Meng thun 2004 tal thun 2013, Bà Rịa-Vũng Tàu oh hu jit cúm menuk ada,  nan ye meng thun 2011, Bà Rịa-Vũng Tàu nan lac sa dalam 21 tỉnh, bal dalam negar oh pachap klauk jru vắc xin cúm munek ada, bo caik ka dom baoh sang raong glang eng drei peih bruk klauk jru pacang caga ka tapol menuk ada di drei. Yau nan min, oh njauk lac urang raong glang halei jeng mboh hu kein laba di bruk klauk jru pacang caga nan ye jit ruak tuh halei jeng mbuan tamuh tabiak. 

Tỉnh Bà Rịa - Vũng Tàu hu labaih 3 triệu 300 ribau drei menuk ada, dalam nan ada hu jaik 650 ribau drei. Tapa pasang iek yaok thun di Chi cục thú y brei thau lac, tapol ada di tỉnh hu ndung virut cúm H5N1. Abih di nyu nan lac tapol ada kangan hu ndung virut biak glaong. Makna ba tal bruk nan kayua thun 2011, karja tabiak adat lac urang raong glang njauk pambuak bruk haong gah thú y puk palei peih bruk klauk jru pacang caga. Ta-eng tỉnh Bà Rịa-Vũng Tàu tok daong klauk jru pacang caga ka tapol ada ala 2.000 drei, tapol ada labaih 2.000 drei saong tapol menuk kayua po raong buh jien tabiak piah klauk jru pacang caga. Kayua huac abih jien blei vacxin, jien pah klak jru ka urang jarka thú y saong huac tapol menuk ada suai praong nan ye ralo baoh sang raong glang oh peih bruk klauk jru pacang caga. Ong Lê Văn Vinh – urang jakar ngak nong di xã Long Mỹ - huyện Đất Đỏ brei thau: “Ngan haong tapol ada ye mikva sahneng mboh jang kayua puk palei bhian peih bruk pathau khan angaok dom loa papar sap ka bruk jit cúm urak ini, nan ye mikva paglaong akaok sahneng jang kayua lac jien ndo urang buh tabiak ralo nan ye halan hatian nao tut angan brei klauk jru pacang caga, eng drei peih bruk pruh jru pametai anek ruak di van ro, pambuak bruk haong thú y piah klauk jru. Daok tapol menuk pak ini ye biak takik nan ye mikva oh sangka. Rilo meng lac tapon menuk praong meng labaih 500 – 600 drei ye mikva mengnao tut angan.

Ralo baoh sang raong glang prong meng dom ribau drei tagok ye ngak siam bruk klauc vắc xin ka menuk ada. Min dom baoh sang raong sit, raong takik, raong palao, raong mbang nduac langiu hamu ye oh khan brei ka jabat chức năng thau saong rilo meng plaih njaik bruk klauc vắc xin ka menuk ada. Ini lac jalan ba tal jit ruak mbuan tamuh tabiak glaong. Amuk Đồng Thị Huyền - xã Long Mỹ - huyện Đất Đỏ langyah ka buk bhap bani oh klauk jru vaccin pacang caga ka menuk ada nan kayua lac yau ini: Akaok mereip urang mehit lac klauc jru vacin ye urang huac ralo, kayua urang mehit lac klauk  jru ye ngak ka menuk ada trun kilo, min nyu tok trun 4 - 5 harei blaoh nyu tagok kilo veik.

Anak meta brei mboh, dalam dom sruh jit cúm menuk ada bahrau tamuh tabiak dalam tỉnh Bà Rịa-Vũng Tàu, sruh jit di baoh sang sa-ai Võ Tấn Nhẫn –xã Hắc Dịch –huyện Tân Thành rah tabiak jit cúm menuk ada hu sa makna kayua oh ka klauk ginup jru vacxin pacang caga. Tui kuhria mboh, taong abih tapol menuk ada 1.000 drei di sa-ai Nhẫn meyah klauk jru pacang caga ye abih jaik 1 triệu đồng, min kayua oh klauk jru pacang caga, tuk tamuh tabiak jit ye sa-ai lahik abih labaih 50 triệu, glaong jang 50 mbang dut haong jien klauk jru pacang caga. Ini lac kadha bac megru biak hu yaom oh lac ka ta-eng sa-ai Nhẫn bo daok ka dom baoh sang raong glang karei daok iek njuan bruk klauc jru pacang caga jit ruak.

Anak bruk jit cúm menuk ada daok tamuh khang yau urak ini, Chi cục thú y tỉnh Bà Rịa –Vũng Tàu hu caga labaih 1 triệu 200 ribau mbang vacxin cúm menuk ada, dalam nan meda hu bruk daong klauk jru ngan haong tapol ada dalam tỉnh saong tapol menuk di 2 puk palei rah tabiak sruh jit nan lac xã Hắc Dịch – huyện Tân Thành saong xã Hòa Hội – huyện Xuyên Mộc. Yau nan min, ini tok jalan ngak di anak meta. Piah khik ka bruk raong glang hu siam lagaih, langiu di bruk paglaong hatai saneng di bhap bani, dom gah chức năng njauk patagok bruk tui iek, pasang iek catang dom baoh sang raong glang piah klauk jru pabak chip ka tapol menuk ada bahrau raong oh ka hu klauk jru saong dom baoh sang raong sit sot. Dom puk palei njauk patagok bruk pasang iek, tacei pato saong jak ba dom baoh sang raong glang ngak siam bruk klauk vắc xin, pandar tapuk tui iek tapol ada; taphia di nan hu jalan taong phat catang dom urang ngak suan adat hukum./.