Tơpui a rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, a rôh hôp kố, Vi ƀan pơkuâ Kuô̆k hô̆i ăm rơkong veăng tơpui, tơmâng xo, tơpui tối leăng, ‘mâi rơnêu 28 hlá mơ-éa luât, tơdroăng pơkâ hiăng châ tơpui tơno a Rôh má 1 dêi Hneăng hôp, tiô tối hdrối kô pơtroh ăm Kuô̆k hô̆i tơbleăng a Rôh má 2. Rôh hôp xuân ăm rơkong tơpui rôh apoăng ‘na mâu tơdroăng ki kal pơtroh ăm Kuô̆k hô̆i a Rôh má 2, mê cho: Luât ‘mâi pơhlêh, ‘mot tơ’nôm mâu tơdroăng dêi mâu luât tung kơvâ cheăng lêng; Pơkâ dêi Kuô̆k hô̆i ‘na tơdroăng ‘mâi pơhlêh lơ tah lôi troăng hơlâ rak ngăn liăn ngân, pêi lo liăn dêi mâu kơ koan, tíu pêi cheăng tơnêi têa; Tơdroăng pơkâ klâ xoăng tíu pêi cheăng râ kong pơlê hơnăm 2025. Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế:

“Tơrêm tơdroăng kal châ séa ngăn ôh ti xê to pêi pro klêi troăng hơlâ luât, mê ối veăng gum pro ivá nếo ăm tơdroăng mơnhông dêi tơnêi têa ƀă rak vế tơniăn tơdroăng pơkuâ rơkê dêi kơ koan cheăng tơnêi têa tung pơla tơdroăng nếo. Mâu kơ koan pơtroh, kơ koan séa ngăn ƀă mâu tíu pêi cheăng ki ai tơdjâk troh tơrŭm krá tơniăn, pêi pro nhên mâu tơdroăng kal ối ai hên rơkong tơpui, rak vế rêm hlá mơ-éa châ tơbleăng pơrá kâi tơmâng ƀă pêi pro tro ‘ló tung tơdroăng ai khât”.

A rôh hôp, mâu ngế cheăng tung Vi ƀan pơkuâ Kuô̆k hô̆i hiăng ăm rơkong tơpui tối ‘na kơxop mơéa Luât Tơrŭm khu kăn pơkuâ kong pơlê (‘mâi pơhlêh). Vi ƀan pơkuâ Kuô̆k hô̆i môi tuăn ƀă tơdroăng ki kal tơmâng xo, ‘mâi rơnêu dêi Chin phuh. Laga, pơkâ thế kal tơmiât nhên pơkâ Hô̆i đong hnê ngăn râ kong pơlê châ klâ xoăng râ ăm Vi ƀan hnê ngăn rơtế ƀă râ lơ Hô̆i đong hnê ngăn râ cheăm. Pôa Hoàng Thanh Tùng, Kăn pơkuâ Vi ƀan tơdroăng Luât ƀă cheăng pro hlá mơ-éa ‘na luât tối tiah kố:

“Hô̆i đong hnê ngăn kơ koan teăng mâ ăm hiâm mơno, tơdroăng púi vâ ƀă hnoăng pro ngế pơkuâ dêi Kuăn pơlê a kong pơlê. Xua mê, tơdroăng pơcháu mâu hnoăng cheăng, hnoăng pơkuâ mê luât kố pơkâ ối tung hnoăng pơkuâ, tơdroăng cheăng pôu râng dêi Hô̆i đong hnê ngăn ăm Vi ƀan hnê ngăn cho kơ koan cheăng tơnêi têa a kong pơlê cho ôh tá tơtro ƀă tíu pêi cheăng, kơvâ cheăng ƀă túa pêi cheăng dêi rêm kơ koan, chiâng tơdjâk troh tơdroăng cheăng chiâng pơhlêh hnoăng cheăng, hnoăng pơkuâ dêi kơ koan kuăn pơlê pôk a kong pơlê, ôh tá tro ƀă tơdroăng pơkâ tơrŭm khu kăn pơkuâ dêi tơnêi têa ai tơdroăng ki klâ xoăng, tơrŭm ƀă hbrâ mơdât hnoăng pơkuâ”.

Tơpui tối leăng ‘na tơdroăng kố, Ngế xiâm ngăn kong pơlê hnoăng cheăng dêi kăn ƀô̆ Phạm Thị Thanh Trà ăm ‘nâi:

“Ngin séa ngăn a mâu tíu pêi cheăng, má môi cho tíu pêi cheăng kal kí ƀă môi hiâm mơno pêi cheăng tiô troăng pơkâ dêi Khu pơkuâ ngăn Tơnêi têa, dêi Khu xiâm pơkuâ tơdroăng kal kí, tơkŭm pêi pro kơtăng vâ tơdroăng klâ xoăng râ xoăng hnoăng pơkuâ pơla Tơnêi têa ƀă kong pơlê ƀă pơla mâu rêm râ khu pơkuâ kong pơlê. Má péa, mê cho ai sap ing tơdroăng pơkâ thế ki ai khât athế pơhlêh sap ing troăng hơlâ pơkuâ ngăn ki tiah hmâ chiâng pơkuâ ngăn kong pơlê tiô túa tơdrăng tơniăn tơƀrê gum kuăn pơlê. Tâng môi tiah nôkố ôh tá po rơdâ châ troăng hơlâ dêi Hô̆i đong hnê ngăn mê gá kô xơpá khât”.

Tơpui a rôh hôp tơpui tơno, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế kơ koan chêh pro mơéa ƀă kơ koan séa ngăn pơtối séa ngăn, kơtăng vâ klâ xoăng râ, xoăng hnoăng, vâ xo ah hmôi drêng kơxop hlá mơ-éa luât châ Kuô̆k hô̆i tơbleăng, mâu kong pơlê pêi pro tơdrêng hlối:

“Á pơkâ thế pơtối séa ngăn ăm inhên. Sap ing nôkố troh Kuô̆k hô̆i tơbleăng ối ki klâi ki Chin phuh pơtối klâ xoăng ăm kong pơlê tung luât kố mê pin athế tơmiât nhên vâ xo ah hmôi drêng hiăng tơbleăng mê kong pơlê ôh tá tối ôh tá pêi xua tơvâ. Luât hriăn ngăn cho ai po pơcháu ăm Chin phuh pơkâ ôh tá phá ƀă Luât vâ pin tơbleăng pêi ăm kơ koan pêi cheăng”.

Xuân tung rôh hôp măng hdrối, Vi ƀan pơkuâ Kuô̆k hô̆i hiăng têk kŏng tơbleăng Luât ‘mâi pơhlêh Troăng 10 dêi Luât pơkâ Pơ’leăng mâ mơngế. Tiah mê, rêm ngế on veăng, ngế krê châ hnoăng pơkâ ‘na hâi khế rơnêh kuăn, kơxô̆ ngế kuăn vâ rơnêh ƀă kơtăn pơla mâu rôh rơneh ki pơtối ăm tơtro ƀă hơnăm, tơdroăng ivá, tơdroăng hriâm tâp, pêi cheăng, pêi lo liăn ƀă păn roăng kuăn dêi ngế krê, on veăng tung tơdroăng cho tơdâng tơ’mô.