Cheăm Dak Nia, pơlê kong kơdrâm Gia Nghĩa, kong pơlê Dak Nông cho tíu ki rêh ối ton dêi vâi krâ nhŏng o mơngế M’Nông. Tung mâu rôh tơplâ, vâi krâ nhŏng o đi đo môi hiâm mơno tiô kăch măng, loi tiô Đảng. Cheăm Dak Nia xuân cho tíu ki hdró tơdroăng ki pro troăng Hồ Chí Minh.

A 16 chôu hâi lơ 30/10/1960, a cheăm Dak Nia, Đoân B90 a peăng Kơnhŏng ƀă Đoân C200 a peăng Hdroh hiăng châ tơpui tơbleăng ăm dêi rơpó, tơdjêp péa kơpong Tây Nguyên ƀă Đông Nam Bộ, po troăng Hồ Chí Minh, rak tơniăn tơdroăng ki tŏng kum mâu tơdroăng dêi peăng Kơnhŏng ăm tíu tơplâ peăng Hdroh tung rôh tơplâ tơleăng lĕm peăng Hdroh, pro tơnêi têa tơrŭm chiâng môi. Tíu ki péa Khu B90 ƀă C200 trâm dêi pó nôkố hiăng châ Chin phuh pơxá Tíu xối tơbâ tơnêi têa ki tơviah. Pôa Ksra, Kăn hnê ngăn Măt trâ̆n Tơnêi têa cheăm Dak Nia, pơlê kong kơdrâm Gia Nghĩa, kong pơlê Dak Nông tối:

“Tung mâu rôh tơplâ, ƀă mâu kuăn pơlê hdroâng kuăn ngo akố đi đo loi tiô Đảng. Mê troh nôkố, vâi krâ nhŏng o xuân ối đi đo loi tung troăng hơlâ pơkâ dêi Đảng, luât dêi Tơnêi têa, đi đo tơrŭm vâ rak vế hơniâp lĕm nôkố ƀă đi đo tơrŭm kân vâ mơjiâng cheăng kâ rế hía rế mơ-eăm, tơdroăng rêh ối rế hía rế châ mơdêk, mơnhông vâ kuăn pơlê kro, tơnêi têa rơdêi. Mâu rơxông ki hiăng prôk hdrối xuân đi đo hnê hriâm ăm mâu rơxông hơnăm ối nếo ‘na khôi hmâ kăch măng khên tơnôu”.

Tung tơdroăng lâp tơnêi têa phiu ro leh tơbâ 49 hơnăm tơleăng lĕm peăng Hdroh tơnêi têa, mô đô̆i hneăng hdrối nah Y Joan Niê (hdroâng kuăn ngo Rơđế) ối a ƀuôn Alê A, bêng Ea Tam, pơlê kong kơdrâm Ƀuôn Ma Thuột, kong pơlê Dak Lak vêh tơmiât ‘na mâu tơdroăng ki rơdêi tơnôu dêi hdroâng kuăn ngo. Pôa tối, drêng mê pôa nếo phô̆m xông kân, châ pâ ăm prôk tiô pôu chêa tâ tơmeăm kâ, pơkeăng pơlât... ăm mô đô̆i. Pôa hơ’muăn ‘na tơdroăng ton nah châ trâm Khu lêng tơleăng lĕm ƀă châ phiu ro hâi môi tuăn tơnêi têa:

“Drêng tơleăng lĕm Ƀuôn Ma Thuột ƀlêi trâng tơplâ a Tây Nguyên cho apoăng khế 3/1975, á drêng mê nah nếo 14 – 15 hơnăm tê. Pâ á hmâ ăm prôk tiô pôu pơkeăng, phái, alâi, pôm, hơ’nêh khăng, kơchâi kong... troh mâu kơpong Khu lêng tơleăng lĕm pro lêng a pơlê kong krâm Ƀuôn Ma Thuột ton nah diâp ăm mô đô̆i. Mô đô̆i drêng mê nah pá puât xua ôh tá bê tơmeăm kâ, pơkeăng, hên ngế tro tơngê, xua mê drêng kuăn pơlê troh veăng kum vâi phiu ro ‘nâng. Vâi tối ƀă kuăn pơlê, châ pơkuâ Tây Nguyên cho châ tơleăng lĕm peăng Hdroh. Dâng 2 măng tĭng kơ’nâi, mê cho hâi lơ 30/4, rêm ngế a ƀuôn Alê A tơdah châ tối Khu lêng tơleăng lĕm hiăng châ pơkuâ Dinh Độc Lập a drêng 10h45’, tơleăng lĕm Sài Gòn’’.