Thu Thảo tuk halei jeng thar var haong bruk ngak di drei 

Trần Thị Thu Thảo brei thau, meng di tuk Sở Y tế tỉnh Đắk Lắk haong mBan Giám hiệu sang bac tabiak panuac ieu sinh viên nao pacang jit dịch, Thảo oh huac hagait, tut angan nao haong hatai caong khin rik hasit prein yava di drei tame bruk mesruh pacang Covid, gam haong gah y tế Tỉnh samar jhul kadun likuk jit ruak, raidiuk hu siam mekre veik yau dahlau.

Hadei di tuk tut angan ngak urang halan hatian, Thảo hu brei bruk mek mẫu Test samar saong daong klauk Vaccine di Bilai y tế xã Hòa Phú, ban sit Buôn Ma Thuột. Yaok harei, anai haong kapul urang y tế nao mek mẫu test samar dom menuac eng drei daok karei di sang tui jalan "Nao tal yaok labik, taih pabah mbang yaok sang". Kayua labik daok parai rai, bhap bini bhian eng drei daok karei dalam puh di sang, ngak ka Thảo haong dom ayut sahabat gaok oh takik kan kandah, glaih glar kayua jalan atah, kan nao mai, oh bhian randap haong jalan mbak, dom hamu puh daok biak atah di gauk…gam haong bruk cuk pandap khik caga rup pabap di pandaik khang dalam rilo mon, biak glaih glar kayua ia hauk tabiak bak rup, mahu ia, hu tuk daok mebuk pandiak tal having akaok. Min meng hatai kham merat, Thảo oh kadun likuk.

Thảo khan lac: "mboh hu bruk bui sambai di rahra ngak ka drei hu pabak prein khang piah yam nao, yaok mbang dut iek bloh mboh "âm tính" lac dom mbang hatai adei raak binguk, caong lac jit samar abih piah ka raidiuk hu mai veik siam mekre. Tuk nao tal labik bahrau jeng mboh oh bhian randap saong kurang rilo janih, min taduan hu bruk sangka daong brei abih drei di bhap bini saong dom sa-ai ngak gah y tế labik ini, adei mboh biak bui sambai, hatai uan sang jeng trun hu meneing. Njauk lac "Hatung hatai brei nao, anit ranam mai veik", adei oh var hu dom harei bilan biak hu makna bo oh njauk lac urang halei jeng hu yau ini".

Langiu di bruk nao mek mẫu dut iek, dom harei hu bruk klauk Vaccine, Thảo taduan bruk khám sàng lọc dahlau meng klauk jru, bruk ini ngak ka Thảo hadar veik dom harei bilan nao “thực hành lâm sàng” di sang iek ruak, meng dom ilamu bac megru hu, Thảo mboh khang hatai jang tuk tame ngak biak, saong mboh lac biak patuah tuk hu bac megru, pabak ilamu di labik bahrau, ngan saong Thảo, ini lac sa mbang bac hè biak hu yaom glaong.

Dahlau di nan, Thảo jeng lac menuac di Kapul pambuak bruk - Hội Sinh viên Việt Nam tỉnh Đắk Lắk, bhian hu mbaok haong Tỉnh đoàn Đắk Lắk daong pandap mbang ka ban raya HCM meng bruk taduan mek saong neh rabha dom janih pandap. Thảo brei thau : "Yaom lac glaih glar kayua bruk ngak ini nyu trak dut haong prein di urang kumei yau adei, min adei mboh biak bui sambai saong hu pabak prein khang tuk sahneng tal bruk bui sambai di gah meraong negar ralow darah tuk taduan hu dom pok pandap mai meng Đăk Lăk anit ranam” .

Puac di abih, Thảo caong khin ndom haong dom dam dara, dom sinh viên  lac oh hu kan kandah halei bo oh yam tapa hu, meyah kol drei oh huac./.

Urang lang: Jasi -9/1