Jak ba rilo gah hu mbaok tame pacang caga jit ruak 

An Giang urak ni dok dalam bruk pacang caga jit bahrau, tuk dom menuac njom Covid-19 dalam bhap bini tagok rilo dalam dom harei tapa. Ong Nguyễn Thanh Bình, Akaok UBND tỉnh An Giang brei thau, anak bruk ni , tỉnh brei ramik veik jalan pacang caga jit ruak ; pataom tame ka bruk brei thau, pathau khan piah paglong hatai sahneng di bhap bini; salih jalan ngak meng khik iek bhap bini tapa pathau khan ka bhap bini eng drei khik rup drei; ngak tapuk pataom panuac tacei pato bhap bini dom jalan eng drei pacang caga jit biak katut panak, mbuan thau, mbuan ngak. 

Gam haong nan, tỉnh peih bruk ba urang y tế mai dong ka dom puk palei pacang caga jit. Ieu pataom dom y, bác sĩ padeih hưu atau dok ngak bruk di dom sang iek ruak haong labik y tế dalam tỉnh piah padang dom kapul tacei bruk y tế, tacei jalan dong ka urang dalam bruk pacang caga jit. Ong Nguyễn Thanh Bình brei thau:

"Jit ruak di An Giang njom mbak biak samar song biak mbuan metai lahik rilo. Kayua yau nan ye, di tukvak bahrau, kol dahlak hu jalan ngak bahrau, kol dahlak padang dom kapul tacei pato, hu dom y, bác sỹ padeih hưu piah tacei pato song ba tabiak dom jalan ngak siam lagaih dong ka puk palei dalam bruk mesruh kan kandah ni dik tuk vak anak tal. Gam haong nan, kol dahlak padang dom kapul pasang iek, ba abih F0 tabiak truh bhap bini, ngak catang oh caik ka jit ruak njom mbak meng gah langui tame. Khang hatai khik bhum hajao, palahik menieng bhum bhong song bhum kam”

Urak ni, di 2 huyện An Phú song Châu Thành - lac 2 labik pandiak ka jit ruak di tỉnh, gah công an pambuak bruk song bol lin, y tế dok samar peih dom jalan ngak khang, khik catang dom sruh jit, peih bruk dut iek realtime RT-PCR mẫu gộp piah mek abih dom F0 tabiak truh bhap bini. Dom puk palei jeng pasang iek catang meng palei tal  xã, ngak catang bruk pacang caga jit; pataom dom pren khang, pabak ginup pandap mbang huak piah ka bhap bini daok di sang, pasang iek song jhul kadun likuk jit ruak samar di abih. Ong Mai Tùng Thiện, Bí thư Đảng ủy, Chủ tịch UBND xã Quốc Thái, huyện An Phú, lac:

"Tui tacei pato di pakat angaok, hu jak ba dalam song langui tỉnh, labaih 2 tấn njam patam,boh karaoh,brah song dom pandap mbang karei piah pabak siam ka mik va tuk paatah gauk daok di sang. Brei mặt trận song dom kapul nyaom nao tal yaok boh sang piah ba brah song pandap mbang huak, oh caik pataom rilo menuac, piah khik hu siam bruk pacsng caga jit"

Langui di 2 huyện nan, urak ni, dom puk palei dok samar dut iek rilo piah ba F0 tabiak truh bhap bini, meng nan padang jalan pacang caga jit piah khik ramik, tui iek, peih bruk ngak catang, pataom sit veik “bhum bhong”, “bhum kam”, “bhum katam”, khik caga song peih prong “bhum hajao”; oh iek lap.

UBND tỉnh tacei dom puk palei daok pandar Sarak 15 di Thủ tướng rajaei di An Giang jhui iek lap, bruk pasang iek brei ngak catang, ngak njauk tui bruk pacang caga jit ruak, yam tal pasang iek song jhul kadun lakuk jit ruak samar drah di abih. Gam haong nan, mek dom sang padeih padei, khách sạn ngak labik brei dok karei ka dom F0 oh mboh hagait song dom F1 piah patrun prein ka dom labik brei dok karei patom rilo, patakik bruk njom mbak nao mai song pabak hatai caong di bhap bini. Taphia di nan, jabat chức năng pasang iek, khik kajap bruk khik ramik di dom labik brei dok karei biak catang, peih bruk sàng lọc, neh tabiak dom nyaom mbuan si njom ruak piah brei daok karei ka nyu lagaih, oh caik rah tabiak njom mbak  tapa gauk dalam labik brei dok karei./.

Urang lang: Hanipha- 1/9