Menek tabiak saong prong tagok di Nam Định min anai gru Bùi Thị Nhung palih ruah Khánh Hòa piah padang mbang angui. Thun 2002, hadei di tuk bac tamat blaoh sang bac Cao đẳng Sư phạm Nha Trang, anai gru Bùi Thị Nhung hu ba nao ngak bruk di sang bac Tiểu học Cam Thịnh Tây, blaoh Sang bac Tiểu học Suối Cát, huyện Cam Lâm, tỉnh Khánh Hòa. Thun 2008, anai Nhung halar hatian likau tabiak pulao Trường Sa prong piah ngak bruk. Anai gru Bùi Thị Nhung khan lac: “Akaok mereip sang dahlak suh sah ralo, oh thau rai diuk langiu Trường Sa nan nyu yau habar saong tabiak nan ngak bruk ye mbuan laghaih halei oh min hu pasang pachreih ba saong halar hatian nao haong diuk tabiak langiu nan ngak bruk”.

Rai diuk bahrau di labik pulao atah oh mbuan laghaih ngan haong anai gru daok ranaih. Yaom lac sahneng mboh dahlau dom kan kandah, min tuk yam takai tal pulao, anai Nhung biak tatuak drei kayua pak ini oh lac kurang cơ sở vật chất bo langik tasik jeng biak kan kandah. Min anai oh nản chí bo tapa nan mboh anit dom anek saih pak ini jang saong kham merat ba abih pren yava di drei piah pato pakai dom adei sit. Gru Nhung gam ngak hiệu trưởng, gam ngak gru chủ nhiệm di 5 tal bac. Piah hu tài liệu pato pakai, anai hu nyim gauk gar, ayut sahabat di palei roh duah blaoh payua tabiak pulao piah ka anai gru haong anek saih tham khảo.

Oh lac yau nan saoh, di labik akaok angin jung riyal ini, langiu di bruk pato, anai Nhung daok lambaok amaik ame di dom adei kuhria bruk mbang huak, ndih daok ka dom adei. Langiu bruk pato akhar haroh ka dom adei sit, anai daok pato pakai dom adei htai ranam pulao tasik, ranam taneh aia palei negar, tapa dom dalikan, dom kadha daoh dalam tuk ngoại khóa. Anai Nhung brei thau: Anek saih langiu nan salut mbut saong biak pang tui anai gru, dom harei padei, dom kamuan oh thau ngak bài tập jeng nduac mai sang anai, anai mboh biak haniem phol. Mikva lingiu nan biak siam hatung, tal harei 20/11 mikva paik dom bingu njam puan tasik piah ba mai brei ka anai saong ngak lisei daa anai gru mai huak. Rai diuk langiu nan tuk halei jeng sangka iek glang tal guak, mong gauk yau adei sa-ai dalam sang.

Langiu dom bruk ngak abih hatai ka bruk pala manuac, anai Bùi Thị Nhung daok hu mbaok tame dom bruk xã hội. Dalam angan lac Phaok akaok Hội đồng bhap bani saong akaok kapul urang kumei bal sit Trường Sa, anai gru Nhung tuk halei jeng ngak siam bruk hu jao brei. Amuk Nguyễn Thị Nhung, Akaok kapul urang kamei tỉnh Khánh Hòa brei thau: “Yaom lac daok ranaih min anai Nhung biak tari taring, sami samar. Anai Nhung ngak siam bruk di sa gru pato. Lingiu di nan, Nhung daok lac sa akaok dhar kapul abih hatai tuk halei jeng ba akaok nao dahlau dalam bruk ngak di hội dalam tukvak daok di langiu pulao. Kadha nan hu brei mboh lac pakat ủy karja  palei ba anai Nhung tame Đảng, jeng sa dalam dom urang đảng ranaih abih di pulao”.
      Meng dom bruk ngak abih hatai jai yau nan, anai gru Bùi Thị Nhung hu pok meyaom di Nyaom roya pakacah gauk anit ranam taneh aia “Urang kamei kham merati bac megru, ngak bruk, dak padang baoh sang haniem phol” di Trung ương Kapul urang kamei Việt Nam./.