Yaom khak nyu tagok meng puac thun 2020 tal ini, abih di nyu lac  URE, DAP, Kali

Bilan padai Hè-Thu meng blaoh, rilo urang nong dalam tỉnh An Giang meyah oh njauk khat lahik jeng oh hu laba. Yaom lac yau nan, min urang nong pak ini jeng kham merat yam tapa kan kandah, piah duah hu veik jien phun buh tabiak ngak, pataom tame ka bruk pala drak bilan Thu-Đông 2021 ini. Yau nan min, mikva urang nong thei jeng duh hatai kayua yaom pandap ngak nong tagok glaong, abih di nyu lac khak drak.

Ong Trương Công Bình, urang nong daok di xã Tân An, bal sit Tân Châu, tỉnh An Giang brei thau, oh ka tuk halei urang nong mboh yaom khak tagok tal having akaok yau urak ini. Dahlau diah, yaom dom janih janih pandap ngak nong jeng hu tagok, saong tagok mbiah. Min dom bilan jaik di ini, yaom khak tagok jaik dua mbang dut haong tukvak dahlau, ngak ka urang nong gaok kan kandah tuk pala drak veik. Ong Trương Công Bình khan lac: “Yaom pandap ngak nong, khak drak urak ini nyu tagok biak glaong, abih di nyu lac khak đạm Urê, sa mbao nyu tagok tal 670 rabau đồng. Dahlak caong khin gah chức năng ramik yaom trun veik ka mikva urang nong uan hasit, yaom khak glaong yau nan, yaom padai trun biar ye urang nong njauk khat lahik,  oh laba hu."

Hu thau, yaom khak nyu tagok meng puac thun 2020 tal ini, abih di nyu lac  URE, DAP, Kali. Makna lac pandap tamo piah ngak nyu tagok yaom, kayua bruk pabak pandap piah ngak di dunya trun meng kan kandah di jit ruak Covid. Taphia di nan, jien pajeng ba angaok tasik tagok biak khang dalam tukvak tapa ngak ka  yaom dom janih khak tagok glaong. Urak ini yaom khak di dom labik pablei pandap ngak nong di tỉnh An Giang yau: DAP blei meng Philippines hu yaom tagok tal jaik 1 triệu đồng sa mbao, DAP Trung Quốc (janih asal hijao) labaih  900 ribau đồng sa mbao; yaom NPK daok di tanut meng 830 ribau tal 870 ribau đồngsa mbao. Daok yaom dom janih urê (khak đạm) meng 600 ribau tal 670 ribau đồng sa mbao. Dalam tuk nan, yaom khak Kali jeng daok di tanut biak glaong.

  Ong Lê Khắc Chuyên, Po labik pablei khak, jru khik caga phun pala xã Phú Thạnh, huyện Phú Tân brei thau, yaom kaom dom janih pandap ngak nong tagok glaong, abih di nyu lac khak tagok tal 72%, urak ini yaom khak daok di tanut glaong abih dalam 4 thun mai ini:“ Yaom khak urak ini, dut haong thun blaoh nyu tagok tal dua rituh dom pluh ribau sa mbao, bo khak nan lac khak ngak dalam negar; drei saneng lac kayua jit ruak, sang mac ngak takik jang tuk oh ka hu jit, gaok tuk mai brei patrun meneing urang ngak…khak pablei tabiak oh ginup, nan ye yaom biak glaong ”

Tui Sở Ngak nong saong patagok palei pala tỉnh An Giang, tui kuhria, khak pandar dalam bilan padai Thu-Đông ini dalam tỉnh lac jaik 89 ribau tấn;  Langiu di bruk duah dom jalan patagok labik pabak khak, meng akaok vụ, gah ngak nong tỉnh An Giang hu panuac kakei, pato tacei urang nong dalam vụ Thu-Đông, peih ngak siam ilamu khik iek jit ruak yau: IPM, “3 trun, 3 tagok”, “1 njauk, 5 trun”, caik hatai brei trun takik pajaih pala drak daok meng 80-100kg sa ha, oh daok ngak yau dahlau diah lac meng 150-180kg sa ha. Dalam nan, caik hatai jhul khang bruk pandar công nghệ sinh thái, pala bingu angaok ar hamu piah dui pachreih thiên địch, trun takik di abih bruk pandar jru pametai halak dalam tukvak 40 harei camereip hadei di tuk trun pajaih… Gah ngak nong patagok bruk pathau khan, tacei pato urang nong pandar jru khik caga phun pala tui jalan  “4 njauk”… Ong Trương Kiến Thọ, Phaok akaok Sở Ngak nong saong patagok palei pala tỉnh An Giang brei thau. “Hu bruk tacei pato di UBND tỉnh, gah ngak nong peih ngak dom bruk: ka sa gah khik iek karja, hu tacei pato thanh tra di gah ngak nong gam haong Sở Công thương, Khik iek darak pasar…peih dom mbang pasang iek dom doanh nghiệp, đại lý khak pakat sa, pakat dua…Dom doanh nghiệp, đạị lý jeng hu sanya oh padauk pandap, pataom piah. Gah ngak nong jeng kham merat daong ka urang nong peih ngak dom sarak pambuak pagam, pablei pandap”.

Piah patrun bruk tagok yaom glaong yau ini, dom gah chức năng njauk patagok bruk khik iek chất lượng pandap ngak nong, langyah catang bruk pablei pandap ja, pandap oh siam saong bruk padauk, pataom khik piah pandap, bluh yaom tagok glaong; pachreih urang nong pandar dom ilamu bahrau tame bruk ngak nong tui jalan takik pandar khak hóa học, patagok bruk pandar khak hữu cơ, daong ka mikva trun meneng jien buh tame min jeng daok duah hu laba./.

Urang lang: Jasi – 21/10