Hadei di tuk batabiak panuac lac brei paatah di gauk 2 adit 

Pachreih tui bruk pa atah di gauk dalam 2 adit  di ban raya.HCM, Giáo sư Nguyễn Thiện Nhân (urang dahlau deih ngak Ủy viên mintri Chính trị, Bí thư Thành ủy ban raya.HCM dahlau daih) ndom lac, dalam mbang jit ruak ni, bruk tamuh tabiak, njom mbak rah tabiak dalam tuk vak biak katut panak. Dalam 2-3 harei, meyah ban raya oh ngak khang ye 1 atau 2 adit tra, jit  di ban raya  HCM lac biak prong. Kayua yau nan ye, tui ong Nhân, ngak brei suai veik bruk ngak di ban raya dalam  2 adit song pacang cakak di  Gò Vấp lac sa jalan ngak biak njauk, oh dok hu jalan ngak halei karei .

Ndom ka bruk brei paatah di gauk  2 adit  di sa ban prong abih dalam negar, GS Nguyễn Thiện Nhân ndom lac “tok brei suai veik dom harei, bruk meda biak karei". Ni jeng lac jalan ngak meng dom mbang jit ruak dahlau song urak ni di Việt Nam. Tui ong Nhân, bruk ni meda mek hu rilo siam lagaih. Dahlau di abih, paatah di gauk 2 adit oh hu bruk nao mai praong  di labaih 10 triệu menuac urang di dom labik, cakak klaoh bruk njom mbak jit . Ni lac bruk ngak hu prong di abih. Ka dua lac, 2 adit paatah di gauk lac tuk vak piah peih bruk dut iek praong, hu jalan ngak  ka yaok quận, huyện piah kuhria mboh bruk njom mbak, duah mboh sruh jit. Meng nan hu jalan langyah patui di nan. Gam song nan hu thau cambaih dom urang F0, F1, F2 piah ba nao iek ruak song brei dok karei. Ka klau, 2 adit nan jeng lac tuk vak piah ka gah y tế song dom labik brei dok karei hu ramik ngak pasiam, caga pabak labik brei dok karei song taong ruak ka dom urang hu pasang iek mboh.

Langui di nan, dalam 2 adit ni, dom labik ngak pandap, labik pablei salih, sang bac, jalan mbak, pajeng ba, y tế njauk pasang iek veik bruk peih ngak tui sarak ngak bruk siam mekre salamat hu ban raya patabiak meng bilan 5/2020. Dom labik brei eng drei pasang iek, pathau khan, hadei di nan, ban raya hu tong yaom. Yau nan, jalan pacang caga jit di dom doanh nghiệp song jabat  hu paglaong samu hong bruk di ban raya hu jit  piah urang meda ngak bruk hu bo oh ngak njom mbak jit ruak.

PGS.TS Trần Đắc Phu (urang dahlau deih pan akaok Cục Y tế Dự phòng, mintri  Y tế, Cố vấn pakat glaong pasak pabak bruk y tế công cộng), tong yaom jit ruak di  ban raya .HCM srau kadau kayua bruk njom mbak rah tabiak dalam sa kapul urang bhain taom gaok dalam balik sre. Dom urang ni njom mbak ka rilo urang karei kayua tukvak saong jalan nao biak rilo. Anak meta, langui di bruk duah hu jalan njom mbak pambuak tal dom sruh jit ni , ong Phu ndom lac ban raya .HCM njauk samar duah tong abih dom urang taom gaok dom  F0 piah langyah hu bruk njom mbak.

Meng bruk di  quận Gò Vấp dalam harei camereip paatah di gauk mboh daok srau kadau, hu tuk brei peih  paga pacang hu padang bloh, mboh lac ban raya.HCM njauk batabiak jalan tacei pato cambaih laih  piuah bhap bini thau jang ka sarak 15, 16 tuk peih bruk paatah di gauk. Nan lac brei adat ka bhap bini hu ngak hagait saong oh brei ngak hagait  piah tui nan pasang iek, taong phạt. Taphia di nan, gah chức năng labik pacang cakak brei kuhria tal bruk jalan nao mai ka nyu tani tanat  .

Ong Phu ndom lac karja meda padang paga pacang, min brei dom menuac di dom labik karei meda nao tapa, tok cakak oh brei menuac di  Gò Vấp tabiak gah langui. Gam haong nan, ban raya njauk tabiak panuac ieu oh brei radaih pataok ka tuai trun atau tagok, oh dok veik di labik njauk pacang cakak. Jalan ngak nan gam plaih nyaik bruk gar jalan , gam lagaih song bruk di  dịch tễ học, tuk menuac dalam labik pacang cakak oh brei tabiak gah langiu ye oh hu jalan ba anek ruak tabiak langui bhap bini. Dalam tuk nan, dom urang di labik karei meda nao tapa, min oh brei taom gaok urang dalam labik pacang cakak.

Langui di nan, bhap bini brei hu pathau khan piah oh daok tuh nao  siêu thị, drak pasa sit, khik piah pandap mbang. Bruk ni oh karei hagait pataom rilo menuac dalam tuk vak paatah di gauk. Dom jalan ngak ka bruk nao mai jeng brei peih ngak ka nyu lagaih piah plaih nyaik bruk gar jalan, pataom rilo menuac dalam sa tuk vak.

Urang ilamu brei thau jit ruak di ban raya.HCM meda pasang iek hu dalam tuk vak anak tal kayua ban raya hu ba tabiak dom jalan ngak khang. Min, bruk mbuan si njom mbak dalam bhap bini jeng dok biak glong, meyah bruk paatah di gauk oh hu peih ngak catang song bhap bini oh paglong hatai sahneng ngak tui sarak dalam bruk nao mai, taom gaok gauk./..

Urang lang: Hanipha- 3/6