Urang lin biên phòng, Công an nao pasang iek jalan tapen negar yaok melam

Xã Vĩnh Hội Đông, huyện An Phú, tỉnh An Giang, hu jalan tapen negar labaih 6km, hu rilo jalan haluk sit, praong. Piah samar mboh, pacang cakak dom menuac tame negar suan hukum tapa jalan tapen negar, jaik di ni, dom mbang pasang iek melam rah tui jalan tapen negar, langiu di urang jakar, urang lin biên phòng, Công an, Quân sự…daok hu mbaok dom kapul saong gru pato di dom sang bac dalam palei. Ong Nguyễn Văn Phinh, Phó akaok sang bac Tiểu học “A” Vĩnh Hội Đông, huyện An Phú brei thau:“Taong abih dom adei saai gru pato di sang bac jeng hu mbaok tame pacang caga jit Covid-19, piah pacang cakak samar drah dom urang tame negar suan hukum meng Campuchia tame Việt Nam”.

Patagok bruk abih rahra hu mbaok tame pacang caga jit, bhap bini daok di bhum tapen negar tuk mboh manuac bo drei oh thau tame palei ye khan brei karj athau chip, rik daong khik catang bruk urang tame negar suan hukum. Ong Nguyễn Văn Kỷ, xã Vĩnh Hội Đông, huyện An Phú khan lac: “Lac sa rahra, drei jeng hu mbaok tame haong Đảng ủy, Ủy ban piah nao pasang iek jalan tapen negar yaok melam, dahlau di abih lac caga ka drei saong gauk gar, dua tra lac caga puk palei, bhap bini brei thau ba tangin tame haong karja palei”

An Giang hu jalan tapen negar atah jaik 100 km, taphia tỉnh Takeo saong Kandal. Dua labik ni di Campuchia hu 800 urang njom Covid-19 dalam rahra, kayua yau nan ye biak mbuan njom mbak jit tame. Tỉnh An Giang hu padang labaih 200 kapul khik iek, pacang cakak di labik saong pasang iek nao mai di jalan tapen negar. Urak ni lac tukvak langik pandiak khang abih di bilan thu, dom kapul ngak bruk pacang jit khang hatai pacang caga. Đại úy Phan Thanh Hồng, Phó akaok bilai, Đồn Biên phòng pabah mbang negar pakat dunya Tịnh Biên ndem lac: “Pacang caga jit dalam tuk langik pandiak ye binah halei jeng ngak kan kandah tal adei saai dalam bruk ngak. Thau hu bruk ni, Đảng ủy, Chỉ huy đồn Biên phòng pabah mbang negar pakat dunya Tịnh Biên yaok adit, nao tal yaok bilai rivang, pachreih ba, pato kakei, saong duah thau hatai caong, jeng yau dom tavak tavaiy dalam raidiuk, dalam bruk ngak di yaok urang, hadei di nan meng ba tabiak jalan langyah samar drah”

Urak ni, UBND tỉnh An Giang pato tacei dom gah saong puk palei, abih di nyu nan lac 5 huyện, ban hu jalan tapen negar paglaong bruk khik iek catang jalan tapen negar oh caik ka menuac urang tame tabiak negar suan hukum. Ong Nguyễn Thanh Bình, akaok UBND tỉnh An Giang daok brei thau lac: “Jit ruak daok rahtabiak khang, nan ye langiu di bruk pacang cakak meng jalan haluk tal jalan kraong, khol dahlak jeng pathau khan ka rahra rilo jang, piah khik iek catang jang bruk nao saong mai di bhap bini, abih di nyu nan lac ngan haong dom urang bo drei oh thau mai daok dalam palei.”

Bahrau ni, UBND tỉnh An Giang hu harak pato tacei dom huyện, ban dalam tỉnh lac langiu di bruk ngak catang tui 5 paka di Mintri Y tế, njauk pataom tame khik iek catang jalan tapen negar oh caik ka manuac nao mai suan hukum. Tỉnh hu padang 16 labik taong ruak Covid-19, hu prein taong ruak ka 180 urang ruak. Gam haong nan jeng hu jalan padang ngak sang iek ruak dã chiến praong 300 manieng di huyện Châu Thành piah caga taduan saong taong ruak Covid-19 tuk hu menuac ruak; peih 50 labik daok karei pataom gauk hu prein taduan labaih 4.400 urang./.

Urang lang: Thu Thảo - 06/05