Sang sa-ai Huỳnh Ngọc Diện, daok di ấp Mỹ An 2, xã Mỹ Hòa Hưng, ban Long Xuyên, tỉnh An Giang hu labaih 2.000 m2 taneh ngak nong, bhian caik pala njam patam. Meng rilo thun dahlau, bruk pala ngak tui jalan ngak meng tangin, nan ye bruk pablei tabiak oh tani tanat. 2 thun gilac veik ini sa-ai Diện khang hatai salih tapa pala dưa lưới. Bruk pala dưa lưới pandar ilamu glaong hu daong paglaong yaom pandap ngak tabiak bo daok patrun takik jang dom bruk oh siam mai meng langik tasik, kuhria gam tukvak jit Covid-19 tamuh khang, baoh dưa  lưới di sa-ai jeng hu yaom kaom tani tanat: 

“Ngak tui ilamu glaong yau: sang màn, halăm pacang côn trùng palai kaik phun pala, pruh aia tanjaoh sit… tui ilamu di Israel. Pala dưa lưới, drei pambuak bruk haong công ty blaoh paje, nan ye yaom kaom tuk halei jeng tani tanat; mbang jit Covid-19 tamuh khang meng blaoh, bruk pablei tabiak jeng hu grap tanat, drei njauk ngak tui jalan ngak kong meng mek hu kein laba glaong...”

Huyện An Phú, lac labik akaok halau di tỉnh An Giang, dom thun mai ini, bilan aia ndik trun tagok oh lagaih, kayua yau nan ye, karja palei hu jak ba, daong ka urang nong salih dom mblang taneh ngak padai oh hu kein laba tapa ngak nong hu pandar ilamu glaong. Ong Trần Hòa Hợp, akaok UBND huyện An Phú, tỉnh An Giang brei thau, bruk ngak nong pandar công nghệ glaong, yaom lac mek hu siam lagaih dalam bruk ngak tabiak, min bruk pablei tabiak jeng daok gaok rilo kan kandah:

  “Dalam tukvak anak tal, piah patagok kinh tế meng bruk ngak nong, khaol dahlak meda pataom tame dom pren khang piah padang ngak kết cấu hạ tầng, kuac rok ribaong kraong, ngak jalan mbak nao mai  palaghaih ka bruk ngak nong cak rok patagok. Abih di nyu lac khaol dahlak meda pambuak haong dom doanh nghiệp, labik pablei tabiak pandap panda kaya nong… Piah daong ka urang nong langyah hu bruk pablei pandap panda kaya nong, patagok jien mek tame, paglaong rai diuk di bhap bani”.

Tal tukvak ini, tỉnh An Giang hu daong peih ngak labaih 400 bruk tui jalan ngak nong pandar ilamu glaong pak di dom xã. Dalam nan, pataom tame dom nyaom pandap hu pren khang yau; ikan tra, baoh kayau, njam patam... abih di nyu, hu dua dự án prong hu peih ngak nan lac: Dự án raong pala kaya ikan dalam aia ilamu glaong Bình Phú ngan haong mblang taneh 600ha, taong abih phun jien buh tame ngak lac 4.000 tỷ đồng saong Dự án “Raong limo mek aia tasau saong ngak tabiak aia tasau ilamu glaong” hu mblang taneh prong jaik 180ha di huyện Tri Tôn.

Thun 2021, kayua gaok kan kandah di jit ruak covid-19, dom bruk daong ngak kan si peih ngak. Kayua yau nan ye, gah ngak nong hu pataom tame cakrok patagok, pato pathram ka labaih 1.800 mbang urang jakar, urang ngak bruk di hợp tác xã, urang nong. Yau nan min, tui taong yaom di UBND tỉnh An Giang, yaom lac dom Sở, ngành, puk palei, doanh nghiệp saong bhap bani hu salih hatai saneng meng bruk ngak nong tapa kinh tế ngak nong. Min, akaok saneng di urang ngak nong ka bruk ngak nong ilamu glaong daok biar, dom labik pablei  pandap panda kurang tani tanat… Ong Trần Anh Thư, Phaok akaok UBND tỉnh An Giang brei thau: 

  “Tukvak anak tal Tỉnh ủy, UBND tỉnh meda pataom tame ka 2 bruk salih bahrau khang: ka sa  lac ba tame bruk ngak nong pandar công nghệ glaong; ka dua lac salih janih phun pala meng padai tapa njam patam, meng padai tapa phun mbang baoh jeng yau dom athur raong, janih phun pala karei. Daok phun padai, tỉnh jeng pataom tame salih meng padai tapa padai chất lượng glaong, pandar ilamu glaong tame bruk pala, ngak.”

An Giang jeng thau bruk ngak nong lac jalan ngak dalam cak rok patagok kinh tế. Dalam nan, patagok bruk ngak nong pandar công nghệ glaong lac jalan njauk ngak di bruk ngak nong bahrau. Kayua yau nan ye, tukvak anak tal, An Giang daok brei jhul khang bruk ramik ramik veik gah ngak nong, pataom tame cak rok patagok bruk ngak nong, kaya ikan pandar ilamu glaong, hữu cơ, an toàn sinh học saong hacih sa-at pandap panda kaya mbang, hu chất lượng saong kein laba glaong, duh ka darak pasar dalam negar saong pablei tabiak negar langiu./.

Urang lang: Jasi – 7/1/2022