Sap daoh lai li-ar di adei Bùi Văn đen, umo 6 thun, nan lac sap anit ranam ka raidiuk takik mboh bo ong Bùi Văn Châu pang mehit pak dalam baoh sang di drei. Kayua lac, dom uranaih ong daok raong, hu adei njauk bại não, hu adei njauk joh jo trak, gila, njauk ruak Down… nan ye bruk pato ka dom adei daoh hu nan lac bruk biak kan kandah. Rilo uranaih di labik ini njauk kak talei piah nyu oh preo, oh bleik. Jaik abih dom adei njauk amaik ame klak hu ong ba mai raong, atau hu bhap bini ba mai tuk mboh kol nyu daok ban glai ban klo di langiu jalan. Hu ralo adei hu amaik ame ba mai payua bloh oh mboh mai veik, dalam tuk oh ka dil caik ngan brei anek. Anit ka dom uranaih oh patuah gam joh jo gam kurang hatai anit ranam, ong ngak khai sinh ka dom uranaih sit hu mek họ Bùi yau anek di ong, yau Bùi Văn Đen, Bùi Thị Ngân, Bùi văn Hòa… Tal urak ini hu jaik 20 anek tui họ Bùi di ong.

Dalam 70 urang urak ini daok hu raong di mái ấm Phan sinh, hu 54 uranaih joh jo saong 16 ong taha daok sa drei, njauk ruak kik; dalam nan, labaih meteh nan lac oh eng drei mbang huak hu. Meng bruk mbang menyum, vệ sinh brei ka urang joh jo, ong Châu saong 4 urang halan hatian taduan iek. Njauk harei hu urang ruak, ong ba nao tal sang iek ruak saong kuhria jien bayar ka sang iek ruak.

Ong Trần Văn Phú, umo 66 thun, metai meteh rup kayua tai biến, hu iek glang di mái a61mPhan sinh 3 thun ini mai lac:

‘Gru Châu diuk rai biak siam. Gru nan lac urang praong thun ye, min ngak hu yau nan dahlak mboh drei biak patuah tuk hu gru saong anai di labik ini iek glang, kayua dalam tuk ruak kik dahlak oh hu thei. Dahlak caong daok di labik ini samar thit ruak piah nao ngak mbang veik”.

Sa harei barau ngan saong ong Châu bhian peih tabiak meng 4 tal 5 tuk mesup. Angaok sa sruh radaih klak, ong nao tal dom darak pasar đầu mối, darak melam likau njam patam saong thực phẩm, raong dom uranaih joh jo. Ong lac:

“Pandap bingi ye mepiah brei ka uranaih nyu mbang. Pandap hagait oh mbang hu ye drei pablei brei ka urang raong pabui. Langiu di nan kreh pandiak  dahalak daok nao duah lisei labaih, yau di dom quán lisei, phân xưởng. labik công ty praong drei oh taem hu. Drei mek mai drei ba nao pablei”

Dom jien duah hu meng bruk nao likau lisei labaih mai pablei oh ginup raong dom menuac dalam mái ấm. Ong brei thau, yaok bilan pandar cai patak pataom jeng abih 50 triệu đồng, dalam nan ralo meng lac tả saong bỉm ka dom urang oh ngak hagait hu ka rup drei eng. Oh pagam pambak tame jien daong di dom urang ngak pahala, ong peih bruk raong glang. Dalam bein di mái ấm Phan Sinh, ong Châu palao menuk, raong kiuk, raong ikan, gam hu pandap piah pang, gam duah jien mek tame kuhria ka mái ấm. Yaok thun, ong jeng hu jien mek tame labaih 200 triệu đồng. langiu di nan, tuk melam, ong Bùi Văn Châu nao pato Anh văn ka dom kapul anek saih di ban sit Trảng Bom piah duah jien iek glang ka dom anek oh patuah jamo di drei.

Ndom ka ong Bùi Văn Châu, saai Đỗ Thị Niềm, urang halan hatian tame daong bruk ka mái ấm Phan Sinh brei thau:

“Jru nan lac urang siam. Jru hu gia đình min jru oh sahneng tal gia đình bo nao kuhria ka dom adei. Kayua mboh hu rilo menuac rambah rambup lo”.

16 thun padang tagok min mái ấm Phan Sinh barau hu brei adat lac labik bảo trợ xã hội hu sa thun ini mai. Oh thau hadom kan kandah, oh takik bruk  duh hatai jang yau bui sambai hu bak dalam ong nan ye ong oh klak hu mái ấm ini piah nao daok haong diuk anek daok định cư di Mỹ. Ralo thun tapa nao, ong oh daok hadar tal mbaok meta dom urang njauk mbuah kan, lac amaik ame, gauk gar di dom urang oh patuah jamo, hu ba ralo drah di drei mai tal labik ini bloh klaak nao thit. Ong tok di daok hadar tal dom meta maong vô định tuk gaok ong, kol nyu caong lo hatai anit ranam di urang ame – urang jru Bùi Văn Châu, caong lo bruk klah rabha di bhap bini./.