Huyện Chợ Mới, tỉnh An Giang lac sa dalam dom labik bhian rah tabiak bruk glut jaleih taneh tapen kraong. Yam tame akaok bilan hajan, dalam huyen gam gam rah tabiak bruk glut jaleih taneh biak trak, mbuan ba tal metai manuac, lahik drap ar saong kan kandah raidiuk di bhap bini. Birau ini, harei 8/6, rah tui takai kraong Ông Chưởng kayua jalan 946 glut jaleih atah labaih 60met, ngak ka 11 baoh sang bhap bini njauk panduan nao labik karei chip. Daok di  xã Mỹ An hu 3 labik glut jaleih atah jaik 100m. Ong Phạm Nhựt Thanh, Phó Akok UB bhap bini xã Mỹ An brei thau:“Jalan tuh menyek glut labaih 30cm, mbang dalam tame labaih meteh jalan, ngak kan kandah tal bruk nao mai. Xã padang dom biển báo brei thau piah takik nao mai, gam haong nan brei rami ramik, jah tak phun kayau, tuh patau ngak jalan ka mikva.”

Oh ka tal sa bilan hajan thun ini, dalam tỉnh An Giang rah tabiak jaik 10 mbang glut jaleih praong, sit. UB bhap bini tỉnh hu tacei pato dom puk palei pambuak bruk haong dom sở, dom gah pambuak tal  kham merat peih ngak dom jalan njauk ngak, piah patrun patakik khat lahik drap ar. Ong Tô Hoàng Môn, Phaok Yam ndoc Sở Tài nguyên môi trường tỉnh brei thau, sở hu panuac ieu karja dom labik hu taneh mbuan glut jaleih brei ngak dom jalan pacang caga glut jaleih yau: takik pajeng trak angaok jalan; pakauk  atau takik brei radaih nao mai, brei yah sang, gilang pandap trak di tapen kraong:“ Sở brei urang jakar di Pasak quan trắc nao pasang iek, duah thau, dut iek blaoh tabiak panuac piah bhap bini, karja palei hu jalan langyah anak meta. Yaok thun hu 2 mbang pasang iek di bilan thu piah brei thau dahlau ka bilan ia ndik, hadei di ia ndik ye pasang iek veik piah brei thau dahlau ka bilan thu thun hadei.”

Urak ini dalam tỉnh An Giang hu labaih 50 labik kraong mbuan glut jaleih, jaik 20.000 baoh sang njauk panduan nao labik karei. Ong Trần Anh Thư, Phaok akaok UB bhap bini tỉnh An Giang brei thau, bruk langyah labik glut jaleih di dom kraong praong yau: kraong Tiền, kraong Hậu, kraong Vàm Nao tui kuhria meng ini tal thun 2025 meda ngak salah. Tỉnh hu jalan panduan ba dom baoh sang di labik mbuan glut jaleih rilo tal 7 cụm tuyến  labik daok di bhap bini. Tui ong Thư, bruk mbeik veik jalan ia nduac dom kraong praong nan lac sa dalam dom jalan pacang caga glut jaleih hu siam lagaih abih .

“Oh ta-eng An Giang bo khol dahlak sahaneng lac Bhum taneran kraong Cuu Long jeng yau nan, njauk mbeik veik jalan ia nduac piah takik glut jaleih. Daok suai lavik, brei rami ramik labik daok ka bhap bini, dom danak dak praong jhui padang tapen kraong, nan lac jalan ngak suai lavik.”

Tui dom urang ilamu, piah pacang glut jaleih taneh di Bhum taneran kraong Cuu Long brei hu jalan ngak ka abih dalam bhum, yau: takik brei trak takai kraong; panduan ba rahra tabiak truh labik tapen kraong; duah jalan ngak tabiak pandap padang ngak  hanjol, salih ka cuah piah patrun bruk kuac mek cuah dalam kraong. Ini lac bruk praong, njauk brei hu bruk pambuak gauk di dom mentri, dom gah. Ong Dương Hồng Sơn, akaok Viện Khoa học kaya ia, Mentri Tài nguyên saong Môi trường lac:“ Brei hu jalan piah trun takik bruk kuac mek cuah; quy hoạch, takik padang ngak, takik ngak sang daok di tapen kraong. Suai lavik, brei takik ngak dom jalan tỉnh, huyen tapen kraong, kayua radaih tagok biak samar, biak rilo, dom radaih pajeng trak  peih nduac di jalan tapen kraong ye ba tal glut jaleih”

Anak meta mboh lac dom thun tapa, bruk glut jaleih tapen kraong, ribaong biak khang; bruk pasiam veik glut jaleih abih biak rilo jien, hu dom bruk abih tal yaok ribau tỷ đồng. Meda lac tal tuk dom mentri, dom gah saong karja palei brei patagok rilo jang bruk pasang iek quan trắc, dut iek dahlau, ba tabiak jalan langyah tal labik tal dhua, pakhang bruk panduan ba sang bhap bini daok tapen kraong nao labik karei. Oh luai caik ka bruk pacang caga glut jaleih lait miat tame bruk pagap yau “lahik limo meng kuhria ngak var” yau urak ini./.

Urang lang: Ai Nghiem - 1/7/2021