Dahlau di ini labaih 1 bilan, sa-ai Trần Văn Hiếu saong yaok rituh urang ngak karei hu tỉnh Bà Rịa-Vũng Tàu daong ba nao palei di xã Tân Thành B, huyện Tân Hồng, tỉnh Đồng Tháp tui caong khin. Sa-ai Hiếu khan lac: bilan 7 saong bilan 8, tỉnh Bà Rịa Vũng Tàu brei pa-atah di gauk ngak ka diuk pasang sa-ai lahik bruk ngak, jien patak pataom hu jeng dak harei dak takik nao nan ye diuk pasang njauk nao veik palei. Urak ini, tuk jit ruak pasang iek hu, diuk pasang sa-ai Hiếu daok kuhria mai veik piah duah bruk ngak: “Dahlak ngak hu dua thun, jit ruak rah tabiak ye mai palei, dahlak mai Đồng Tháp tal urak ini hu 21 harei. Urak ini, jeng oh ka thau yau habar, meyah Bà Rịa – Vũng Tàu jit ruak tani tanat ye mai ngak veik. Caong khin rilo janih, min anak meta lac oh caik brei eik lipa.”

Hadei di tuk Bà Rịa– Vũng Tàu peih pabah mbang rilo bruk ngak , Công ty takhaok Uy Việt, Labik ngak kong Sonadezi, huyện Châu Đức samar peih ngak veik. Urak ini hu 3.100 urang ngak, meblah 90% urang ngak mai ngak bruk veik. Ong Ngô Ngọc Trung, Phaok Tong Yam ndok Cty brei thau, D.N hu jalan palih ruah urang tame ngak. Dalam tukvak pato pakai urang  ngak, Cty bayar jien bilan ngak iek gam saong dom jien karei piah urang meda hu tani tanat raidiuk. Dalam 2 bilan pa-atah di gauk pacang jit, kuhria rah tapa yaok harei D.N ini buh tabiak 1 tỷ đồng piah bayar jien bilan ka urang ngak: “Dom bilan pa-atah di gauk, D.N daong tui yaom jien bilan tối thiểu bhum ka urang ngak, 170 ribau đồng sa harei sa urang, sa bilan sa urang taduan hu 4 trieu đồng tui quy định. Bruk daong ka urang ngak dalam bilan jit piah urang sahanang hatai kak kajap saong D.N.”

Tui Sở Lao động- Thương binh saong Xã hội tỉnh Bà Rịa – Vũng Tàu, urak ini tỉnh hu labaih 23.000 urang ngak oh ka hu bruk ngak, dalam nan hu 90% urang ngak caong hu ngak bruk di Bà Rịa– Vũng Tàu. Ong Trần Quốc Khách, Phaok Yam ndoc Sở Lao động- Thương binh saong  Xã hội tỉnh brei thau, bruk tỉnh peih ngak samar paoh jien daong lahik bruk ngak saong peih bruk klauk vaccine ka urang ngak lahik bruk  jeng hu rik daong ka urang ngak daok veik saong hu jalan samar duah hu bruk ngak: “Bruk kurang urang ngak di tỉnh Bà Rịa - Vũng Tàu oh ka rah tabiak, dom urang ngak hu bruk ngak ye daok mai veik. Dom urang ngak hu harak pambuak bruk, hu bảo hiểm ye urang daok veik, oh nao palei tra. Anak tal, dom D.N ngak bruk veik taong abih ye meda kurang urang ngak.

Gam saong dom tỉnh, ban dalam negar, tỉnh Bà Rịa - Vũng Tàu biak caik hatai tal bruk khik takai urang ngak. Hu sangka siam ka raidiuk, prein yawa, khik kajap bruk an sinh saong hu kandaong labaih, urang ngak meda kak kajap, klah rabha, yam takai nao gam haong doanh nghiep saong karja palei, ba gauk yam tapa jit ruak praong./.

Urang lang: Ai Nghiem -29/10/2021