Bruk kurang aia pandar saong aia brei ka bruk pala drak dalam bilan thu tuk halei jeng lac bruk kan kandah ngan haong huyện pulao Tân Phú Đông, tỉnh Tiền Giang dalam dom thun tapa. Piah caga bruk kurang aia dalam bilan thu thun ini, meng akaok bilan thu, huyện hu peih ralo jalan ngak piah pasiam veik, nan ye tal urak ini, bruk kurang aia pandar oh daok trak yau dom thun dahlau diah. Min suai lavik, bruk kurang aia ini jeng daok hu ralo cuang kandah dalam jalan langyah.

Urak ini, dalam huyện hu 8 danao padang aia pandar brei ka palei pala, padang hu abih tih jaik 350.000 m³, brei ka jaik 4.500 baoh sang dalam  11.000 baoh sang, meblah jaik 40%. Thun ini, piah pasiam veik bruk kurang aia pandar dalam bilan thu, huyện hu panuac caong công ty ba brei aia njuk mek aia tapak meng langiu kraong Cửa Tiểu tame 5 danao aia dalam huyện. Urak ini trữ lượng aia dalam dom danao jaik 262.000m³, ba brei labaih 4.000 khối dalam sa harei melam. Min ngan haong trữ lượng ini tok pandar hu labaih 175.000 khối kayua nyu bốc hơi ngak khat lahik, njaom lakhur mbak di mbat danao. Yau nan ngan haong lượng aia ini tok pabak hu aia dalam jaik 42 harei. Ong Nguyễn Văn Hải – Akaok Jabat ngak nong huyện Tân Phú Đông brei thau: Bruk njauk duh hatai urak ini nan lac bilai Tân Hòa di xã Tân Thạnh, urak ini bilai ini njauk pabak aia ka labaih 700 baoh sang, meyaih pandar sa danao ini tok ginup pabak dalam 20 harei. Daok ngan haong dom xã Phú Đông, Phú Tân, ngan haong danao padang labaih 6ha ginup aia ba brei min dom jalan nding raok oh ginup kích cỡ ba aia. Aia oh kurang min ba mai oh ginup. Nan ye meng blaoh hu ngak 3 bilai tăng áp di xã Phú Tân, Phú Thạnh saong ấp Bà Từ di xã Phú Tân. Saong daok brei ngak sa danao padang jaik 200 m³  aia piah njuk aia tiếp áp ka gah la.

Bruk daok ngak ka mikva huyện pulao mboh duh hatai nan lac tuk bo dom baoh ribaong thu aia ye bruk kurang aia nyu rah tabiak veik. Ndom ka bruk ini, amuk Trần Thị Hồng, ấp Gảnh, xã Phú Đông, huyện Tân Phú Đông brei thau: Thun blaoh tame bilan Mat, bilan Tha oh daok ia piah pandar. Thun ini, drei hu kuac ribaong, ye hu aia hasit piah pandar, min tame bilan 3 aia di baoh ribaong ini nyu  thu ye oh hu aia piah pandar.

Ngan haong ralo baoh sang, bruk eng drei kuac bingun padang aia nan lac sa dalam dom jalan ngak piah caga bruk kurang aia. Ong Trần Thể Hiện, sa urang daok di ấp Gảnh, xã Phú Đông brei thau: Caik ia piah nan tuk halei aia thu abih meng pandar tal bingun ini, tuk bo tame bilan aia mbak meng pandar tal aia di ribaong, bloh hadei di nan drei padang ia piah pandar. Thun blaoh thu lagu, thun ini siam jang hasit. 

Piah patui jalan pasiam bruk kurang aia pandar ka mikva, anak meta, huyện daok brei tui iek độ mbak di aia langiu kraong, meyah mboh nyu ala 2g angaok sa lít ye huyện brei bơm aia tame danao piah pandar. Taphia di nan, huyện jeng hu panuac caong Sở ngak nong saong patagok palei pala peih 17 vòi aia công cộng ka dom urang kathaot oh ginup pandap panda padang aia. Ong Nguyễn Văn Hải daok brei thau lac:Urak ini, jalan ngak di anak meta nan lac khaol dahlak pok panuac caong sở ngak nong brei peih 17 vòi aia công cộng piah pabak ka urang kathaot oh hu điều kiện padang khik aia. Saong daok brei panuac kakei bhap bini lac:  aia ini tok piah pandar dalam sang. Ka dua  nan huyện jeng hu panuac kakei mikva urang nong brei khik piah aia ka pahu, nan lac xã hội hóa bruk ini, ye karja oh naong abih hu.

Bilan pandiak bhang daok ngak kan kandah bhum taneran kraong Cửu Long dalam nan hu tỉnh Tiền Giang ye dom jalan ba tabiak tok lac jalan ngak di anak meta. Daok suai lavik, jalan ngak brei hu sangka nan lac bruk peih ngak dự án sang mac aia BOO Đồng Tâm piah pabak aia hacih ka mikva huyện kathaot Tân Phú Đông thun 2015./.