Akố kŏng ti Lực Thiêm, cho kơpong hngêi kơmăi Tân An, pơlê kong kơdrâm Ƀuôn Ma Thuột, tơdroăng cheăng pêi akố hên, nâ H’Lyna Ayun, kŏng nhân tối, sap apoăng hơnăm troh nôkố hên tíu tung kong ti xo hên tơmeăm, liăn khế mơhá xuân tâk hên, mê tơdroăng rêh kâ ối chia ro há.

“Kŏng ti ƀă kong đoân dêi kŏng ti hiăng rơtế dêi rơpó tơmâng khât tơdroăng ăm mâu ngế pêi cheăng mê liăn mơhá tơ’mi môi khế kâ liăn hlối hbru tơmeăm ăm mâu ngế ai hnoăng. Púi vâ kong ti kô mơnhông tâ vâ ai liăn kâ ƀă liăn mơnhá chía hên iâ’’.

A kơpong hngêi kơmăi Hòa Phú, pơlê kong kơdrâm Ƀuôn Ma Thuột, lối 2.400 ngế kong nhân xuân tơ’noăng dêi rơpó pêi cheăng. Tung pơla hdrối kố nah, tơdroăng tơ’noăng pêi cheăng pơtối rak hriăn plĕng ki nếo, pơ’lêh nếo kih thuât xua rêm râ kong đoân mơhnhôk tơ’mot hên ngê kong nhân mâu khu mơdró veăng pêi. Hên tơdroăng hriăn plĕng ki pơxúa hiăng pơ’lêh tơƀrê tơdroăng cheăng, ‘nâi kơdĭng tơmeăm ƀă pêi tro tiô tơdroăng púi vâ pơ’lêh nếo ‘na kơmăi kơmok pêi cheăng.

Ki malối cho 2 tơdroăng hriăn plĕng kih thuât pro kế hlŭm ô-xy ăm hngêi kơmăi pro meăm thep ƀă hrik têa kơdroh tô ó pro, túa pong cho dêi kong nhân Lê Trung Hiếu hriăn pro, pơkuâ ‘na kih thuât ngăn on tơhrik – tíu hngêi kơmăi ki mơjiâng pro tơmeăm dêi Kong ti veăng tơlo liăn pro meăm thép ASEAN, kum kơdĭng hnoăng mơngế pêi vâ tối  mơngế pêi iâ, ôh tá mơ’no on tơhrik hên ƀă kơdroh ki ôh tá mơhúa tung pơla pêi cheăng. Ngoh Lê Trung Hiếu  ăm ‘nâi:

“Drêng mot pêi cheăng akố châ hriâm hên tơdroăng cheăng pin thăm rế rơkê. Ing mâu tơdroăng hriâm cheăng hriâm chôu pâ tung tuăn mê pin nếo hriăn tơmiât pro tiah mê. Drêng hiăng tơƀrê mâu hnoăng ki pin hrian pro mê hiăng pro ăm pin tâ hniâp ro tung hiâm mơno. Pin tâ môi tiah pin hiăng châ kum mâu nhŏng o pú hmâ tung tơdroăng cheăng pêi tơ’lêi hlâu tâ,, tơniăn há ’na ivá pêi cheăng’’.

Jâ Lê Thị Tuyết Hạ, Kăn hnê ngăn kong đoân Kong ti veăng tơlo liăn Meăm thep ASEAN ăm ‘nâi, kong ti đi đo tơmâng pro tơ’lêi hlâu vâ mơngế pêi pêi cheăng tơniăn ƀă tơ’noăng mơdêk ki tơƀrê tung pêi cheăng.

“Tơdroăng cheăng dêi hngêi kơmăi kố ki hên cho pêi cheăng ƀă kơmăi kơmok đi đo kal thế pơ’lêh nếo. Hngêi kơmăi đi đo tơbleăng tơdroăng pơkâ pêi ăm mơngế pêi cheăng vâ mơ-eăm, đi đo ai pơkâ troăng rơhlâ pơkâ pêi pin cho môi rơpŏng hngêi mê ki tơbrê châ xoăng ing mê xuân pro xiâm ăm mơngế pêi cheăng mơ-eăm cheăng drêng mâu ngế ƀă khu pú hên pêi cheăng lo tơƀrê’’.

Pôa Trương Hồ Anh Hoàng, Kăn phŏ rak ngăn kơpong hngêi kơmăi kong pơlê Dak Lak ăm ‘nâi, tơdroăng mơhnhôk tơ’noăng ‘’pêi cheăng rơkê, pêi cheăng ‘nâi hriăn tơdroăng nếo” rơtế ƀă hriâm ƀă pêi pro tio tuăn tơmiât, hiâm mơno, túa pêi cheăng Hồ Chí Minh hiăng tối nah ai hên tơmeăm khoăng, tuăn ngôa thế rơkế dêi mâu kong nhân ki pêi cheăng  tung  mâu kơ koan, tíu pêi cheăng, mâu khu mơdró ‘’.

“Tung la ngiâ, Khu rak ngăn mâu kơpong Hngêi kơmăi kong pơlê kô mơ-eăm tơrŭm ƀă mâu khu pêi cheăng, kơvâ cheăng hnê mơngế pêi cheăng, hnê mơngế ki xúa mơngế pêi cheăng kơhnâ pêi cheăng, malối cho tơbleăng hên tơdroăng tơ’noăng pêi cheăng ăm mơngế pêi cheăng’’.

Drêng tơdroăng pêi cheăng hiăng pơ’lêh, liăn pêi lo tâk há, mâu tơdroăng mơhá tŏng kum tơniăn kô kum mâu kŏng nhân, mâu kăn pơkuâ tíu pêi cheăng, mơngế pêi cheăng a Dak Lak hmiân tuăn rơtế ƀă tơdroăng cheăng pêi  kơhnâ tung pêi cheăng.

Tơbleăng mâu tơdroăng tơ’noăng pâ nhoăm tơnêi têa, kŏng đoân rêm râ dêi kong pơlê Dak Lak tơkŭm pêi mâu tơdroăng pơkâ tơ’noăng hơnăm 2024 rơtế ƀă mơhnhôk tơ’noăng ‘’Mơngế pêi cheăng rơkê, Hriăn plĕng ki nếo tung pêi cheăng‘’, ‘’Hriăn plĕng ki nếo tung pêi cheăng “Tăng ‘nâi plĕng rơkê, pêi cheăng ai pơxúa’’; mơhnhôk đoân viên, kŏng đoân, kŏng nhân, mâu ngế pêi cheăng ‘no ivá tơ’noăng dêi rơpó pêi cheăng châ tơƀrê Tơdroăng pơkâ 01 rơtuh tơdroăng hriăn plĕng ki nếo, tăng ‘nâi plĕng, xúa khoa hok, kơmăi kơmok, mơnhông tơƀrê tung pêi cheăng.

Tơdrêng amê, tơ’noăng tơkŭm pêi cheăng tơƀrê mâu tơdroăng cheăng tơmâng ai pơxúa ăm mâu đoân, mơngế pêi cheăng, tơmâng veăng kum teăm tơdrêng mâu ngế đoân viên, mơngế pêi cheăng ki xơpá; kĭ tơhrâ mâu tơdroăng ki pơxúa ăm mâu đoân viên, mâu tơdroăng cheăng pêi tơmâng troh tơdroăng rêh ối tơmeăm khoăng ƀă tuăn ngôa, xua vâ pro pơxúa ăm đoân viên, mơngế pêi cheăng.