Urang jakar Đồn BP Lai Hòa daok pathau khan ka bruk pacang caga jit Covid - 19

Lai Hòa lac xã daok kan kandah di ban sit Vĩnh Châu, hu rilo urang Khmer, mikva diukrai meng bruk ngak nong haong nao tasik. Kayua yau nan ye, piah nao ngak mbang, mikva bhian mai iek ruak meng biak aval. Tui Thiếu tá Thái Minh Phong, akaok bilai Quân dân y Ðồn BP Lai Hòa, piah pabak bruk iek ruak ka mikva, meng mon 6 mesup yaok harei, urang jakar y tế di bilai hu mbaok piah iek ruak. Bruk njauk biai nan lac, mikva mai iek ruak rilo meng lac langiu tuk ngak bruk, nan ye bilai brei urang jakar y tế hu mbaok luac harei melam piah duh siam ka bruk iek glang prein yava saong ngak siam bruk di urang gru jru ngan saong urang ruak: “Urang jakar, urang lin, urang ngak di bilai ini ngak bruk abih drei, mikva mai ye drei iek ruak, oh caik ka mikva cang suai. Iek ruak saong brei jru ka mikva chip piah mikva nao ngak. Mikva taong yaom glaong bilai ini.”

Meng bruk abih drei di urang gru jru tual quân hàm hijao saong abih hatung hatai brei ka urang ruak, nan ye padang hu hatai jia di bhap bini. Urak ini, yaok harei bilai hu iek ruak, brei jru ka labaih 30 urang. Y sĩ Kiên Na Riêl, urang jakar y tế di bilai brei thau, adei lac urang Khmer nan ye thau cambaih ka raidiuk mikva daok di palei pala, takik thau sap Việt. Tuk mboh gru jru mai aval piah iek ruak, ndom sap Khmer saong abih hatung hatai tacei pato jalan iek glang prein yava ye mikva biak bui sambai. Ini jeng lac prein pachreih ba gru jru di bilai Quân dân y Ðồn BP Lai Hòa ngak siam bruk di drei. 

Kayua daok atah di pasak xã nan ye rilo mikva daok di dom palei dalam xã Vĩnh Tân, dom palei Prey Chóp, Prey Chóp A, Prey Chóp B di xã Lai Hòa jeng nao iek ruak di bilai. Thiếu tá Thái Minh Phong, Akaok Bilai Quân dân y Ðồn BP Lai Hòa brei thau, bhap bini daok di dom labik tapen tasik di ban sit Vĩnh Châu, tỉnh Sóc Trăng haong mikva daok di dom labik jaik taphia tỉnh Bạc Liêu jeng tapa ini iek ruak. Kuhria rah tapa, yaok thun bilai hu iek ruak saong brei jru ka jaik 10.000 mbang urang ruak. Gam haong nan, bilai daok hu pathau khan brei mikva thau ka jalan pacang caga dom janih jit ruak yau: pandiak dom, ruak tangin – takai – cambuai, ruak pandiak tabiak darah. Abih di nyu nan lac, urang jakar bilai nao tal yaok sang pathau khan ka pacang caga jit Covid-19 brei mikva thau. Meng nan, ba tangin tame haong karja pacang caga jit Covid-19 hu siam lagaih: “Drei hu pathau khan yaok harei, yau brei ba-ar brei thau ka jit Covid-19, oh pataom rilo menuac, cuk pataih pacang mbaok, rao tangin meng sabon, puh ramik sang danaok hacih sa-at. Pathau khan yaok harei, meyah mikva mboh pandiak glaong ye drei jak ba daok dalam sang, bilai y tế nao dut iek pandiak dalam rup yaok harei 2 mbang piah pasang iek.”

Urak ini, Bilai Quân dân y Ðồn BP Lai Hòa hu 5 urang jakar duh ka bruk iek ruak. Yaom lac ka oh hu bác sĩ min bilai jeng padang hu hatai jia ka bhap bini tuk mai iek ruak. Mboh mikva oh huac jalan nao atah bayah, mai tal bilai piah iek ruak, dom urang lin, urang jakar y tế tuk halei jeng abih drei iek ruak, oh lac harei atau melam. Bruk bui sambai di bhap bini tuk thit ruak lac prein pachreih ba dom sa-ai daok veik haong bilai, haong bhap bini, ngak siam bruk hu jao brei.

Jaik 20 thun tapa, Bilai Quân dân y Ðồn BP Lai Hòa, Bộ đội BP Sóc Trăng hu jeng labik caik hatai jia, ba bui sambai ka urang ruak kan kathaot, abih di nyu lac bhap bini Khmer daok di labik taphia negar./.

Urang lang: M. Phương – 06/03