Di bhum taneh Gia Định klak, hu 18 palei bein hala hu angan meng puac abap 19 saong dak hu angan jang nan lac bhum taneh anh hùng, trung kiên di bhap bini Bà Điểm dalam bruk khởi nghĩa Nam Kỳ. Dalam danak dak papar sap harei ini, kol dahlak likau payua tam mikva saong taong abih gauk dalikan ka bhum taneh Hóc Môn – Bà Điểm gam saong bruk sajarah dak rai di bruk khởi nghĩa 18 palei bein hala. Daa mikva saong taong abih gauk tui pang:

Meng kan, dalam baoh tapuk “Gia Định thành thông chí” hu ieu 18 palei bein hala tui akhar Hán lac Phù Lưu Viên  (makna lac bein hala) piah tacei miệt vườn Bà Điểm – Hóc Môn. Ala saman patao Minh Mạng (1820 - 1840), bhum taneh ini hu dom palei di tổng Dương Hòa Thượng, huyện Bình Dương, phủ Tân Bình, tỉnh Gia Ðịnh saong hadei thun 1945, 18 palei bein hala hu gam abih huyện Hóc Môn saong meneing quận 12 ban raya HCM harei ini.  

Bhum taneh ini daok di labik taneh glaong, bhap bini pala rilo paneing, hala, nyu lagaih saong taneh riya nan ye paneng hala tamuh siam. Urak ini pasak di 10 palei bein hala nan lac dom palei Tân Thới Nhứt, Tân Thới Nhì, Tân Thới Trung (urak ini lac xã Tân Xuân), Tân Thới Tam (urak ini lac xã Thới Tam Thôn). Eng palei Tân Thới Nhứt (urak ini lac xã Bà Ðiểm) lac sa dalam 6 palei akaok meti di 18 palei bein hala. Bruk dane angan abih di bhum taneh pambuak saong angan 18 palei bein hala, lac hatai anit ranam taneh ia, ý chí kiên cường di bhap bini, lac bruk jum pataom dalam mesruh metak, ilamu ranam taneh ia cách mạng

Meng tuk kol thực dân Prang patuh phao taong tame thành Gia Định di akaok thun 1859, bhap bini Hóc Môn – Bà Điểm oh huac radaih pasei phao pasiak di kol Prang, bo hu mbaok tame mesruh metak ala dom hala dok khởi nghĩa di nghĩa quân Trương Định - Trương Quyền (1859 - 1870), Nguyễn Anh Thủ (1871). Njauk caik hatai lac, bruk khởi nghĩa thun 1885 di 18 palei bein hala kayua Phan  Công Hớn saong Nguyễn Văn Quá dang akaok, pataom hu yaok ribau nghĩa quân taong tame huyện lỵ Bình Long (Hóc Môn), pametai hu Ðốc phủ sứ Trần Tử Ca tay sai di kol thực dân Prang, daong palao hu ralo bhap bini njauk nyu cap kreik.

Meng kan mai, bhap bini bhum taneh ini hu angan lac tapak hatai, trọng nghĩa, khinh tài, hu hatai anit ranam gauk, daong ba gauk. Mikva daok lavik saman di labik ini hu iek hala, paneing  lac sa bruk ngak mbang hu di saman nan. Harei ini jeng daok hu ralo ong amuk taha caik taong abih bein di drei piah pala hala paneing. Urak ini, tame xã Bà Ðiểm jeng daok mboh sambo hijao di dom mejam hala. Dom darak pasar di xã Bà Ðiểm, xã Tân Xuân, xã Thới Tam Thôn… yaok thun tame bilan hajan lingik li-an, dom amuk taha jeng daok nong hala nao pablei gam hong paneng. Yaom lac daok dalam saman đô thị hóa samar, yaom taneh dom bein tagok glaong, min ralo ong muk taha di Hóc Môn daok jak gauk khik veik bein hala, kayua nan lac bruk ngak meng kan di ong muk caik veik. 

Di bhum taneh ini, melam 22 tal saboh mesup 23/11/1940, bhap bini Hóc Môn lac lực lượng cách mạng akaok meti dang tagok dalam bruk khởi nghĩa Nam Kỳ. Bloh dalam luac dua bruk mesruh metak pacang kol thực dân Pháp saong đế quốc Mỹ meblah taneh ia, bhap bini Hóc Môn – Bà Điểm tuk halei jeng pok paglaong hala dok ranam taneh ia, abih hatai ka Đảng, ka cách mạng piah peih paha palei negar, yasa taneh ia. Angan Anh hùng tapon nyaom bol pal phao kraong bhap bini bo akaok negar pok brei ka huyện Hóc Môn, dalam nan hu 3 xã anh hùng nan lac: Xuân Thới Thượng, Tân Xuân saong Bà Ðiểm dak brei mboh bruk chiến đấu ngoan cường, bất khuất di bhap bini 18 palei bein hala./.