Kandang kandi ngak bruk saong daong ka urang tui jalan sahneng di drei, hu oh takik urang jakar ngak bruk urang kumei di ban raya Hồ Chí Minh njauk lac kreih camin hadah ka rilo urang karei ngak tui. Bac tui Wa meng dom bruk sit di abih, bloh dom anai, dom sa-ai kumei ba dom ilamu saong bruk thau hu di drei piah pabak pren khang yam tapa kan kandah ka dom urang kumei daok jaik drei.

Thun 1987, hadei di tuk padeih hưu, anai gru Mai Thị Kim Hoa chreih chrai tut angan tame ngak bruk urang kumei di labik drei daok nan lac Khu phố 1, Phường 8, Quận 4. Urak ini umo jaik 70 thun, min harei harei, amuk jeng daok kham merat ka bruk ngak di sa urang dang akaok dhar kapul urang kumei dalam khu phố. Mboh jaik drei daok hu rilo urang kan kandah, rilo thun tapa, amuk Hoa tuk halei jeng ba akaok nao dahlau dalam bruk jak ba adei sa-ai kumei bac tui Wa jalan diuk rai patak pataom piah tabiak truh kan kathaot khang kajap. Harei harei, amuk nao pataom jien meng rilo urang kumei kan kathaot dalam quận bloh payua mek jien laba daong ka dom adei sa-ai bayar sraiy. Jalan ngak ini di amuk Hoa meng dom thun ini mai hu daong ka oh takik urang kumei gaok kan kandah di Quận 4 bayar hu sraiy di Gilang pariak sarak karja.. Lingiu di nan, amuk daok lac urang pathau khan dom adat hukum, dom sarak an sinh xã hội bharau saong hatai caong lac dak harei dak paglaong labik dang di adei sa-ai kumei. Amuk Mai Thị Kim Hoa khan lac: “Tuk halei dahlak jeng sahneng mboh lac, drei njauk ngak yau habar piah ka adei sa-ai kumei hu siam jang, naih joi jang saong tabiak truh hu kan kathaot. Dahlau deih dahlak jeng lac sa dalam dom urang kumei kan kathaot dalam palei, min meng hu hatai kham merat, drei yam tapa hu kan kandah. Urak ini dahlak caong ba hatai kham merat saong bruk thau hu di drei piah pabak veik ka dom adei sa-ai kumei karei”.

6 thun ngak bruk urang kumei dalam palei, sa-ai Nguyễn Thị Bảy (umo 49 thun), Phaok dhar kapul urang kumei phường Bình Trưng Đông, Quận 2 oh lac kham merat dalam bruk daong ka urang kumei kan kathaot tui jalan pambuak bruk haong dom urang ngak pahala, sa-ai Bảy daok hu ba tabiak rilo danak dak siam lagaih, ieu adei sa-ai kumei padang kadung jien patak pataom piah patagok dom bruk ngak sit, duah jien tame, pasiam rai diuk. Taphia di nan, sa-ai  daok caik hatai sangka, klah rabha haong urang karei, buh jien kadung di drei tabiak piah blei thẻ bảo hiểm alin brei urang kan kathaot, pataom jien blei pandap ka ging lisei anit ranam di phường. Meng bilan 3/2014, sa-ai jak ba dom adei sa-ai kumei, padang ging lisei anit ranam yaom lap 2.000 đồng sa pok lisei. Peih tabiak di jala pandiak dom harei ngar, jip, senecar, yaok harei yau nan, ging lisei di dom sa-ai pablei jaik 400 pok lisei yaom lap ka urang kan kathaot. Lingiu di nan, ging lisei jeng tahanek lisei daong ka urang ruak kan kathaot di Sang iek ruak Quận 2. Harei harei huac lisei sang nao ngak bruk daong ka urang, yau nan bo tuk hu urang meyaom drei, sa-ai Bảy jeng oh taduan mek panuac meyaom bo ndom lac:  “Tuk halei dahlak jeng caong ngak bruk hagait nan piah daong ka meuac sia tui pren yava di drei. Dahlak jeng hu thau lac, dahlau deih Wa jeng ngak yau nan. Wa jeng caong iek glang rai diuk ka bhap bini piah thei thei jeng hu lisei huak, hu ao cuk, thei jeng hu bac da-a. Dahlak jeng takre ngak yau nan tui Wa. Drei ngak bloh hu dom adei sa-ai mboh,  biak di nyu tuk drei ngak drei oh sahneng lac ngak piah hu mbaok meta, piah hu pok meyaom”.

Yaok urang sa bruk ngak, sa raidiuk karei di gauk, min anai Hoa, sa-ai Bảy tuk halei jeng sahneng saong saong diuk rai ka urang karei, abih di nyu nan lac dom urang kan kandah. Dom bruk ngak di dom urang nan, daok ngak ka raidiuk dak harei dak siam mekre jang./. 

Mỹ Dung – Urang vak di Rayo sap ndom Viet Nam daok pak Bal raya HO Chi Minh