Rilo mblang hu yuak bloh min oh hu urang blei 

Bilan Hè Thu ni, huyện Tịnh Biên ngak jiak 17.500 ha padai, urak ni, jaik  70% mblang hamu hu yuak bloh. Tui mik va urang nong, yaom lac huyện dok peih bruk paatah di gauk, min hu bruk dong di gah ngak nong huyện song karja palei, nan ye, bruk yuak song pajeng padai biak mbuan lagaih. Ong Trần Văn Xuân, akaok kapul pambuak bruk pala ngak, xã Tân Lập, huyện Tịnh Biên lac:

“Jit ruak rah tabiak kan kandah, min hu jabat ngak nong huyện song Đảng ủy, UB bhap bini xã Tân Lập dong ka công ty mai blei; dong harak gar ka menauc mai cakon padai … Pak ni, Tổ pambuak bruk kol dahlak hu labik mbang, labik dok ka urang cakon padai song urang ngak di công ty, oh cang nao mai piah blei padai ka urang nong”

Yaom blei padai urak ni dok trun, dom pajaih padai OM 9582, OM 5451, OM 18 yaom meng 4.200 – 5.000đ sa kg; IR 50404 yaom meng 3.800 – 4.200 đồng sa kg; ndiuk yaom meng 4.000 – 4.600 đồng sa kg. Dom urang nong ndom lac, yaom padai trun lac kayua paatah di gauk, bruk nao mai kan kandah, taphia di nan, daok kayua urang blei kateik yaom...

Ong Trương Kiến Thọ, Phaok akaok Sở ngak nong song patagok palei pala tỉnh An Giang brei thau, jit ruak ngak kan kandah tal bruk pala drak saong labik pablei dom janih kaya nong di tỉnh, dalam nan hu padai. Sở ngak nong song patagok palei pala hu pambuak bruk hong karja palei song dom jabat pagam tal samar peih talaih, langyah dom kan kandah piah dong ka urang nong pala song pablei kaya nong hu mbuan lagaih, khik caga tani tanat, siam mekre, pacang caga jit ruak:

  Urak ni, An Giang dok hu hajan, padai oh siam nan ye yaom trun, yaok thun jeng yau nan. Daok thun ni kayua Covid nan ye dak kan jang, yaom padai daok trun veik, kayua pajeng ba nao mai kan kandah. Nan ye tỉnh An Giang dok kham merat pambuak bruk song dom doanh nghiệp piah blei, dong ka urang nong, ngak habar urang nong pablei padai hu yaom siam di abih

Tui Sở ngak nong song patagok palei pala tỉnh, bilan Hè - Thu thun ni, An Giang ngak jiak  230 ribau ha padai, nduik. Kuhria tal harei 3/8, dalam tỉnh yuak hu lalaih 120.300 ha, lac jiak 53%; năng suất hu 5,8 tấn/ha. Tui kuhria  tal abih bilan 8 ni, tỉnh brei yuak abih dom mblang hamu padai, ndiuk dok veik  . Dalam tỉnh urak ni hu 12 doanh nghiệp, Cty blei padai ngan song taneh prong labaih 15.600 ha, dalam nan: Công ty Cổ phần Tập đoàn Lộc Trời pambuak bruk jiak 12.000 ha, dom doanh nghiệp dok peih bruk pambuak gauk song blei padai.

Ong Nguyễn Thanh Bình, akaok UB bhap bini tỉnh An Giang brei thau, jit ruak Covid-19 dok rah tabiak srau kadau, dalam tỉnh jeng hu rilo urang njom song tỉnh dok peih bruk paatah di gauk tui sarak  16 di Thủ tướng rajaei, nan ye, kan kandah tal bruk yuak, pablei padai saong kaya nong. UBND tỉnh hu ba mbuan lagaih di abih ka bruk yuak,, blei, pablei kaya nong , abih di nyu lac padai bilan Hè Thu, min dom bruk ni brei khik hu bruk pacang caga jit.

Meng srau kadau yau urak ni, jit ruak Covid-19 meda dok dui atah, nan ye UBND tỉnh dok khik ramik, pasaim saong pakhang “Kapul ngak bruk samar drah”; hu jalan ngak saong jalan caga piah langyah dom kan kandah dalam bruk yuak, blei, pablei kaya nong. Pambuak haong  rilo gah dalam tỉnh piah dong mik va yuak padai; pambuak bruk song dom doanh nghiệp prong piah blei; patagok khang jang bruk pambuak gauk  pablei tapa rilo jalan, abih di nyu nan lac pablei salih điện tử.

Urak ni, tỉnh An Giang dok tame tuk vak tabung glong yuak padai Hè-Thu, ni jeng lac tuk vak tỉnh dok peih bruk paatah di gauk tui sarakn16. Meng thau caga dahlau, sami samar di dom gah hu pagam tal song dom puk palei, jia lac bruk yuak mek, pajeng ba, abih di nyu nan lac pablei padai di mik va urang nong meda rah tabiak siam lagaih, trun meneing kan kandah ka urang nong./.

Urang lang: Hanipha- 13/8