Kơsơ̆ 'năr tơdrou rim giĕng, đe pơmai oh lơ̆m jơnŭm jang đe drăkăn pơlei  H’Đing, xah Cư Dliê Mnông, apŭng Cư Mgar, dêh char Đăk Lăk akŏm hơtŭm dih băl chă pơ-'nguaih cham char hơrih xa. Hăm tơdrong hơdrin đơ̆ng pơmai oh, jăl trong mơ̆t truh pơlei rơgoh 'lơ̆ng, pơga hnam noh ƀenh kơ pơkao chôh, cham char roi năr roi rơgoh jơk 'lơ̆ng.

Pơmai H'Nhi Byă, tơ̆ pơlei H’Đing tơroi, rim unh hnam lơ̆m pơlei adoi pơkăp pơm kiơ̆ tơdrong vei rơgoh cham char hnam oei, ưh kơ đei rong kron kon tơrong tơjê̆ hăm anih oei xa păng hơnơ̆ng hơpuih sut rơgoh hnam oei mă bot 'lơ̆ng: “Hơdrin hơpuih rơgoh 'lơ̆ng tăp dăr hnam oei, atŭm dih băl chă hŏk hơlen, tơroi tơdrong hlôh vao gah vei rơgoh 'lơ̆ng cham char, vei răk tơƀăk mong joh ayŏ hơdrung hơdrĕch kon kông po”.

Vang jang kiơ̆ trong tơlĕch, atŭm hăm vei rơgoh cham char, đe pơmai oei hăt hot hơtŏk jang mŭk drăm, kơdih pơtăm 'nhot, hơmet jang dơ̆ng tơdrong tanh brai juăt jue. Pơmai H'Muôi Byă – Kơdră pơgơ̆r tơdrong jang “Unh hnam sơđơ̆ng, jơk, rơgoh 'lơ̆ng, um ai kơdih” tơ̆ pơlei H’Đing ăn tơbăt, đơ̆ng tơdrong jang âu tơgŭm đe pơmai oh tơplih đon tơchĕng, hăt hot vang jang kiơ̆ dôm tơchơ̆t gah “3 rơgoh”: “Tơlĕch rim tơdrong, rim tơchơ̆t jang păng rim bơngai hlôi kĭ pơkăp pơm jang trŏ nhen tơchơ̆t tơlĕch. Mă blŭng noh hơvơn kon pơlei pơjing cham char hơrih xa 'lơ̆ng, hơnơ̆ng hơpuih pơ-'nguaih hnam oei, var pơgar, hơmet hnam mă bot, rơgoh, akŏm rơ̆m rĕk mă trŏ, nĕ gan yua kơdŭng nilon. Mingman, pôk drĭ hơdrong kon tơrong hơtaih đơ̆ng hnam oei”.

“Unh hnam sơđơ̆ng, jơk, rơgoh 'lơ̆ng, um ai kơdih” jĭ minh lơ̆m dôm tơdrong jang kơyuơ đe drăkăn dêh char Đăk Lăk tơlĕch jang vă pơm kiơ̆ tơdrong hơvơn pơjing unh hnam “5 ưh 3 rơgoh”, “5 đei 3 rơgoh” kơyuơ Trung ương Jơnŭm jang đe drăkăn tơlĕch jang. Lơ̆m 3 sơnăm kơ âu, đe drăkăn Đăk Lăk hlôi tơlĕch jê̆ 1.000 tơdrong jang, akŏm lơ̆m dôm tơchơ̆t gah tơjur hin dơnuh, hnam oei, cham char păng trong nơnăm. Atŭm hăm noh, jơnŭm đe drăkăn lơ̆m dêh char oei tơgop kăp gĭt lơ̆m tơdrong jang pơm tơlĕch tơmam drăm rơgoh sơđơ̆ng. Nhen tơ̆ xah Quảng Hiệp, apŭng Cư Mgar, Jơnŭm jang đe drăkăn hlôi hơvơn dôm anih pơm tơlĕch tơmam drăm xa kĭ pơkăp vei rơgoh tơmam drăm xa păng pơtoi jang kiơ̆ pơgar 'nhot 'lơ̆ng sơđơ̆ng. Yă Võ Thị Trang, Kơdră Jơnŭm jang đe drăkăn xah Quảng Hiệp ăn tơbăt:  “Nhôn pơgơ̆r ăn 22 anih pơm jang, pơm tơlĕch tơmam xa kĭ pơkăp pơm kiơ̆ tơchơ̆t rơgoh 'lơ̆ng tơmam xa, pơtoi jang kiơ̆ 200 trong jang 'nhot sơđơ̆ng 'lơ̆ng, kiơ̆ đơ̆ng noh hơvơn bơngai jang đe drăkăn pơtăm 'nhot rơgoh 'lơ̆ng. Pơtoi jang kiơ̆ akŏm rơm rĕk vă Pơjing Jên mong tơgŭm đe drăkăn hin dơnuh tơ̆ Jơnŭm jang thôn Hiệp Hưng”.

Atŭm hăm dôm tơdrong jang hơdah, tơdrong jang "3 rơgoh" oei đei Jơnŭm jang đe drăkăn dêh char Đăk Lăk tơlĕch jang jơ̆p jang kiơ̆ dôm tơdrong tơroi tơbăt, hơvơn kon pơlei hơmet pơ-'lơ̆ng cham char hơrih xa. Kiơ̆ kơ yă Lê Thị Thu Hiền, Kơdră Jơnŭm jang đe drăkăn apŭng Cư Mgar, hăm tơring đei lơ hơdrung bơngai, tơdrong hlôh vao ưh đei hơtŏ hơnơ̆ng, jơnŭm jang đe drăkăn dôm jăl tơ̆ apŭng Cư Mgar hlôi chă tơroi kơtă, hơvơn pơm jang kơtă vă đe drăkăn lơ̆m jơnŭm jang ƀônh pơm kiơ̆: “Pơjing tơdrong jang, tơlĕch tơroi tơbăt truh rim unh hnam. Năm truh tơ̆ hnam đe drăkăn vang jang, mưh hnam đe sư tam mă rơgoh, tam mă bot noh nhôn athei pơtho ăn đe sư mă hơdah, ưh đei chă tơroi hăm ƀơ̆r đĕch ôh”

Tơdrong jang “3 rơgoh” hlôi đei tơmơ̆t lơ̆m tơchơ̆t 17.8 lơ̆m tơdrong tơchơ̆t jang kơ teh đak gah pơjing tơring tơrang 'nao, pơm hơdah dôm tơchơ̆t gah kơsô̆ unh hnam đei hnam hum, hnam pơyơ̆ng, tơmam mong đak sŏ nhă trŏ ƀlep păng vei sơđơ̆ng 3 rơgoh. Kiơ̆ đơ̆ng pơm kiơ̆ dôm tơdrong jang, lơ̆m 3 sơnăm kơ âu tơ̆ Đăk Lăk hlôi đei hloh 5.000 unh hnam drăkăn đei jơnei dôm tơchơ̆t tơlĕch. Yă Võ Thị Ngọc, Phŏ Kơdră Jơnŭm jang đe drăkăn dêh char Đăk Lăk ăn tơbăt: “Tơchơ̆t pơjao ăn Jơnŭm jang đe drăkăn chih măt iŏk jang tơdrong jang păng đei tơdrong pơgơ̆r, pơm trong hiôk đơ̆ng Anih jang vei lăng kon pơlei apŭng. Pơtih nhen tơlĕch chă tơroi pơtho păng tơgŭm dôm unh hnam man hnam pơyơ̆ng rơgoh 'lơ̆ng, trŏ hăm pơkăp “3 rơgoh” nhen tơchơ̆t tơlĕch mă Jơnŭm jang đe drăkăn pơtoi oei iŏk nơ̆r tơgop đơ̆ng rim anih jang vă pơtruh ăn Anih jang vei lăng kon pơlei dêh char”.

Kiơ̆ đơ̆ng tơdrong jang  “3 rơgoh”, drăkăn Đăk Lăk hlôi păng tŏk bŏk đei lơ tơgop kăp gĭt lơ̆m tơdrong jang pơjing tơring tơrang 'nao tơ̆ tơring. Dôm tơdrong jang hơdah đơ̆ng vei sơgaih cham char truh hơtŏk mŭk drăm kơjăp sơđơ̆ng, ưh hơdrô̆ pơm tơplih tơdrong hơrih mă oei tơgop pơjing minh tơpôl kơjăp kơtang, ƀenh kơ um ai joh ayŏ kơdih.