A roh tơdah, péa Ngế xiâm kheăn kơdeăn tơdroăng mơnhông tâi tâng ƀă păng ‘nâng dêi tơrŭm cheăng nhŏng o Việt Nam – Nhuk tung hên kơvâ cheăng, ki má môi cho tơdroăng mơdêk tơrŭm cheăng to chiâng khu tơrŭm tâi tâng xua hơniâp lĕm ƀă mơnhông châu Á ƀă tung lâp plâi tơnêi, rơtế tơdroăng tơkŭm po lối 500 tơdroăng leh tơbâ ki păng ‘nâng, kơnâ roh leh tơbâ 50 hơnăm mơjiâng tơrŭm tơpui kâ hơnăm 2023 pơla kố nah.

Tung la ngiâ, pôa Bùi Thanh Sơn pơkâ thế kong têa Nhuk thăm tơrŭm hnê mơjiâng mơngế pêi cheăng, ki má lối cho mâu ngế pêi cheăng ki rơkê, hnê mơjiâng kăn ƀô̆ râ cheăng ton xŏn, hnê mơjiâng cheăng pêi, mơdêk kơxô̆ hnoăng liăn hriâm rơkê ton xŏn ƀă iâ hâi, hnê tơpui nâl kong têa Nhuk ăm hok tro, sinh viên Việt Nam; tŏng kum Việt Nam mơjiâng mơngế pêi cheăng tung mâu kơvâ cheăng nếo môi tiah pơhlêh xúa kŏng ngê̆, pơhlêh pêi cheăng krúa lĕm, hnê mơjiâng mâu ngế rơkê kơvâ pro kế tơmeăm chiâng mơ’no hrik hyôh môi tiah tơdroăng kal nôkố.