Tiô mâu kăn, tơdroăng ki chêh pro ƀă pơkâ tơdroăng Pơkâ dêi Kuô̆k hô̆i ‘na ôh tá êa nâp xếo, tŏng gum liăn hriâm ƀă mâu vâi hdrêng mầm non, hok tro phôh thong, ngế hriâm yăo yuk phôh thong a mâu tíu hnê hriâm tung tơdroăng pơkuâ ngăn dêi hnê hriâm kuăn pơlê cho mơhno ăm tơdroăng ki pơtối tơmâng xo, pêi pro mâu rơkong tơpui tối Mơgêi dêi Khu xiâm pơkuâ tơdroăng kal kí, Pơkâ dêi Khu pơkuâ ngăn Tơnêi têa ‘na kơvâ cheăng hnê hriâm ƀă hnê mơjiâng tuăn ngoâ rơkê, gum rak vế tơniăn tơdroăng tŏng gum rêh kâ ối pơlê pơla, kơdroh pro pá cheăng kâ liăn ngân ăm mâu rơpŏng hngêi ki ai kuăn hriâm tung mâu tíu hnê hriâm sap ing mầm non troh trung hok phôh thong.

La tiah mê, mâu kăn xuân tôu tuăn ‘na tơdroăng ki hôm tơniăn ƀlêi há dêi mâu troăng tŏng gum, troăng pơkâ tŏng gum nhên tung kơxop hlá mơ-éa Pơkâ, tung mê ai tơdroăng liăn ngân pêi pro. Jâ Nguyễn Thị Lan, ngế ki lo ing pơlê kong kân Hà Nội veăng tơpui:

“Á xuân môi tuăn ƀă tơdroăng ki xoăng liăn ngân tơnêi têa. Laga mê kal mơnhên tối nhên tơdroăng ki tơdâng tơ’mô xoăng liăn dêi kong pơlê, malối cho mâu kong pơlê ki tá hâi xoăng liăn mê Chin phuh xuân kal athế riân ngăn hbru thiăn vâ rak tơniăn ai liăn ăm mâu kong pơlê kố vâ ví pôi tá ai tơdroăng ki troăng hơlâ tŏng gum gá tro la ôh tá ai tŭm liăn vâ xoăng mê tơdroăng pêi pro gá chiâng hrá lơ ôh tá tơ’mô”.

Pôa Siu Hương, ngế ki lo ing Gia Lai tối:

“Rêm to kong pơlê ai tơdroăng rêh ối phá dêi rơpó, môi tiah Gia Lai nôkố ai lối 60% cho liăn tơnêi têa xoăng ăm, mê á pâ thế kal ai pơkâ nhên tâ ‘na troăng hơlâ xing xoăng liăn sap ing liăn ngân tơnêi têa vâ pro tiah lâi tơdroăng ki liăn ngân tŏng gum tro dêi Đảng, Tơnêi têa pin châ pêi pro tiô túa ki tro má môi”.

Sap ing tơdroăng ki rơkê plĕng dêi kong pơlê hiăng pêi pro tro troăng hơlâ tŏng gum liăn hriâm ăm vâi hdrêng, hok tro sap ing mầm non troh lâm 12, pôa Trần Chí Cường, ngế ki lo ing Đà Nẵng tối tiah kố, troăng hơlâ tŏng gum athế tơ’mô, nhên, krâu:

“Ôh tá êa nâp liăn hriâm mê hngêi trung kông lâ̆p ai kơlo nâp gá tơ’lêi tâ, la nôkố pơkâ kơlo tŏng gum ăm hok tro ôh ti xê ối tung hngêi trung kông lâp mê kơlo tŏng gum xua Hô̆i đong hnê ngăn kuăn pơkâ pơkâ, xơpá ăm tơdroăng tŏng gum, kơlo môi tiah lâi xuân cho môi tơdroăng ki pá. Môi tiah Đà Nẵng hrê ing liăn tŏng gum ăm mâu hok tro ôh ti xê kông lâp cho ƀă kơlo liăn hriâm ki hok tro kông lâp châ gum, ôh tá tro phá. Tiah mê, gá ai môi kơlo tơdjuôm tơdâng tơ’mô ăm tơdroăng tơbleăng”.

‘Na troăng hơlâ ki ‘no mơhá, pôa Nguyễn Đại Thắng, ngế ki lo ing Hưng Yên pâ thế:

Băng: “Tung pơkâ ‘no mơdrếo tơdrêng ăm mâu ngế ki châ pơxúa. Tiô túa tơmiât dêi á mê athế hriăn ngăn chiâng vâ ‘no mơhá tơdrêng ing mâu tíu hnê hriâm gá tơtro tâ, pin chiâng vâ séa ngăn, hbrâ mơdât vâ pơchuât tơbleăng. La athế ai troăng hơlâ séa ngăn a mâu tíu hnê hriâm ki ai ngế ki châ tŏng gum mê. Môi cho ing mâu tíu hnê vâ ‘no mơhá tơdrêng ăm mâu vâi muăn. Péa cho athế tah hlối a liăn hriâm, tiah hmâ 10 liăn la liăn hriâm hiăng ôh tá êa nâp xếo 3 liăn mê bu athế nâp 7 liăn xo”.

Veăng tơpui tối ‘na Pơkâ hnê phôh kâ̆p yăo yuk mầm non ăm vâi hdrêng mauh yăo sap ing 3 troh 5 hơnăm, ai mâu ngế tối, a hơnăm ki kố, mâu vâi o tá hâi lăm a lâm ki xiâm cho hdrêng kơpong hngế hngo, kơpong malối xơpá. Tâng Pơkâ châ pơkâ kô gum rak vế tơniăn tơdâng tơ’mô tung tơdroăng ki châ hriâm ăm vâi o a mâu kơpong tung lâp tơnêi. Maluâ kal ‘no liăn pro hngêi trung hriâm, roê tơmeăm xúa, cô yăo ƀă hên ki ê la ngăn kố cho tơdroăng ki ‘no liăn pêi tơdroăng cheăng ki kal má môi dêi tơdroăng mơnhông, cho tơdroăng ki rĕng châ hriâm, tơdroăng ki ‘no liăn roê mâu kế tơmeăm khoăng rak ngăn trếo piê vâ pơkâ ivá ki kal, ki rơkê dâi lĕm pơ’leăng mâ mơngế xo ah hmôi.

Tiô pôa Phan Văn Mãi, ngế ki lo ing Pơlê kong kân Hồ Chí Minh, rơtế ƀă liăn ngân tơnêi têa, kal ai mâu troăng pơkâ mơhnhôk pơlê pơla veăng tơlo ăm kơvâ ki kố:

“Tơdroăng ‘na mơhnhôk pơlê pơla veăng tơlo liăn vâ mơnhông yăo yuk mầm non gá kal khât, tâng ôh mê gá kô cho tơdroăng ki pá ‘na liăn ngân. Pin kal hriăn ngăn ƀă ai mâu troăng hơlâ pêi pro tơ’lêi hlâu tâ, rơkê plĕng tâ vâ mơhnhôk pơlê pơla veăng tơlo liăn ‘no pêi cheăng. Pơtih môi tiah pin ai pơkâ tơdroăng pơcháu tơnêi ôh tá xo liăn lơ xo 0 liăn vâ pro mâu tíu hnê hriâm mầm non há lơ ôh”.