Cho môi tung 5 tíu lăm troh tơleăng lĕm Sài Gòn, Kuân đoân 3 ƀă hnoăng cheăng tơbriât xo Tơraih tơƀai Tân Sơn Nhất ƀă Khu kăn xiâm tí tăng ‘nâi plĕng – tíu xiâm pơkuâ dêi xâ. Vâ tơbriât rak pơkuâ mâu tíu ki kal kố klăng a hâi lơ 30/4, Kuân đoân hiăng ai mâu tơdroăng tơplâ ki rơkê, ƀĕng ƀeăn ƀă kơtăng.

Trung tươ̆ng Nguyễn Quốc Thước drêng mê nah bro kăn pơkuâ tí tăng ‘nâi plĕng Kuân đoân 3, ngế ki pơkuâ djâ môi tíu lăm troh Sài Gòn hăng tối mâu tơdroăng tơbâ ki xơpá vâ ôh tá la lâi kâi piu tung hâi tơleăng lĕm:

“Tơraih tơƀai Tân Sơn Nhất ƀă Khu xiâm tíu tăng ‘nâi plĕng hiăng châ tơleăng lĕm tâi tâng a 11 chôu 30 phut. Tiah mê ing 11 chôu 30 phut tá 5 tíu Sài Gòn pơrá châ tơleăng rơtế môi xôh. Tơdroăng ki phoih ƀriê kân má môi, klêi kơ’nâi châ tơbriât xo Dinh Độc Lập, tơleăng lĕm rôh ki mê nah vêh tung hiâm mơno ngin hâk tơngăm khât, la môi tơdroăng, ôh ti ai Pôa Hồ. Rôh ki ngin khŏm plâ ƀlêi trâng xâ Mih, Pôa Hồ dế tamo râ, Pôa tối tiah kố: pó mâu vâi tăm mơ-eăm rĕng tơleăng Sài Gòn vâ Pôa châ pôu ngăn vâ nhŏng o peăng Hdroh pin châ môi klêa môi kliâm ƀă hên ki ê. Kơxo má hâi kơ’nâi tung Rơ’jiu Việt Nam mơ’no ƀai hơdruê dêi pôa Phạm Tuyên ““Như có Bác Hồ trong ngày vui đại thắng”, rôh ki mê tuăn hiâm ngin nếo tơniăn, Pôa Hồ lăm troh akố, kuăn pơlê peăng Kơnhŏng ing ngế ki chêh ƀai hơdruê hiăng tơdah Pôa mot ƀă ngin, roh ki mê nah hiăng ối chôu vế hlo tung hiâm mơno, xua tơnêi têa hiăng tơniăn lĕm”.

Vâ chê 50 hơnăm hiăng hluâ sap ing hâi tơleăng lĕm peăng Hdroh tơnêi têa môi tuăn tơnêi têa, mâu tơdroăng ki tơbâ hâi khu lêng tơleăng mot tơleăng Sài Gòn xuân ối môi tiah ối nếo tung hiâm mơno mơngế ki châ hlo. Hâk tơngăm tung khu chêh hlá tơbeăng Việt Nam apoăng ai mâ a Dinh Độc Lập troh a kơhâi dế hâi lơ 30/4/1975, ngế chêh hlá tơbeăng tíu tơplâ xâ Trần Mai Hưởng, Kăn pơkuâ xiâm Thŏng tâ̆n xah Việt Nam hiăng xup um mơhno ki ƀlêi trâng ƀă dó inâi: ‘’Rơxế kom ƀa tơleăng lĕm mot a Dinh Độc Lập kơhâi dế 30/4/1975’’ ƀă hên hlá tơbeăng ‘na hâi tơleăng lĕm mơnhông tơtêk.

Ngế chêh hlá tơbeăng Trần Mai Hưởng tối ăm ‘nâi, rơxế kom ƀa drêng rơxế com măng ca pơto khu chêh hlá tơbeăng mot a pơlê kong kơdrâm mâu ‘mrâm pháu dêi khu lêng kong têa ê xuân pơtối pĕng, toăng rơxế pơto mâu ngế chêh hlá tơbeăng thế prôk achê a rơxế kom ƀa vâ ví ‘mrâm pháu lêng kong têa ê. Laga mot troh pơlê kong kơdrâm cho môi tíu ki ê, kuăn pơlê phiu ro lo a troăng kân koh tơdah khu lêng tơleăng lĕm:

“Kuăn pơlê phiu ro ‘nâng, diâp kơxuô tơmeăm ƀă djâ têa ôu ăm nhŏng o ƀă tơpui têi cho: hiăng tơleăng, hiăng châ tơleăng. Kuăn pơlê péa pâ troăng kân kuâ râng mô đô̆i, rŭp kŏng tó ro ƀă hơdruê. Hơdruê mâu tơdroăng hơdruê “Tiến về Hà Nội” dêi Văn Cao mê ai chêh: ‘’Trùng trùng quân đi như sóng, lớp lớp đoàn quân tiến về’’. Tơdroăng chêh mê cho troh ƀă drêng mê. Rêm ngế hơdruê tơdroăng hơdruê mê cho phiu ro, vâi mơhno troăng kum ăm ngin mot amê’’.