40 thun tapa bloh kuhria meng harei chế độ Việt Nam cộng hòa jaleih rai, gah meraong hu peih paha, dom urang dahlau deih ngak bruk ka chế độ klak oh tabiak nao taneh ia lingiu bo daok veik palei negar jeng hu sa raidiuk bharau. Pacang veik dom bruk dahlau deih saong dom khat lihik pandik harao di 2 gah, dom urang ngak cách mạng saong dom menuac di chế độ klak dahlau deih daok jum pataom gauk, ba gauk tame padang ban raya angan Wa. Kim Dung – urang vak di rayo sap ndom VN daok di ban raya Hồ Chí Minh hu kadha vak ndom tal bruk ini.

Ong Nguyễn Văn Hùng, urak ini daok di Phường 14, quận Gò Vấp, dahlau deih lac sỹ quan quân đội di karja klak. Hadei di harei gah meraong hu peih paha, taneh ia yasa, ong hu ba nao cải tạo 2 thun bloh mai veik sang danaok, kham merat ngak mbang, pablei salih. Urak ini ong hu sa cửa hàng pablei pandap mbang chip, raidiuk hu tani tanat. Ong mboh thau dar phor kayua hu daok dalam hòa bình, oh njauk thei tah klaak. Ong Hùng khan lac: Karja drei oh kateik greik thei. Jeng hu brei quyền công dân ka dahlak, peih jalan ka dahlak padang rai diuk, raong pato anek bhik. Dahlak mboh taneh ia drei daok angaok jalan patagok biak khang, bruk chính trị jeng hu tani tanat. Dam dara harei ini hu ilamu, hu ginup abih.

Ngan saong amuk Phan Hoàn Ngọc Tuyết, daok di Quận 12, rai diuk sang amuk hadei di tuk pasang hu cải tạo mai veik jeng siam mekre yuau dom baoh sang karei. Sang amuk oh tui ayut nao tapa Mỹ daok, bo khang hatai daok veik palei negar, dak padang raidiuk bahrau, yaom lac tuk nan oh thau hadaom kan kandah, glaih glar. Bruk bo amuk mboh bui sambai nan lac sang amuk oh hu thei tah klaak bo daok hu karja palei biak caik hatai sangka, daong brei tuk gaok kan kandah. Abih di nyu nan lac, anek likei di muk njauk jru mek klik kruac hu mbang tui dom sarak iek glang.  Amuk Phan Hoàn Ngọc Tuyết khan lac: Bruk dahlau njauk var klaak nao, piah ka rai ranaih dak padang taneh ia siam mekre jang. Dua diuk pasang dahalk jeng hu sa urang anek likei njauk jru mek klik kruac, hu karja sangka daong ginup abih, meng bảo hiểm y tế tal jien daong yaok bilan, Tết daok hu brei 8- 9 rituh ribau. Nao xe buýt atau nao me-in oh abih jien.

Oh ta-eng hagait ong Hùng, sang amuk Tuyết, bo daok hu biak rilo urang ngak bruk ka chế độ klak, hadei di thun 1975 hu ngak bruk veik ka chế độ bahrau, hu rik pren yava tame bruk cakrok ban raya Hồ Chí Minh jeng ye patagok taneh ia. Giáo sư - Bác sỹ Trần Đông A, dahlau deih ngak Phó Giám đốc sang iek ruak Nhi đồng 2 lac urang yau nan. Giáo sư khan: dahlau thun 1975, sang ong lac sang mesruh veik haong cách mạng. Hadei di tuk bac tamat Đại học Y khoa Sài Gòn, ong halan hatian nao ngak bruk cứu thương di Binh chủng Nhảy dù, lac sa binh chủng naih gheih di abih di Quân đội Việt Nam Cộng hòa. Hadei di harei gah meraong peih paha, ong njauk nao cải tạo, hadei di nan hu mai ngak bruk di sang iek ruak Nhi đồng 2. Raidiuk di ong hu salih karei meng nan. Ong kham merat  hu mbaok tame dom kapul y bác sỹ halan hatian nao tal dom bhum atah bayah di Bei Gon, dom labik daok hu rilo bom đạn chiến tranh piah daong iek ruak ka mikva. Dalam tuk taneh ia kan kandah, ong taduan hu rilo panuac da-a tapa negar lingiu ngak bruk, min oing oh taduan panuac. Meng ilamu saong hatung hatian di drei, ong daong pasiam ka yaok ribau anek naih njauk dị tật bẩm sinh, yau ye mbang blac raih neh tabiak 2 anek naih ndih tapui gam gauk di tian Việt – Đức dane angan di dunya. Meng dom bruk rik daong di ong brei ka ngành y, Karja hu pok brei ong angan: Gru jru bhap bini, Anh hùng Lao động. Giáo sư – Bác sỹ Trần Đông A lac: Mesruh metak biak khang. Dahlak oh sahneng lac hu harei hòa bình. Bloh 30/4 mai, lac harei hòa bình. Nan lac caong khin praong abih di dahlak hu jeng biak nan ye dahlak daok veik. Urak ini sarak di Đảng Nhà nước lac hòa hợp, hòa giải, peih pabah mbang tabiak dunya. Dahlak sahneng, drei lac urang Việt Nam daok di negar lingiu meyah hu hatai anit bangsa ye drei mai veik. Dalam sang iek ruak di dahlak, dom ayut dahlau deih tabiak nao urak ini hu mbaok dalam kapul blac raih. Njauk lac bangsa Việt Nam lac sa, urang Việt Nam lac sa. 

Mesruh metak nao atah bloh 40 thun, dom pandik harao oh ka lihik abih, min tui jalan yau Yuan lac “khép lại quá khứ, hướng tới tương lai” gam saong dom kham merat yam tagok di rilo menuac saong gauk gar di dom urang nanbhian daok gah deih mblang mesruh, hu brei mboh ka bruk jum pataom, hòa hợp dân tộc di  Đảng saong Karja drei./.