Dom y bác sĩ, urang halain hatain jeng daok abih drei haong bruk ngak di drei

Saai Nguyễn Thị Cẩm Tú, daok di ban Long Xuyên, tỉnh An Giang bahrau bac tamat blaoh gah Y khoa prein yava, khóa 41 (2015-2021) di sang bac Đại học Y Dược Cần Thơ, hu vak harak likau nao pacang jit di bilai Y tế phường Mỹ Long, TP.Long Xuyên. Saai Tú khan lac, bruk pasang iek, neh tabiak urang hu ruak dalam rup, piah khik salamat bruk klauk jru lac sa kan kandah ngan haong dom bac si bahrau bac tamat blaoh, min saai tuk halei jeng kham marat abih drei piah rik prein tame bruk mesuh pacang jit Covid-19: “Adei khin daong ka yaok manuac dalam tukvak kan kandah pacang caga jit ruak ini. Adei halain hatain ngak bruk ni mbiah tal tuk halei abih jit ruak.”

Bác sĩ Nguyễn Thu Lương, dahlau daih hu tukvak ngak bruk di sang iek ruak Đa khoa ban Long Xuyên saong padeih hưu 2 thun ini mai, halain hatain tame pacang caga jit, yaom lac umo praong thun mbuan gaok kan kandah. Tapa 3 mbang klauk vaccine ka bhap bini di pak ni, amuk jeng chreih chrai hu mbaok tame.  Bác sĩ Thu Lương brei thau, amuk caong rik prein haong gah y tế dalam tuk pak ni daok kurang manuac ngak kayua pataom tame taong ruak Covid-19, gam khik tani tanat bruk iek ruak, taong ruak ka bhap bini: “Mikva mai klauk jru biak rilo, bo menuac ngak di bilai y te daok takik. Lac bác sĩ padeih hưu, dahlak caik hasit tukvak, halain hatain hu mbaok tame mbang iek ruak gam haong labik klauk jru di phường Mỹ Long.”

Anak bruk jit ruak Covid-19 daok rah tabiak sarau kadhau, dom urang njom ruak daok tagok rilo, yaok rituh urang halain hatain di An Giang ba gauk tame daong pacang caga jit haong gah y tế. Dược sĩ Nguyễn Thanh Tùng, akaok bilai Y tế phường Mỹ Long, ban Long Xuyên brei thau hatai iek praong bruk abih drei ka bruk ngak di dom y, bac si ngak gam haong drei: “Menuac ngak di bilai urak ni biak takik, nan ye dom bác sĩ halain hatain haong bilai y tế lac menuac njauk iek praong. Dom bác sĩ oh khin hagait, bo maong bruk nan lac bruk njauk ngak di drei.”

Sở Y tế tỉnh An Giang brei thau, tỉnh daok peih ngak catang bruk klauk  vaccine pacang Covid-19, ieu pataom abih gah piah ba gauk tame danak dak klauk vaccine. Tal urak ni, taong abih tih dom mbang klauk jru jeng rah tabiak dalam siam mekre, salamat.

Piah jhul samar bruk klauk vaccine caga Covid-19 ka rahra dalam tỉnh, ong Lê Hồng Quang, Bí thư Tỉnh ủy An Giang brei thau lac, tỉnh daok ieu pataom dom gah hu mbaok tame, tui jalan vaccine caga Covid-19 lac bruk praong saong njauk ngak piah pacang caga jit ruak saong cak rok patagok kinh tế-xã hội. Dalam danak dak klauk jru ini hu prein biak praong di dom urang halain hatain, dalam nan hu dom y, bác sĩ padeih hưu bloh, dom sinh viên gah y. Bí thư Tỉnh ủy An Giang Lê Hồng Quang lac: “Bruk di urang ngak gah y tế biak glaih glar, hu tuk daok njauk njom ruak veik, min meng hatai di y sỹ, bác sĩ… dom urang nan oh sahneng hagait tal prein yava di drei, kuhria ka manuac ruak, ka rahra. Urang hu mbaok tame, rik prein haong dom kapul karei tame bruk pacang caga jit ruak. Dahlak mboh lac bruk ini biak njauk iek praong”

Anak bruk  jit Covid-19 daok njom mbak khang, dom kapul taong ruak di pasak ruak daok ngak bruk harei melam, oh huac kan kandah. Tui jalan “gru jru yau urang amaik”, dom y bác sĩ, urang halain hatain jeng daok abih drei haong bruk ngak di drei,, kham merat pambuak haong bhap bini ngak ka pahu bruk pacang cakak saong jhul kadun likuk jit ruak dalam tukvak samar di abih./.

Urang lang: Thu Thao – 26/08