Mai rivang sang bac Tiểu học Lạc Trị, sa sang bac hu rilo anek kamuan urang Cham dok di xã Phú Lạc, huyện Tuy Phong, tỉnh Bình Thuận dalam dom harei bilan 11 ni, khol hulin biak iek praong tuk mehit khan veik dom bruk ngak hu  di gru song saih labik ni. Dom bruk ngak hu nan nyu pambuak pagam song anai gru Bích Thị Triệu - dahlau deih ngak hiệu trưởng sang bac, urak ni salih tapa labik karei. Dahlau di thun 2000, labik pato saong pandap panda pato bac di sang bac tiểu học Lạc Trị dok kurang, takik, jalan pato pakai di dom gru oh ka lagaih song anek saih bangsa takik. Bruk ngak mbang di amaik ame anek saih dok kan kandah, nan ye bruk bac daa di dom adei takik hu sangka. Lingiu di nan, kayua dom adei oh ka thau sap Yuan ba tal bruk bac da-a daok suai damuai.

Anak dom kan kandah nan, lac urang dang akaok sang bac song jeng lac menuac di palei, anai gru Bích Thị Triệu sahneng duah jalan ngak yau habar piah patagok bruk pato saong bac di sang bac di drei. Piah dong ka dom anek saih Chăm labik ni mbuan bac, mbuan thau, anai gru song dom gru pato di sang bac padang mô hình “ salih bahrau jalan pato pakai” meng bruk ngak pandap pato bac, roh duah thaot binguk meng dom cuốn lịch klak hu asar kadha pagam tal kadha bac, hadei di nan patagok chất lượng pandap pandar meng in ấn, pandar bìa sambo, hu ép nhựa. Gam saong nan, brei padang gilang tapuk sang bac song rilo jalan ngak yau:  gilang tapuk hajao, gilang tapuk tal bac, gilang tapuk mini di động, dong ka anek saih nyim tapuk bac piah patagok bruk thau sap Yuan ka dom adei. Anai Bích Thị Triệu khan lac:

(Băng tiếng Chăm:.)

Meng dom mô hình ni, bruk pato saong bac di sang bac hu siam mekre jang. Yaok thun, anek saih joi, anek saih tagok tal bac di sang jeng hu samu atau rilo jang bruk ba tabiak, bruk pato pakai di gru meng khá tagok. Ndom ka bruk rik dong di anai Bích Thị Triệu brei ka gah pato megru di palei drei, Amuk Nguyễn Thị Thảo – chuyên viên Phòng Giáo dục song Đào tạo huyện Tuy Phong, tỉnh Bình Thuận lac:

Anai Triệu hu rilo hatai sahneng bahrau dalam bruk pato pakai jang yau bruk khik ramik, dalam nan njauk ndom tal bruk ngak pandap bac meng dom vật liệu thô sơ hu dom cei gru nai gru song anek saih ba gauk ngak. Bloh anai Triệu song hội đồng sư phạm sang bac Lạc Trị padang mô hình pato song bac meng dom pandap pato bac song bac nyaom. Dom bruk ngak gheih tra lac pato bac tui tư duy song pato bac meng dom panuac ndom puac di bangsa, meng dom thaot binguk bangsa piah patagok sap ndom ka anek saih. Biak jiak song anek saih bangsa takik di Tuy Phong jang yau tỉnh Bình Thuận.

Dom jalan ngak bahrau dalam pato pakai di anai song dom gru pato di sang bac jeng hu pakat huyện song pakat tỉnh pok meyaom saong hu rik dong patagok chất lượng pato pakai ka bhum urang Chăm. Meng dom siam mekre mek hu dalam rilo thun gam, sang bac tiểu học Lạc Trị hu mintri pato megru brei harak meyaom kayua hu thành tích xuất sắc dalam bruk “ Sang bac siam mekre, anek saih tari taring”. Sang bac kham merat lac labik hadah dalam tỉnh song hu dom tỉnh, ban karei mai bac megru,  dalam nan hu dom negar jiak taphia yau Lào, Camphuchia jeng mai ini bac megru ilamu. Ndom ka bruk ngak di anai Bích Thị Triệu brei ka sang bac, anai Nguyễn Thị Kim Loan, Phó Hiệu trưởng sang bac Tiểu học Lạc Trị brei thau:

Anai ba abih hatung hatai ka bruk pato pakai, ka anek saih bhum bangsa di drei. Meng hatung hatai di anai bo abih gauk jum pataom, ba gauk ngak, tapa nan taduan hu harak meyaom di mintri pato megru ka mô hình “ Sang bac siam mekre, anek saih tari taring”. Yaom lac anai salih tapa ngak di labik karei, min dom thaot binguk, dom pandap panda bac daa song dom hatai sahneng di anai, khol hulin daok ngak tui biak siam. Song khol hulin jia lac dalam dom thun anak tal, khol hulin njauk patagok rilo jang mô hình “Sang bac siam mekre, anek saih tari taring”.

Dalam 29 thun ngak bruk, 20 thun gam anai hu huyện pok brei angan lac Chiến sĩ thi đua cơ sở ; 5 thun gam taduan hu harak meyaom di Liên đoàn Lao động tỉnh “ Joi bruk taneh ia, gheih bruk sang danaok” song rilo harak meyaom karei karei di gah pato megru. Anai oh lac sa anai gru njauk iek prong iek glong di dom rai rah anek saih, tuk halei jeng hu dom gru pato anit ranam, bo dok lac sa urang jakar khik iek chuyên môn di tỉnh, di huyện.

Dalam thun bac 2015- 2016 ni, meng bruk abih hatai jai ka bruk pato song ilamu livik thun di sa gru pato, anai Bích Thị Triệu hu pakat angaok jia tame song brei nao ngak bruk di bhum urang Chăm di xã bhum glong Phong Phú, huyện Tuy Phong, tỉnh Bình Thuận. Di labik ngak bruk bahrau, anai Bích Thị Triệu daok patagok hatung hatai siam mekre di urang gru pato bhap bini, rik dong ka bruk dak padang song patagok bruk pato megru di tỉnh Bình Thuận, jang yau di taneh ia./.