Pasak Roh duah ilamo Cam Ninh Thuận hu meyaih khan tal bhap bani Inem krung ilamo - nghệ thuật hadah krah di urang Cam

Mbang parang iek ini hu labaih 80 pandap panda, thaot binguk, rup patau pambuak tal ilamo Cam di Miuyim tỉnh Quảng Nam saong labaih 1.500 pandap panda gam haong 1.400 baoh tapuk roh duah di Pasak roh duah ilamo Cam Ninh Thuận.

Dom thaot binguk Kút di urang Cam Ahier, dom baoh patau sarak Akhar Cam di Hòn Đỏ (abap VIII - IX), bimon Hoà Lai, patau caik di kalan Po Inư Nagar hu meng abap XVII, blaoh tal dom baoh lathung chai tapung, lathung thaok brah, dom sruh radaih limo pambuak pagam haong rai diuk di bhap bani Cam… hu daong ka urang mong iek sahneng mboh veik rai diuk bhap bani Cam di pluh thun 80, 90 di abap XX.

Parang iek inem krung dui pachreih hu biak rilo tuai damuai mai rivang iek, duah thau ka ilamo bangsa Cam. Đổng Lưu Thiên Thảo, urang Cam, sinh viên thun  4, Khoa Ilamo bangsa takik, Sang bac Đại học Ilamo bal raya Hồ Chí Minh mboh biak chreih takre anak dom pandap panda pandar yaok harei di urang Cam saong mboh biak hadah mbaok meta ka ilamo di bangsa drei:

Sa-ai Nguyễn Tri Kiếm – Phaok Yam ndok Miuyim tỉnh Quảng Nam brei thau, tapa dom mbang parang iek hu khan brei bhap bani thau ka Inem krung ilamo - nghệ thuật hadah krah di urang Cam angaok bhum taneh Ninh Thuận saong Quảng Nam. “Dom harak gar yao klak, dom blah khan ao jeng yau dom alat ragam di urang Cam Ninh Thuận hu daong ka adei sa-ai hu thau rilo jang piah ba gauk khik ramik patagok yaom glaong ilamo Cam tapa sa jaman Negar cak rok patagok hadah hadai di tỉnh Quảng Nam.”

Dalam dom thun tapa, bruk khik ramik saong patagok dom inem krung ilamo bangsa taduan hu bruk sangka di dom pakat, dom gah. Rilo inem krung ilamo hu mboh di meta saong oh mboh di meta hu khik ramik saong patagok yaom di nyu. Amuk Nguyễn Thị Thắm – Akaok Miuyim Urang kamei Nam bộ brei thau, tapa parang iek ini, hu daong ka manuac sia thau cambaih jang ka sa dak rai sajarah jeng yau jalan cak rok patagok di bangsa Cam di dom tỉnh, bal di Việt Nam: “Biak chreih chai ngan haong mbang parang iek ini. Hu rilo pandap panda, hu umo thun jeng daok tamo piah meyaih khan tal bhap bani. Abih di nyu lac tapa dom mbang parang iek ini khaol drei hu thau cambaih jang ka ilamo di bangsa Cam. Saong khaol dahlak saneng lac ngan haong mbang parang iek ini meda pato pakai meyaih khan tal manuac sia dalam taneh aia ka sa binah ilamo Cam.”

Ong Lê Xuân Lợi, Yam ndok Pasak roh duah ilamo Cam tỉnh Ninh Thuận brei thau  bruk pambuak gauk peih parang iek ini hu daong ngak brei inem krung ilamo Cam mai jaik jang haong bhap bani: “Hadei di rilo thun ngak bruk khaol dahlak hu pambuak gauk saong ba inem krung ilamo Cam Ninh Thuận nao tabiak rilo tỉnh, bal piah parang iek yau: Bến Tre, Miuyim Sarak Cam Đà Nẵng, Mu-yim Urang kamei Nam bộ,… Min mbang ini lac sa bruk pambuak gauk di Miuyim Quảng Nam saong Pasak roh duah ilamo Cam ye khaol dahlak ba dom pandap panda, rilo meng lac pandap tamo biak pachreih dom urang roh duah saong tuai damuai mai mong iek.”

Urang lang: M. Phương – 25/04