Kơxo hâi lơ 16/5, a tíu pêi cheăng xiâm Đảng, xua pôa Nguyễn Phú Trọng - Kăn pơkuâ hnê ngăn Đảng, Khu kăn xiâm Hneăng má 13 pơxiâm Hôp rôh má  tơchên. A Hneăng hôp drêng kố, Khu kăn tíu xiâm kố tơpui ‘na mâu tơdroăng kal: Kố cho mâu tơdroăng chêh vâ pơtroh a hneăng hôp má 14 dêi Đảng; hbrâ tơdroăng hnê mơhno vâ po hneăng hôp Đảng ƀô̆ rêm râ  vâ troh Hneăng hôp má 14 dêi Đảng ƀă mâu tơdroăng kal ki ê.  

Tơbleăng pơxiâm hôp, pôa Nguyễn Phú Trọng, Kăn xiam pơkuâ hnê ngăn Đảng tối nhên: Tiô pơkâ, Hneăng hôp mâu kăn tung lâp tơnêi têa má 14 dêi Đảng kô po a poăng hơnăm 2026, klêi kơ’nâi pơ’lăng môi hneăng 5 hơnăm tâi tâng Đảng, tâi tâng kuăn pơlê, tâi tâng mâu lêng pin hiăng mơ-eăm pêi pro tiô Pơkâ Hneăng hôp má 13 dêi Đảng.

Tơdroăng kal dêi hneăng Hôp tíu xiâm tơnêi têa rôh kố ai pơxúa ƀă kal khât, pôa Nguyễn Phú Trọng, Kăn xiâm pơkuâ hnê ngăn Đảng pơkâ thế, Tíu xiâm ƀă mâu kăn veăng hôp pơtối rak ki rơkê, ai hnoăng cheăng pêi, tơkŭm tăng ‘nâi plĕng, tơpui nhên, ăm hnê tối tâi tâng mâu tơdroăng tối tơbleăng, tơdroăng tơkêa bro ƀă séa ngăn, pơkâ a rôh má mơ’nui hneăng hôp.