Amaik ame brei sangka iek glang anek di drei dalam var mbang huak 

Tatuak drei tuk mboh anek likei iek video hoạt hình doremon hu ngak bahrau tui jalan taong paoh gauk, sa-ai Đức Tùng daok di Đào Duy Anh, Hà Nội biak duh hatai kayua angaok youtobe tame iek yaok harei bo hu rilo phim hoạt hình mboh biak huac, hu bak bruk cuh pametai gauk, bak darah. Njauk biai nan lac, dom janih video jhak ini nyu mblo tabiak gam haong dom video phim hoạt hình siam, mbuan pachreih uraniah peih iek.. Dom video jhak ini nyu ngak jhak rup binguk siam mekre di dom menuac urang dalam  phiên bản gốc, saong ngak khut hatai sahneng di uraniah meyah iek gam gam. Sa-ai Đức Tùng, daok di Đào Duy Anh, Hà Nội brei thau:

      "Angaok dom video hu biak rilo asal kadha pambuak tal taong, cuh gauk, dom asal kadha jhak, dom anek biak caong khin duah thau, dom asal kadha nan jeng biak dui pachreih uraniah, bruk ini jeng biak pandik akaok". 

Oh lac video hoạt hình taong cuh gauk, hài oh tabiak hagait mbuan ngak khut uraniah, bo rilo janih video tacei pato ba drei tame bruk kan kandah piah ngak iek atau game đấu kiếm daok ngak khut tapak tal hatung hatai, jalan ndom puac daok dang di uraniah, abih di nyu lac umo daok praong. Sa-ai Kiều Liên daok di Thanh Hóa khan lac:

    "Dom anek di drei nyu takre iek clip di youtube, dom game di my grab. Anek di drei umo daok praong ye iek dom janih nan jeng jhak hatai jang, sahneng lac drei hu prein khang, takre me-in gai, dom pandap mbuan ba tal njauk rambus, hu mbang nyu ngak jhak ka dom menuac daok jaik". 

Thau cambaih lac oh pakauk hu anek pandar internet, rilo amaik ame hu tacei pato anek tame dom video siam, hu asal pato pakai yau ye youtobe kid.

Hu dom amaik ame hu jalan ngak karei, nan lac tui iek saong ba tabiak jalan ngak cambaih laih meng tuk anek daok sit. Sa-ai Trần Anh Tuấn, daok di jalan Minh Khai, Hà Nội khan lac:

“Camereip abih drei takik brei anek iek ti vi, phone tangin meng sit, brei takik iek yaom lac asal kadha hagait. Tuk anek sahneng mboh ye drei iek haong anek dom kênh siam lagaih, blaoh lavik lavik harei nyu tame dalam akaok sahneng di anek. Tal urak ini nyu jeng bhian randap, rilo tuk drei caik phone tangin, ipad di sang min anek oh gaok tal”.

Dalam saman công nghệ 4.0, Internet ba mai kein lagaih ka taong abih menuac sia.Bruk njauk biai nan lac, ngan saong uraniah, bruk bac da-a online hu ndom lac jalan siam lagaih daong ka dom anek pabak ilamu,khik hu salamat dalam tuk hu jit ruak. Min bruk mai meng dom blah mạng jeng ngak ka uraniah mbuan taom gaok, maong iek dom video kanjah jhak.Piah khik caga anek bhik, dom amaik ame njauk caik hatai tui iek saong tacei pato dom anek pilih ruah dom kênh hu asal pato pakai atau me-in sambai siam mekre. Abih di nyu lac daong ka uraniah thau hu dom kanjah jhak meyah maong iek dom video oh lagaih./.

Urang lang: Mousaphuong -20/3