Tơbleăng dêi Chin phuh tối nhên: hơnăm 2023, mơ’no liăn ngân tơnêi têa châ 2 rơpâu 109 rơtal liăn. Tơdroăng pơkuâ mơ’no liăn ngân tơnêi têa châ pêi pro hbrâ, krá tơniăn tiô tối hdrối, tơniăn tro troăng hơlâ, troăng ki mơhá, thế kơdĭng đi đo, kơdroh mâu hnoăng cheăng mơ’no tá hâi kal khât, hrá pêi pro. Tâi tâng kơxô̆ liăn kơdĭng, liăn tơnêi têa hơnăm 2023 cho 83 rơtal liăn.

Xuân tung hâi lơ 15/5, Viƀan pơkuâ Kuô̆k hô̆i tơpui ‘na tơdroăng hbrâ Hneăng hôp má 7 ƀă mơgêi Hneăng hôp ôh tá tối hdrối roh má 7; Tơpui ‘na tơbleăng tơdroăng châ tơƀrê séa ngăn tơdroăng tơleăng, tiâ rơkong pâ thế dêi kuăn pơlê pơtroh troh Hneăng hôp má 6, Kuô̆k hô̆i hneăng má 15; séa ngăn tơbleăng tơdroăng kuăn pơlê pâ thế dêi Kuô̆k hô̆i khế 4 hơnăm kố.