Pathau mikva saong taong abih gauk!

Hatai caong di dam dara nan lac hu bac megru saong patagok, hu jalan piah padang mbang ngui, nan ye bruk tame đại học lac hatai caong praong di ralo urang. Min tame đại học njauk lac jalan padang mbang ngui halei oh? Daa mikva saong taong abih gauk pang kadha vak angaok harak báo điện tử Vnexpress tabiak jaik di ini – kadha vak lac  panuac tabiak meng hatung hatain di saai Lò Công Thịnh daok di tỉnh Cao Bằng ka jalan padang mbang ngui.

Thun ini dahlak umo 32 thun, daok hu bruk ngak tani tanat. Yaok thun tal bilan pakacah, maong anek saih jar var kuhria bruk pakacah, kham merat tame ka pahu đại học bo dahlak mboh hatai chreih chrai. Harei nan dahlak jeng yau dom ayut karei karei, kham merat abih drei piah tame hu đại học. Oh patuah lac thun camreip pakacah laik, dahlak cang sa thun tra piah pakacah veik. Thun hadei dahlak tame hu sa sang bac hu angan dalam dalam dom sang bac dang akaok di VN. Ndom yau nan piah dom ayut thau lac tuk nan, dahlak saong amaik ame adei sa-ai dahlak biak bui sambai saong uan tabuan yua habar. Dom  kuhria caga, caong khin ka harei hadei hadah hadai di labik phồn hoa yau mboh di anak meta, ngak ka dahlak chreih chrai var mbang var ndih ( dahlak lac sa sinh viên meng tỉnh atah tagok Bei Gon bac).

Min hatai caong khin yau habar jeng oh tabiak truh bruk di anak meta. Dom harei bac đại học lac dom harei sup palup di abih dalam rai diuk di dahlak kuhria tal urak ini. Oh lac dahlak oh kham merat bac, jeng  oh njauk lac oh takre bac. Bo bruk njauk biai nan lac di abik nan oh brei ka sinh viên pren khang piah yam tagok. Nyu tok lac lý thuyết saoh. Dahlak daok kanal ayut di dahlak thun nan, hadei di tuk bac bloh hu urang likau nao ngak urang pablei pandap, urang ye mai sang raong hadang, urang nao lin… Hu tal  5 urang nao ngak công nhân thời vụ di sang mac. Dom  bruk ngak oh cang bằng cấp, bac bloh trung học jeng nao ngak hu, dalam tuk ayut di dahlak urang halei jeng hu dalam tangin bằng đại học bo biak ralo menuac caong hu. Dom urang oh thau ngak hagait ye pakacah tagok cao học.

Dahlak kham merat tuk nan lac brei salih barau. Tuk pan bằng tốt nghiệp dalam tangin, dahlak var nyu nao saong tut angan tame bac di sa sang bac trung cấp bruk ngak. Hu dom ayut ndom lac dahlak oh bình thường. Tuk nan dahlak hu sahneng tal sa jalan nao nan ye kham merat tui. Tal urak ini ye dahlak oh aih aoh hagait ka bruk ini saong jeng daok diuk rai siam haong bruk ngak di drei palih ruah.

Dahlak tok hu panuac kakei tal dom adei anek saih dalam mbang pakacah lac: dom adei brei kham merat abih drei, bằng cấp meda lac điểm tựa piah dom adei patagok di harei hadei, min jui ao tưởng saong jhui caik ralo hatai caong tame nyu. Jalan tame dunya hu ralo tavak tavaiy bo oh sang bac đại học halei pato ka drei. Brei ngak tui dom bruk drei takre, min brei ngak avar piah klah aih aoh./.