Kơpong kong a pơlê Nhọt ối a kĭng troăng kân 37, ai ƀăng tơnêi vâ chê 200 hectar, châ mơjiâng bro ing 2 to ngo tâ tá, plâ hơnăm hyôh kong prâi rơngiâp lĕm. Hơnăm 1954, tung rôh lăm prôk ing Nghĩa Lộ (kong pơlê Yên Bái) tâk troh Điện Biên veăng tung rôh tơplâ Điện Biên Phủ, Đăi tươ̆ng Võ Nguyên Giáp ƀă Khu lêng tơleăng lĕm hiăng pơtê chêng, pro đông akố, mê ing mê, kơpong kố châ kuăn pơlê khĕn ƀă inâi pâ hâk vâ cho “Kong Đăi tươ̆ng Võ Nguyên Giáp”.

Ôh ti môi tiah mâu kơpong kong ki ê ki hên bu ai to loăng, kơxái hếo, kong Đăi tươ̆ng Võ Nguyên Giáp xuân ối lĕm môi tiah hmâ mâu xiâm loăng ki kâ kân to lâi ngế muâ ôh tá troh, rơtế amê cho mâu loăng kơlêa, hré, pơmu tơdrăng lĕm, xŏn kân troh a ‘ngêi.

7 chât hơnăm hdrối, kong ki kố xuân ối drêh ngiât lĕm, môi tiah vâ mơhno tối hiâm mơno pâ nhuô̆m dêi mâu kuăn pơlê mâu hdroâng kuăn ngo a tíu kố kơ Đăi tươ̆ng Võ Nguyên Giáp rơtế ƀă khu lêng hơnăm ki mê nah. Pôa Lò Văn Linh, Ngế pơkuâ pơlê, Tôh trương tôh pơkuâ ngăn rak vế kong pơlê Nhọt, cheăm Gia Phù tối:

“Á hâk tơngăm khât châ veăng tung Tôh pơkuâ ngăn rak vế kong Đăi tươ̆ng Võ Nguyên Giáp. Ngin hmâ hnê tối đi đo ăm vâi krâ nhŏng o, vâ mâu rơxông kơ’nâi pơtối pơkuâ ngăn ƀă rak vế kong kố đi đo. Peăng ‘na ngin, rêm măng tĭng lăm pơtrui ngăn kong 3 xôh vâ hbrâ mơdât on chếo ƀă hbrâ mơdât kuăn pơlê tung pơlê tơkoh kĭng mot tung kố xo hdréa, ing mê rak vế kong châ pêi pro tro tâ”.

Pôa Đinh Công Són a cheăm Hia Phù klêi kơ’nâi vâ chê 30 hơnăm veăng tung Tôh rak vế “Kong Đăi tươ̆ng Võ Nguyên Giáp” nôkố hiăng châ hơ’lêh pơkuâ tơdroăng cheăng ki rak ngăn Tíu xối tơbâ Đăi tươ̆ng a kơpong tíu tơbâ kố. Pôa ăm ‘nâi, maluâ hơnăm hiăng hên, la pôa kô pơtối tá hiâm mơno rơtế ƀă vâi krâ nhŏng o rak ngăn, Tíu tơbâ ƀă Kơpong tơbâ kố vâ châ rak vế đi đo ngiât lĕm.

 “Á hâk tơngăm khât ƀă đi đo hnê tối ăm rơxông hơnăm ối nếo, malối cho hrok tro mâu hngêi trung, đoân viên droh rơtăm drêng troh a Tíu xối tơbâ kố. Á xuân tơbleăng ăm mâu vâi muăn ƀă hnê tối ‘na tơdroăng ton nah khên tơnôu ki pâ pôa pin ‘măn chôu. Châ rak vế tíu xối tơbâ rêm hâi, trêng têa, têk nhăng ăm mâu vâi meh cho tơdroăng ki hơniâp ro dêi tơná á, á hlo phiu ro”.

Chôu vế tíu ton nah tro inâi hơnăm dêi Đăi tươ̆ng, hơnăm 2008, Vi ƀan hnê ngăn kong pơlê Sơn La hiăng mơnhên kơpong kong Đăi tươ̆ng Võ Nguyên Giáp cho tíu tơbâ ton nah râ kong pơlê. Troh hơnăm 2020, kong pơlê Sơn La hăng pơcháu tơring Phù Yên tơbleăng, pê pro tơdroăng tơkêa ‘mêng rơnêu, ƀă mơdêk ki kơnía Tíu tơplâ xâ Pơhlăng kơpong kong pơlê Nhọt krá tơniăn, tro ƀă mơnhông ôm hyô dêi Sơn La tối tơdjuôm, tơring Phù Yên tối krê, pro tíu troh tung rôh lăm tơkŭm khôp a tíu tơplâ ton nah, pêi pro tơdroăng “Khoh niân tiah hâi kố kơnôm ai hnoăng vâi krâ nah dêi hdroâng mơngế”.

Mơ’nui hơnăm 2021, tơring Phù Yên hiăng pro klêi kế ki rak vế kong, ‘mêng rơnêu, ‘mâi bro ƀă mơdêk ki kơnía dêi tíu tơplâ xâ Pơhlăng kơpong kong pơlê Nhọt mê cho mâu Hngêi tơbâ Đăi tươ̆ng Võ Nguyên Giáp; plông tíu xối tơbâ, plông ki vâ pơxiâm rơkâu pâ, kông tâ tá, bo cheăng tâ tá tơnêi tơníu ƀă hên ki ê.

Troh a tíu kố, kuăn pơlê, tơmối ôh ti xê châ rêh ối tung tơdroăng ki hâk tơngăm dêi Khu lêng tơleăng lĕm lăm troh Điện Biên Phủ veăng tung rôh tơplâ Điện Biên Phủ hơnăm ki lâi, mê ối châ veăng tung tơdroăng ki ‘mâi hơtĭng, rơngiâp lĕm dêi Kơpong tíu xối tơbâ Đăi tươ̆ng Võ Nguyên Giáp. Nâ Nguyễn Thị Hồng Hạnh a tơring Phù Yên (Sơn La) tối:

“Cho rơxông hơnăm ối nếo kot mâ tung chal ki hiăng châ hơniâp lĕm, tơná á hlo phiu ro ƀă hâk tơngăm khât, á hlo tơná kal athế cho môi ngế ki hnê tối kơhnâ tâ nếo, vâ bro tơdjâk mâu tơdroăng ki kơnía git dêi tíu ôm hyô troh ƀă tơmối tung ƀă mâu tơring ki ê”.

Tíu tơplâ xâ Pơhlăng kơpong kong pơlê Nhọt ƀă Tíu xối tơbâ Đăi tươ̆ng Võ Nguyên Giáp cho mâu tíu xối tơbâ ton mah lĕm tro kơnía hiâm mơno, hnê pơchân mâu rơxông hâi kố ‘na mâu hnoăng cheăng ki pleăng, hlâ rêh dêi pâ pôa xua vâ tơniăn krê dêi tơnêi têa. Mâu hnoăng ki khên tơnôu dêi Đăi tươ̆ng Võ Nguyên Giáp rơtế ƀă khu lêng Điện Biên Phủ hơnăm ki mê nah kô ối rêh đi đo, môi tiah kong đi đo ngiât lĕm krâ inâi Đăi tươ̆ng hiăng ƀă dế châ rak vế, rak ngăn ƀă hiâm mơno pâ kơnía má môi dêi kuăn pơlê a tíu kố.