Hơtuch sơnăm, anih pơm jang kơ Kŏng ti Cổ phân găr sơlơ̆k Hải Bình Gai Lai, pơlei tơm Pleiku, dêh char Gia Lai hăt hot hơdrĕng găr sơlơ̆k 'măn tĕch ah Têt Nguyên đan. Ƀok Hoàng Văn Quang, tang măt ăn Kŏng ti ăn tơbăt, adoi găr sơlơ̆k juăt jue đơ̆ng dôm tơring pơtăm tơ̆ dêh char mă lei tơmam drăm kơ kŏng ti adoi đei pơkăp OCOP 4 sao, tŏk bŏk oei tŏk đei pơkăp 5 sao, 'noh gơnơm đei trong jang hơdrô̆: găr sơlơ̆k hơdrĕng hăm ngar 'long unh. Tơmam drăm juăt jue mă adoi oei kăp gĭt hlôi tơgŭm ăn kŏng ti pơih să tơring tĕch răt, lơ̆m teh đak păng tĕch ăn teh đak đe hloi:

“Anih jang mŭk drăm adoi đei lơ tơdrong hiôk. 'Noh jĭ tĕch ăn teh đak đe đei tơplih hơdah hloh pơtêng hăm dôm sơnăm hơdrol ki. Dôm teh đak tơ̆ tơring châu Âu păng dôm teh đak Đông nam Á nai adoi kơchăng chă pơih să tơring tĕch tơlĕch. Vă pơtrŏ hăm dôm tơchơ̆t tĕch ăn teh đak đe, anih jang adoi hơdrin pơm kiơ̆ tơchơ̆t pơkăp kơjung hloh, gơh hơgei hloh”

Truh đĭ sơnăm 2024, tơring Tây Nguyên hlôi đei hloh 1.300 tơmam drăm OCOP đei pơkăp đơ̆ng 3 truh 5 sao. Tơmam drăm OCOP Tây Nguyên ưh hơdrô̆ jĭ tơdrong akŏm đơ̆ng tơdrong pơm jang păng tơdrong gơh hơgei, mă oei jĭ tơdrong tơroi gah 'lơ̆ng hơ-iă kơ tơring teh ƀenh kơ um ai joh ayŏ, nhen tơmam drăm đei hơnăn "Trà hoa vàng", OCOP 3 sao kơ apŭng Krông Pach, dêh char Đak Lăk. Ƀok Nguyễn Ngọc Quỳnh, bơngai pơm tơlĕch tơmam drăm âu ăn tơbăt, ƀok hlôi mơ̆ng đei gah tơdrong kăp gĭt hăm hơdrĕch hla pơgang âu, noh ah băt đei tơ̆ bri Tây Nguyên adoi đei akŏm hla che pơkao dreng tơ̆ tơring, ƀok hlôi tơrĕk hơtŏk tơmam drăm âu. Đơ̆ng rŏng jê̆ 10 sơnăm pơtăm, ƀok hlôi đei  3.000 tơm lơ̆m hơgăt teh să 2 hectar, vă truh sơnăm iŏk yua păng pơm tơlĕch tơmam drăm. Ƀok Quỳnh tơroi:

"Inh ƀôh Việt Nam bơ̆n đei lơ tơmam choh pơtăm kăp gĭt, mă kăl noh dôm hơdrĕch hla 'long pơgang. Hăm đon bơnôh băt 'mêm kơ teh đak, inh hơpơi 'meh vei răk păng hơtŏk lơ hloh, atŭm hăm 'noh pơlan să truh kon pơlei tơ̆ tơring, chă hơvơn rim bơngai vei lăng dôm hơdrĕch 'long gĭt tơ̆ tơring, pơjing minh cham char 'lơ̆ng păng vei lăng tơring hơrih xa ăn kơdih po păng rim bơngai tăp dăr"

'Mêm băt, pơ-ư pơ-ang păng băt iŏk yua tơring teh ƀenh kơ um ai joh ayŏ, đei lơ mŭk drăm hơdrĕch 'long pơtăm, yă Lê Thùy Kim Loan, kơdră Kŏng ti Kôh phân Pyloherb tơ̆ dêh char Kon Tum hlôi đei hơpah hăm 15 tơmam đei iŏk pơkăp OCOP. Kiơ̆ kơ yă Lê Thùy Kim Loan, tôm tơmam drăm kơ kŏng ti adoi đei pơm tơlĕch đơ̆ng 'long pơgang đơ̆ng bri. Kon pơlei tơ̆ dôm thôn pơlei tơring groi kông kơ apŭng Kon Plông păng Đak Glei, dêh char Kon Tum jĭ dôm bơngai hơnơ̆ng asong dôm hơdrĕch 'long pơgang 'lơ̆ng vă pơm jang. Kơyuơ noh, rim tơmam drăm OCOP adoi đei tơgop đơ̆ng jơnŭm tơpôl:

"Tơchơ̆t OCOP jĭ minh tơdrong pơkăp ăn tơmam drăm kăp gĭt kơ tơring tơrang. Ah đei iŏk pơkăp OCOP, nhôn ƀôh tơmam drăm kơdih đei dôm tơdrong kăp gĭt kơdih, đơ̆ng kơchơ̆t pơgang lơ, tơmam pơm jang păng bơngai jang adoi đơ̆ng kơdih tơring teh âu. Tem OCOP asong tơ̆ dêh char Kon Tum hlôi sơkơ̆t hơdah tơmam drăm pơgang hla 'long kăp gĭt kơ tơring"

Đơ̆ng tơmam drăm pơtăm juăt jue hlôi đei, mă lei hăm đon băt, tơdrong pơ-ư pơ-ang kơ tơmam drăm pơlei pơla, rim kon pơlei Tây Nguyên hlôi gơh hơgei pơjing đei dôm tơmam drăm OCOP kăp gĭt ƀâu phu tru hŭt kơ tơring teh. Dôm tơdrong jang đei jơnei kơ rim xah minh tơmam drăm tơ̆ âu ăn ƀôh mŭk drăm tih tên kơ tơdrong tơguăt um ai joh ayŏ kơ tơring hăm đon tơplih 'nao. Tơdrong mă noh ưh hơdrô̆ tơgop hơtŏk tơdrong hơrih ăn kon pơlei, mă oei oei pơlan să tơdrong pơ-ư pơ-ang chơt hơ-iă kơ Tây Nguyên hăm mŭk drăm să seng.