Công an tỉnh An Giang abih hatai tacei pato Công an dom jabat, peih ngak siam bruk cap mek kaol kanjah jhak

Meng puac thun 2020 mai ini, Công an tỉnh An Giang hu pataom tame taong tayah rilo bruk kanjah jhak ngak ka bhap bani duh hatai dalam rilo thun tapa. Bruk mesruh pacang kaol pablei salih pandap pakauk suan adat hukum jeng hu Công an tỉnh biak caik hatai sangka. Rilo bruk pablei salih pandap pakauk hu taong tayah, yau bruk pablei salih labaih 50kg ameh 24K, yaom labaih 70 tỷ đồng; bruk ngak tabiak pablei salih pandap ja saong pandar jien tỷ piah nduac, ba Akaok Công an tỉnh An Giang nao ngak labik karei…

Abih di nyu nan lac, meng bilan 9 thun 2020, công an tỉnh An Giang hu panuac rik daong ka Mban tacei pato 389 di tỉnh, pataom tame mesruh pacang kol pablei salih pandap pakauk. 8 tổ ngak bruk hu padang tagok, dalam nan bruk ngak praong rilo meng lac gah Công an. Tok kuhria meng akaok thun tal ini, dom gah pacang pablei salih pandap pakauk di tỉnh cap mek hu 500 mbang pajeng ba, pablei salih pandap pakauk ngan haong yaom jien mek hu labaih 9 tỷ đồng. Ong Lê Văn Việt Dũng, Phaok akaok Chi cục Hải quan pabah mbang negar pakat Dunya Vĩnh Xương, Cục Hải quan An Giang brei thau: “Bilan 9/2020, Mban tacei pato 389 padang 2 tổ pasang iek, Tổ ka 6 jalan radaih saong Tổ ka 7 jalan kraong, meng harei peih tabiak tal ini bruk pablei salih pandap pakauk di labik tapen negar oh daok rah tabiak rilo yau  dahlau daih, patrun hu 95% bruk pablei salih pandap pakauk tapa jalan tapen negar; Jien kak je pandap panda blei tame meng negar langiu hu labaih 110% bruk di Cục jao.”  

Đại tá Đinh Văn Nơi, Yam ndok Công an tỉnh An Giang brei thau, tapa dom bruk ini brei mboh, kaol kanjah jhak hu vaktu ngak bruk biak suai lavik, hu pambuak bruk khang kajap haong dom kapul nyaom karei gah diah negar saong rilo tỉnh bal karei dalam taneh aia. Anak tal, gah công an tỉnh brei ngak catang jang, taong ka nyu khang jang: “Khaol dahlak pambuak bruk haong Bộ đội Biên phòng, Hải quan haong dom jabat karei piah pataom tame mesruh pacang kaol pan akaok pablei salih pandap pakauk di tapen negar saong dalam taneh aia, cap khik taong abih dom urang pablei salih pandap pakauk dalam tỉnh An Giang; Anak tal meda pambuak bruk veik haong gauk piah ba tabiak jalan ngak, mesruh pacang haong dom kaol kanjah jhak. Gam haong nan brei jhul khang bruk daong ka raidiuk rahra, ieu dom kapul nyaom, manuac urang oh daong ka kaol kanjah jhak di bhum tapen negar”.

Meng tuk jit ruak Covid-19 tamuh tabiak, An Giang tuk halei jeng khik ramik 177 tổ, labik pacang cakak angaok jalan tapen negar, gam pacang caga jit Covid-19, gam pacang caga bruk pablei salih pandap pakauk. Piah mesruh pacang hu kaol kanjah jhak angaok jalan tapen negar, ong Nguyễn Thanh Bình, akaok UB bhap bani tỉnh An Giang ndom lac: “Bruk pablei salih pandap pakauk rah tabiak srau kadau di dom jalan tapen negar dalam tỉnh. Piah ngak catang jang, piah pacang caga bruk pablei salih pandap pakauk hu siam lagaih, dahlak caong lac dom gah yau: Biên phòng, Công an, Hải quan… pambuak gauk catang jang piah pacang cakak bruk pablei salih pandap pakauk tapa jalan tapen negar”

Urak ini, jit Covid-19 jeng daok tamuh khang, Công an tỉnh An Giang daok pambuak bruk haong gah Biên phòng, Hải quan, peih ngak dua bruk haong gauk nan lac gam mesruh pacang kol pablei salih pandap pakauk, gam ngak siam bruk pacang caga jit; gam haong nan, khik siam puk paga palei negar dalam bruk palih ruah urang ka Quốc hội mbang XV saong urang ka HĐ bhap bani dom pakat vaktu 2021 – 2026; khik kajap an ninh palei negar, khik siam rai diuk di bol bhap rahra. Ini jeng lac dom bruk prong, daong palaghaih piah cak rok patagok bruk ngak mbang, kinh tế di tỉnh./.

Urang lang: Jasi – 09/04