đô̆i Trường Sơn pơlê kong kơdrâm Plei Ku, kong pơlê Gia Lai tơkŭm po leh tơbâ 65 hơnăm Hâi hmâ pêi pro tơdroăng ki lĕm ton nah dêi Mố đô̆i Trường Sơn. A rôh trâm mâ, mâu kăn hiăng rơtế ƀă dêi rơpó tơbâ tơdroăng  tơplâ ton nah dêi Mố đô̆i Trường Sơn. Troăng Trường Sơn- troăng Hồ Chí Minh ai pơxúa kal khât ‘nâng ƀă tơdroăng kum chơ chiân tơmeăm ƀă ivá mơngế, ivá dêi ing mâu ngế veăng kum ai hnoăng kân ‘nâng ăm tơdroăng chiân tơmeăm răng pháu tung tơdroăng plâ xâ Mih tŏng xo tơnêi têa, pro tơleăng lĕm peăng Hdroh, lâp tơnêi têa tơrŭm chiâng môi.

Nôkố, troăng kân Hồ Chí Minh cho môi tung mâu troăng xiâm ki tơkâ luâ 28 to kong pơlê, pơlê kong kân, tung mê ai pơlê kong kơdrâm Plei ku, kong pơlê Gia Lai, veăng ‘no hnoăng mơnhông cheăng kâ rêh ối dêi kong pơlê. Khu pêi pro tơdroăng lĕm Mố đô̆i Trường Sơn pơlê kong kơdrâm Plei Ku nôkố ai 87 ngế, ki hên to mâu ngế mố đô̆i tro rong nah, mâu ngế tro trếo ‘mêi rôh tơplâ nah. Mơhé hên kơxô̆ ki mê hơnăm hiăng krâ, ivá pá kâi hro la mâu ngế lêng Mố đô̆i Pôa Hồ kơhnâ pêi cheăng mơnhông tơƀrê dêi rơpŏng hngêi.