7 tuk page, anai gru haong anek saih labik sang bac mầm non Chư Knông hu mbaok ginup abih pak tal bac piah bac dom kadha daoh bahrau. Tal bac kayua anai gru Rcom H’Duit dang akaok hu 30 kamuan sit nan lac urang bangsa Ja Rai. Yaom lac bahrau 4 thun, min kamuan halei jeng ndom saong daoh cambaih dom kadha daoh meng sap YUAN. Dalam tal bac, langiu kik daok hacih sa-at, dom kamuan daok hu ralo pandap ma-in, hu ba-ar tauk, sambo màu vẽ, haluk tapat piah pandar tame dom kadha ma-in bo drei takre. Sa-ai Rah Mah H’ Nơm, urang daok di palei Chư Knông brei thau, urak ini sang halei dalam palei jeng hu anek sit, jeng sahnang hatai payua anek pak sang bac mầm non, sahnang hatai kayua dom kamuan hu iek glang, haniem phul kayua dom kamuan dak harei dak siam mekre. Hu yau ini mai meng hu anai gru H’Duit: “Dahlau diah pak ini oh thau nao bac mẫu giáo kayua rambah lô, tok khin nao ngak duah jien min. Meng hu anai gru Duit mai tal sang jak ba, ndom ka drei thau nao bac hu bac akhar huroh, hu sang bac sangka, daong brei jien mbang jala pandiak. Drei mboh anek drei hu nao bac mẫu giáo biak siam, nan ye drei takre ralo.”

Anai Duit khan lac, 28 thun dahlau, harei camerteip mai Chư Knông pato bac, oh hu sang halei brei anek nao bac mẫu giáo, anai gru njauk nao tal yaok baoh sang piah langyah saong jak ba. Tuk hu dom anek saih akaok meti nao bac, anai Duit nyim ala sang tol di mikva Chư Knông, blaoh dak kapal ngak bàn bac, mek hala kayau ngak kik daok ka anek saih. Ngak yau nan, blaoh gru saong saih pathram daoh, bac tamia saong ma-in dom kadha ma-in. Sang bac mầm non ala sang tol tuk halei jeng ba sap ndom sap klao di uranaih saong jeng labik bui sambai abih dalam palei. Kadha bui sambai meng tal ba nan hu pabak pren khang daong ka anai gru yam tapa jalan atah, craoh dalam, khik tal bac. Anai gru Rcom H’Duit khan lac: “Jalan nao biak kan kandah, nao pato njauk ba tui 2 bộ khan ao piah tapa craoh. Drei tapa, drei nao radeic radeic, pandap pato bac, drei njauk pal 2 tangin saong yein tagok glaong. Nao tapa craoh, drei duah mbu kayau, blaoh drei thay khan ao. Aia biak dalam, meyah hu hajan ribuk, dahlak jeng nao tal tal bac, kayua daok pak sang biak uan anek saih.

Bruk kham merat abih hatai jai saong hatung ranam ranaih di anai gru Duit hu ngak megei hatai bhap bani palei Chư Knông. Atah di ini 3 thun, bhap bani halar hatian brei taneh, rik jien, buh pren yava daong ka anai gru padang ngak sang bac hu paga pasei, mblang xi măng saong 4 duk bac khang kajap. Hu tal bac laneng lanoi, siam mekre, anai gru Duit daok nao tal dom palei jaik taphia piah jak ba bhap bani brei anek nao bac, “phổ cập mầm non” pak xã kathaot Ia Hiao.

Jien bac amaik ame di anek saih tok buh tame 200 ribau đồng sa thun sa anek saih oh ginup piah blei pandap pato bac, anai Duit jak ba dom anai gru dalam sang bac rik pataom jien (bac) blei ba-ar tauk, màu, ba-ar vẽ,… eng drei ngak pandap pato bac, pandap ma-in ka uranaih. Langiu tukvak pato, anai Duit daok bhian nyaom amaik ame di anek saih piah khan brei thau ka jalan ngak pandap mbang huak, patagok hàm lượng dinh dưỡng dalam van mbang huak yaok harei, piah plaih bruk uranaih suy dinh dưỡng.

Dom rik daong di anai gru urang Ja Rai Rcom H’ Duit angaok bhum taneh kan kandah Chư Knông hu gah pato megru tỉnh Gia Lai thau meng ralo harak meyaom, phần thưởng saong angan Chiến sĩ thi đua ralo thun gam. Daok bhap bani dalam palei pok meyaom dom rik daong nan meng hatai anit ranam, jia tui dalam luac yaok pluh thun tapa. Ndom ka anai gru Rcom H’Duit, amuk Võ Thị Minh Tuyết, Phaok akaok sang bac Mầm non Họa Mi, xã Ia Hiao, huyện Phú Thiện brei thau: “Anai Rcom H’ Duit biak sangka tal anek saih. Pagap yau tal bilan yuak kuak, anek saih njauk tui amaik ame tagok apuh, ye anai daok veik dalam palei. Anai nao tal yaok baoh sang piah jak ba amaik ame brei anek daok di sang nao bac. Meyah amaik ame rik takik jien, ye anai njauk buh jien kadung drei tabiak piah ngak pandap pato bac duh ka bruk pato di drei. Taong abih anai gru mầm non thei thei jeng abih hatai yau anai… ye njauk ndom lac gah bac mầm non meda cakrok patagok.”

Yaom lac daok pak labik biak kan kandah, min sang bac mầm palei Chư Knông, xã Ia Hiao hu yam tagok jeng sa dalam dom labik hadah di gah mầm non huyện Phú Thiện saong tỉnh Gia Lai. Pak dom sang bac yau nan, dom kareih camin abih hatai ka bruk ngak saong ranam ranaih yau anai gru H’Duit nan lac baoh bingu hadah mekre daok harei melam gandang gandi dak padang bruk pato megru di bhum taneh Tây Nguyên./.

…………..